1. අසංවාසො භික්ඛූහි ච භික්ඛුනීහි ච
සම්භොගො එකච්චො තහිං න ලබ්භති,
අවිප්පවාසෙන අනාපත්ති,
පඤ්හාමෙසා කුසලෙහි චින්තිතා.

2. අවිස්සජ්ජියං අවෙභඞ්ගියං
පඤ්ච වුත්තා මහෙසිනා,
විස්සජ්ජෙන්තස්ස පරිභුඤ්ජන්තස්ස අනාපත්ති
පඤ්හාමෙසා කුසලෙහි චින්තිතා.

3. දස පුග්ගලෙ න වදාමි එකාදස විවජ්ජිය,
බුඩ්ඪං වන්දන්තස්ස ආපත්ති පඤ්හාමෙසා කුසලෙහි චින්තිතා

4. න උක්ඛිත්තකො න ච පන පාරිවාසිකො,
න සඞ්ඝභින්නො න ච පන පක්ඛසඞ්කන්තො,
සමානසංවාසකභූමියා ඨිතො
කථන්නුසික්ඛාය අසාධාරණො සියා
පඤ්හාමෙසා කුසලෙහි චින්තිතා.

5. උපෙති ධම්මං පරිපුච්ඡමානො
කුසලං අත්ථූපසඤ්හිතං,
න ජීවති න මතො න නිබ්බුතො
තං පුග්ගලං කතමං වදන්ති බුද්ධා
පඤ්හාමෙසා කුසලෙහි චින්තිතා.

6. උබ්භක්ඛකෙ න වදාමි අධො නාභිං විවජ්ජිය
මෙථුනධම්මපච්චයා කථං පාරාජිකො සියා;
පඤ්හා මෙසා කුසලෙහි චින්තිතා.

7. භික්ඛු සඤ්ඤාචිකාය කුටිං කරොති,
අදෙසිතවත්ථුකං පමාණාතික්කන්තා,
සාරම්භං අපරික්කමනං අනාපත්ති
පඤ්හාමෙසා කුසලෙහි චින්තිතා.

8. භික්ඛු සඤ්ඤාචිකාය කුටිං කරොති
දෙසිතවත්ථුකං පමාණිකා,
අනාරම්භං සපරික්කමනං ආපත්ති
පඤ්හාමෙසා කුසලෙහි චින්තිතා.

9. න කායිකං කඤ්චි පයොගමාචරෙ
න චාපි වාචාය පරෙ භණෙය්ය,
ආපජ්ජෙය්ය ගරුකං ඡෙජ්ජවත්ථුං
පඤ්හාමෙසා කුසලෙහි චින්තිතා.

10. න කායිකං වාචසිකඤ්ච කිඤ්චි
මනසාපි සන්තො න කරෙය්ය පාපං,
සො නාසිතො කින්ති සුනාසිතො භවෙ
පඤ්හාමෙසා කුසලෙහි චින්තිතා.

11. අනාලපන්තො මනුජෙන කෙනචි
වාචා ගිරං නො ච පරෙ භණෙය්ය,
ආපජ්ජෙය්ය වාචසිකං න කායිකා
පඤ්හාමෙසා කුසලෙහි චින්තිතා.

12. සික්ඛාපදා බුද්ධවරෙන වණ්ණිතා
සඞ්ඝාදිසෙසා චතුරො භවෙය්යුං
ආපජ්ජෙය්ය එකපයොගෙන සබ්බෙ
පඤ්හා මෙසා කුසලෙහි චින්තිතා.

13. උභො එකතො උපසම්පන්නා
උභින්නං හත්ථතො චීවරං පටිග්ගණ්හෙය්ය,
සියා ආපත්තියො නානා
පඤ්හාමෙසා කුසලෙහි චින්තිතා.

14. චතුරො ජනා සංවිධාය
ගරුභණ්ඩං අවාහරුං,
තයො පාරාජිකා එකො න පාරාජිකො,
පඤ්හාමෙසා කුසලෙහි චින්තිතා.

15. ඉත්ථි ච අබ්භන්තරෙ සියා
භික්ඛු ච බහිද්ධා සියා,
ඡිද්දං තස්මිං ඝරෙ නත්ථි
මෙථුනධම්මපච්චයා,
කථං පාරාජිකො සියා
පඤ්හාමෙසා කුසලෙහි චින්තිතා.

16. තෙලං මධුං ඵාණිතඤ්චාපි සප්පිං
සාමං ගහෙත්වාන නික්ඛිපෙය්ය
අවීතිවත්තෙ සත්තාහෙ,
සති පච්චයෙ පරිභුඤ්ජන්තස්ස ආපත්ති
පඤ්හාමෙසා කුසලෙහි චින්තිතා.

17. නිස්සග්ගියෙන ආපත්ති
සුද්ධකෙන පාචිත්තියං,
ආපජ්ජන්තස්ස එකතො
පඤ්හාමෙසා කුසලෙහි චින්තිතා.