4. 8.
1. භික්ඛූහි සහධම්මිකං වුච්චමානො ‘න තාවාහං ආවුසො එතස්මිං සික්ඛාපදෙ සික්ඛිස්සාමි, යාව න අඤ්ඤං භික්ඛුං වියත්තං විනයධරං පරිපුච්ඡිස්සාමී’ති භණන්තො ද්වෙ ආපත්තියො ආපජ්ජති : භණති පයොගෙ දුක්කටං, භණිතෙ ආපත්ති පාචිත්තියස්ස.
2. විනයං විවණ්ණෙන්තො ද්වෙ ආපත්තියො ආපජ්ජති : විවණ්ණෙති පයොගෙ දුක්කටං, විවණ්ණිතෙ ආපත්ති පාචිත්තියස්ස.
3. මොහෙන්තො ද්වෙ ආපත්තියො ආපජ්ජති : අනාරොපිතෙ මොහෙ මොහෙති ආපත්ති දුක්කටස්ස, ආරොපිතෙ මොහෙ මොහෙති ආපත්ති පාචිත්තියස්ස.
4. භික්ඛුස්ස කුපිතො අනත්තමනො පහාරං දෙන්තො ද්වෙ ආපත්තියො ආපජ්ජති : පහරති පයොගෙ දුක්කටං, පහරිතෙ ආපත්ති පාචිත්තියස්ස .
5. භික්ඛුස්ස කුපිතො අනත්තමනො තලසත්තිකං උග්ගිරන්තො ද්වෙ ආපත්තියො ආපජ්ජති : උග්ගිරති පයොගෙ දුක්කටං, උග්ගිරිතෙ ආපත්ති පාචිත්තියස්ස.
6. භික්ඛුං අමූලකෙන සඞ්ඝාදිසෙසෙන අනුද්ධංසෙන්තො ද්වෙ ආපත්තියො ආපජ්ජති : අනුද්ධංසෙති පයොගෙ දුක්කටං, අනුද්ධංසිතෙ ආපත්ති පාචිත්තියස්ස.
7. භික්ඛුස්ස සඤ්චිච්ච කුක්කුච්චං උපදහන්තො ද්වෙ ආපත්තියො ආපජ්ජති : උපදහති පයොගෙ දුක්කටං, උපදහිතෙ ආපත්ති පාචිත්තියස්ස.
8. භික්ඛූනං භණ්ඩනජාතානං කලහජාතානං විවාදාපන්නානං උපස්සුතිං තිට්ඨන්තො ද්වෙ ආපත්තියො ආපජ්ජති : සොස්සාමීති ගච්ඡති ආපත්ති දුක්කටස්ස, යත්ථ ඨිතො සුණාති ආපත්ති පාචිත්තියස්ස.
9. ධම්මිකානං කම්මානං ඡන්දං දත්වා පච්ඡා ඛීයනධම්මං ආපජ්ජන්තො ද්වෙ ආපත්තියො ආපජ්ජති : ඛීයති පයොගෙ දුක්කටං, ඛීයිතෙ ආපත්ති පාචිත්තියස්ස.
10. සඞ්ඝෙ විනිච්ඡයකථාය වත්තමානාය ඡන්දං අදත්වා උට්ඨායාසනා පක්කමන්තො ද්වෙ ආපත්තියො ආපජ්ජති : පරිසාය හත්ථපාසං විජහන්තස්ස ආපත්ති දුක්කටස්ස, විජහිතෙ ආපත්ති පාචිත්තියස්ස.
11. සමග්ගෙන සඞ්ඝෙන චීවරං දත්වා පච්ඡා ඛීයනධම්මං ආපජ්ජන්තො ද්වෙ ආපත්තියො ආපජ්ජති : ඛීයති පයොගෙ දුක්කටං, ඛීයිතෙ ආපත්ති පාචිත්තියස්ස.
12. ජානං සඞ්ඝිකං ලාභං පරිණතං පුග්ගලස්ස පරිණාමෙන්තො ද්වෙ ආපත්තියො ආපජ්ජති : පරිණාමෙති පයොගෙ දුක්කටං, පරිණාමිතෙ ආපත්ති පාචිත්තියස්ස.
සහධම්මිකවග්ගො අට්ඨමො.
4. 9.
1. පුබ්බෙ අප්පටිසංවිදිතො රඤ්ඤො අන්තෙපුරං පවිසන්තො ද්වෙ ආපත්තියො ආපජ්ජති : පඨමං පාදං උම්මාරං අතික්කාමෙති ආපත්ති දුක්කටස්ස, දුතියං පාදං අතික්කාමෙති ආපත්ති පාචිත්තියස්ස.
2. රතනං උග්ගණ්හන්තො ද්වෙ ආපත්තියො ආපජ්ජති : ගණ්හාති පයොගෙ දුක්කටං, ගහිතෙ ආපත්ති පාචිත්තියස්ස.
3. සන්තං භික්ඛුං අනාපුච්ඡා විකාලෙ ගාමං පවිසන්තො ද්වෙ ආපත්තියො ආපජ්ජති : පඨමං පාදං පරික්ඛෙපං අතික්කාමෙති ආපත්ති දුක්කටස්ස, දුතියං පාදං අතික්කාමෙති ආපත්ති පාචිත්තියස්ස.