1. මජ්ජං පිවන්තො ද්වෙ ආපත්තියො ආපජ්ජති : පිවිස්සාමීති පටිගණ්හාති ආපත්ති දුක්කටස්ස, අජ්ඣොහාරෙ අජ්ඣොහාරෙ ආපත්ති පාචිත්තියස්ස.

2. භික්ඛුං අඞ්ගුලිපතොදකෙන හාසෙන්තො ද්වෙ ආපත්තියො ආපජ්ජති : හාසෙති පයොගෙ දුක්කටං, හාසිතෙ ආපත්ති පාචිත්තියස්ස.

3. උදකෙ කීළන්තො ද්වෙ ආපත්තියො ආපජ්ජති : හෙට්ඨාගොප්ඵකෙ උදකෙ කීළති ආපත්ති දුක්කටස්ස, උපරි ගොප්ඵකෙ කීළති ආපත්ති පාචිත්තියස්ස.

4. අනාදරියං කරොන්තො ද්වෙ ආපත්තියො ආපජ්ජති : කරොති පයොගෙ දුක්කටං, කතෙ ආපත්ති පාචිත්තියස්ස.

5. භික්ඛුං භිංසාපෙන්තො ද්වෙ ආපත්තියො ආපජ්ජති : භිංසාපෙති පයොගෙ දුක්කටං, භිංසාපිතෙ ආපත්ති පාචිත්තියස්ස.

6. ජොතිං සමාදහිත්වා විසිබ්බෙන්තො ද්වෙ ආපත්තියො ආපජ්ජති : සමාදහති පයොගෙ දුක්කටං, සමාදහිතෙ ආපත්ති පාචිත්තියස්ස.

7. ඔරෙනද්ධමාසං නහායන්තො ද්වෙ ආපත්තියො ආපජ්ජති : නහායති පයොගෙ දුක්කටං, නහානපරියොසානෙ ආපත්ති පාචිත්තියස්ස.

8. අනාදියිත්වා තිණ්ණං දුබ්බණ්ණකරණානං අඤ්ඤතරං දුබ්බණ්ණකරණං නවං චීවරං පරිභුඤ්ජන්තො ද්වෙ ආපත්තියො ආපජ්ජති : පරිභුඤ්ජති, පයොගෙ දුක්කටං, පරිභුත්තෙ ආපත්ති පාචිත්තියස්ස.

9. භික්ඛුස්ස වා භික්ඛුනියා වා සික්ඛමානාය වා සාමණෙරස්ස වා සාමණෙරියා වා සාමං චීවරං විකප්පෙත්වා අපච්චුද්ධාරකං පරිභුඤ්ජන්තො ද්වෙ ආපත්තියො ආපජ්ජති : පරිභුඤ්ජති පයොගෙ දුක්කටං, පරිභුත්තෙ ආපත්ති පාචිත්තියස්ස.

10. භික්ඛුස්ස පත්තං වා චීවරං වා නිසීදනං වා සූචිඝරං වා කායබන්ධනං වා අපනිධෙන්තො ද්වෙ ආපත්තියො ආපජ්ජති : අපනිධෙති : පයොගෙ දුක්කටං, අපනිද්ධෙ ආපත්ති පාචිත්තියස්ස.

1. සඤ්චිච්ච පාණං ජීවිතා වොරොපෙන්තො කති ආපත්තියො ආපජ්ජති : සඤ්චිච්ච පාණං ජීවිතා වොරොපෙන්තො චතස්සො ආපත්තියො ආපජ්ජති : අනොදිස්ස ඔපාතං ඛණති ‘යො කොචි පපතිත්වා මරිස්සතී’ති ආපත්ති දුක්කටස්ස. මනුස්සො තස්මිං පපතිත්වා මරති, ආපත්ති පාරාජිකස්ස. යක්ඛො වා පෙතො වා තිරච්ඡානගතමනුස්සවිග්ගහො වා තස්මිං පපතිත්වා මරති, ආපත්ති ථුල්ලච්චයස්ස. තිරච්ඡානගතො තස්මිං පපතිත්වා මරති, ආපත්ති පාචිත්තියස්ස. සඤ්චිච්ච පාණං ජීවිතා වොරොපෙන්තො ඉමා චතස්සො ආපත්තියො ආපජ්ජති :

2. ජානං සප්පාණකං උදකං පරිභුඤ්ජන්තො ද්වෙ ආපත්තියො ආපජ්ජති : පරිභුඤ්ජති, පයොගෙ දුක්කටං, පරිභුත්තෙ ආපත්ති පාචිත්තියස්ස.

3. ජානං යථාධම්මං නිහතාධිකරණං පුන කම්මාය උක්කොටෙන්තො ද්වෙ ආපත්තියො ආපජ්ජති : උක්කොටෙති පයොගෙ දුක්කටං, උක්කොටිතෙ ආපත්ති පාචිත්තියස්ස.