“යො පන භික්ඛු සඤ්චරිත්තං සමාපජ්ජෙය්ය ඉත්ථියා වා පුරිසමතිං පුරිසස්ස වා ඉත්ථිමතිං, ජායත්තනෙ වා ජාරත්තනෙ වා, අන්තමසො තඞ්ඛණිකායපි, සඞ්ඝාදිසෙසො”ති.

13. යො පනාති යො යාදිසො -පෙ-

භික්ඛූ’ති -පෙ- අයං ඉමස්මිං අත්ථෙ අධිප්පෙතො ‘භික්ඛූ’ති.

සඤ්චරිත්තං සමාපජ්ජෙය්යාති ඉත්ථියා වා පහිතො පුරිසස්ස සන්තිකෙ ගච්ඡති, පුරිසෙන වා පහිතො ඉත්ථියා සන්තිකෙ ගච්ඡති.

ඉත්ථියා වා පුරිසමතින්ති පුරිසස්ස මතිං ඉත්ථියා වා ආරොචෙති.

පුරිසස්ස වා ඉත්ථිමතින්ති ඉත්ථියා මතිං පුරිසස්ස වා ආරොචෙති.

ජායත්තනෙ වා’ති ජායා භවිස්සසි.

ජාරත්තනෙ වා’ති ජාරී භවිස්සසි.

අන්තමසො තං ඛණිකායපීති මුහුත්තිකා භවිස්සසි .

සඞ්ඝාදිසෙසොති -පෙ- තෙනපි වුච්චති සඞ්ඝාදිසෙසොති.

14. දස ඉත්ථියො: මාතුරක්ඛිතා, පිතුරක්ඛිතා, මාතාපිතුරක්ඛිතා, භාතුරක්ඛිතා, භගිනිරක්ඛිතා, ඤාතිරක්ඛිතා, ගොත්තරක්ඛිතා, ධම්මරක්ඛිතා, සාරක්ඛා, සපරිදණ්ඩා.

දස භරියායො: ධනක්කීතා, ඡන්දවාසිනී, භොගවාසිනී, පටවාසිනී, ඔදපත්තකිනී, ඔභටචුම්බටා, දාසී ච භරියා ච, කම්මකාරී ච භරියා ච, ධජාහටා, මුහුත්තිකා.

මාතුරක්ඛිතා නාම: මාතා රක්ඛති ගොපෙති ඉස්සරියං කරොති වසං වත්තෙති.

පිතුරක්ඛිතා නාම: පිතා රක්ඛති ගොපෙති ඉස්සරියං කාරෙති වසං වත්තෙති.

මාතාපිතුරක්ඛිතා නාම: මාතාපිතරො රක්ඛන්ති ගොපෙන්ති ඉස්සරියං කාරෙන්ති වසං වත්තෙන්ති.

භාතුරක්ඛිතා නාම: භාතා රක්ඛති ගොපෙති ඉස්සරියං කාරෙති වසං වත්තෙති.

භගිනිරක්ඛිතා නාම: භගිනී රක්ඛති ගොපෙති ඉස්සරියං කරොති වසං වත්තෙති.

ඤාතිරක්ඛිතා නාම: ඤාතකා රක්ඛන්ති ගොපෙන්ති ඉස්සරියං කාරෙන්ති වසං වත්තෙන්ති.

ගොත්තරක්ඛිතා නාම: සගොත්තා රක්ඛන්ති ගොපෙන්ති ඉස්සරියං කාරෙන්ති වසං වත්තෙන්ති.