පිණ්ඩපාතවග්ගො චතුත්ථො < විනයපිටක | බුද්ධ ජයන්ති ත්‍රිපිටකය

7. 4.

1. අනාදරියං පටිච්ච අසක්කච්චං පිණ්ඩපාතං භුඤ්ජන්තස්ස දුක්කටං -කත්ථ පඤ්ඤත්තන්ති : සාවත්ථියං පඤ්ඤත්තං.

කං ආරබ්භාති : ඡබ්බග්ගියෙ භික්ඛූ ආරබ්භ.

කිස්මිං වත්ථුස්මින්ති : ඡබ්බග්ගියා භික්ඛූ අනාදරියං පටිච්ච අසක්කච්චං පිණ්ඩපාතං භුඤ්ජිංසු, තස්මිං වත්ථුස්මිං.

එකා පඤ්ඤත්ති.

ඡන්නං ආපත්තිසමුට්ඨානානං එකෙන සමුට්ඨානෙන සමුට්ඨාති : කායතො ච චිත්තතො ච සමුට්ඨාති, න වාචතො -පෙ-

2. අනාදරියං පටිච්ච තහං තහං ඔලොකෙන්තෙන පිණ්ඩපාතං භුඤ්ජන්තස්ස දුක්කටං -පෙ-

3. අනාදරියං පටිච්ච තහං තහං ඔමසිත්වා පිණ්ඩපාතං භුඤ්ජන්තස්ස දුක්කටං -පෙ-

4. අනාදරියං පටිච්ච සූපඤ්ඤෙව බහුං භුඤ්ජන්තස්ස දුක්කටං -පෙ-

5. අනාදරියං පටිච්ච ථූපකතො ඔමද්දිත්වා පිණ්ඩපාතං භුඤ්ජන්තස්ස දුක්කටං -පෙ-

6. අනාදරියං පටිච්ච සූපං වා බ්යඤ්ජනං වා ඔදනෙන පටිච්ඡාදෙන්තස්ස දුක්කටං -පෙ-

7. අනාදරියං පටිච්ච සූපං වා බ්යඤ්ජනං වා අගිලානො අත්තනො අත්ථාය විඤ්ඤාපෙත්වා භුඤ්ජන්තස්ස දුක්කටං -පෙ-

එකා පඤ්ඤත්ති, එකා අනුපඤ්ඤත්ති.

ඡන්නං ආපත්තිසමුට්ඨානානං ද්වීහි සමුට්ඨානෙහි සමුට්ඨාති : සියා කායතො ච චිත්තතො ච සමුට්ඨාති, න වාචතො. සියා කායතො ච වාචතො ච චිත්තතො ච සමුට්ඨාති -පෙ-

8. අනාදරියං පටිච්ච උජ්ඣානසඤ්ඤිනා පරෙසං පත්තං ඔලොකෙන්තස්ස දුක්කටං -පෙ-

එකා පඤ්ඤත්ති.

9. අනාදරියං පටිච්ච මහන්තං කබළං කරොන්තස්ස දුක්කටං -පෙ-.

10. අනාදරියං පටිච්ච දීඝං ආලොපං කරොන්තස්ස දුක්කටං කත්ථ පඤ්ඤත්තන්ති : සාවත්ථියං පඤ්ඤත්තං.

කං ආරබ්භාති : ඡබ්බග්ගියෙ භික්ඛූ ආරබ්භ.

කිස්මිං වත්ථුස්මින්ති : ඡබ්බග්ගියා භික්ඛූ අනාදරියං පටිච්ච දීඝං ආලොපං කරිංසු, තස්මිං වත්ථුස්මිං.

එකා පඤ්ඤත්ති.

ඡන්නං ආපත්තිසමුට්ඨානානං එකෙන සමුට්ඨානෙන සමුට්ඨාති : කායතො ච චිත්තතො ච සමුට්ඨාති, න වාචතො -පෙ-.

පිණ්ඩපාතවග්ගො චතුත්ථො.

7. 5.

1. අනාදරියං පටිච්ච අනාහටෙ කබලෙ මුඛද්වාරං විවරන්තස්ස දුක්කටං කත්ථ පඤ්ඤත්තන්ති : සාවත්ථියං පඤ්ඤත්තං.

කං ආරබ්භාති : ඡබ්බග්ගියෙ භික්ඛූ ආරබ්භ.

කිස්මිං වත්ථුස්මින්ති, ඡබ්බග්ගියා භික්ඛූ අනාදරියං පටිච්ච අනාහටෙ කබලෙ මුඛද්වාරං විවරිංසු, තස්මිං වත්ථුස්මිං.

එකා පඤ්ඤත්ති.

2. අනාදරියං පටිච්ච භුඤ්ජමානෙන සබ්බං හත්ථං මුඛෙ පක්ඛිපන්තස්ස දුක්කටං -පෙ-

3. අනාදරියං පටිච්ච සකබලෙන මුඛෙන බ්යාහරන්තස්ස දුක්කටං -පෙ- එකෙන සමුට්ඨානෙන සමුට්ඨාති : කායතො ච වාචතො ච චිත්තතො ච සමුට්ඨාති -පෙ-.