1. තෙන සමයෙන බුද්ධො භගවා වෙසාලියං විහරති මහාවනෙ කූටාගාරසාලායං. තෙන ඛො පන සමයෙන වෙසාලියං පණීතානං භත්තානං භත්තපටිපාටි අට්ඨිතා හොති. අථ ඛො අඤ්ඤතරස්ස දළිද්දස්ස කම්මකාරස්ස එතදහොසි: “න ඛො ඉදං ඔරකං භවිස්සති, යථා ඉමෙ මනුස්සා සක්කච්චං භත්තං කරොන්ති, යන්නූනාහම්පි භත්තං කරෙය්යන්ති.” අථ ඛො සො දළිද්දො කම්මකාරො යෙන කිරපතිකො තෙනුපසඞ්කමි. උපසඞ්කමිත්වා තං කිරපතිකං එතදවොච:

ඉච්ඡාමහං අය්යපුත්ත, බුද්ධ පමුඛස්ස භික්ඛුසඞ්ඝස්ස භත්තං කාතුං, දෙහි මෙ වෙතනන්ති”. සොපි ඛො කිරපතිකො සද්ධො හොති පසන්නො. අථ ඛො සො කිරපතිකො තස්ස දළිද්දස්ස කම්මකාරස්ස අබ්භාතිරෙකං වෙතනං අදාසි. අථ ඛො සො දළිද්දො කම්මකාරො යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො සො දළිද්දො කම්මකාරො භගවන්තං එතදවොච: “අධිවාසෙතු මෙ භන්තෙ භගවා ස්වාතනාය භත්තං සද්ධිං භික්ඛුසඞ්ඝෙනා”ති. “මහා ඛො ආවුසො භික්ඛුසඞ්ඝො ජානාහීති හොතු භන්තෙ මහා භික්ඛුසඞ්ඝො, බහූ මෙ බදරා පටියත්තා බදරමිස්සෙනපය්යා පරිපූරිස්සන්තීති. අධිවාසෙසි භගවා තුණ්හීභාවෙන. අථ ඛො සො දළිද්දො කම්මකරො භගවතො අධිවාසනං විදිත්වා උට්ඨායාසනා භගවන්තං අභිවාදෙත්වා පදක්ඛිණං කත්වා පක්කාමි.

2. අස්සොසුං ඛො භික්ඛූ දළිද්දෙන කිර කම්මකාරෙන ස්වාතනාය බුද්ධපමුඛො භික්ඛුසඞ්ඝො නිමන්තිතො, බදරමිස්සෙනපය්යා පරිපූරිස්සන්තීති. තෙ කාලස්සෙව පිණ්ඩාය චරිත්වා භුඤ්ජිංසු. අස්සොසුං ඛො මනුස්සා දළිද්දෙන කිර කම්මකාරෙන බුද්ධපමුඛො භික්ඛුසඞ්ඝො නිමන්තිතොති. තෙ දළිද්දස්ස කම්මකාරස්ස පහූතං ඛාදනීයං භොජනීයං අභිහරිංසු.

3. අථ ඛො සො දළිද්දො කම්මකාරො තස්සා රත්තියා අච්චයෙන පණීතං ඛාදනීයං භොජනීයං පටියාදාපෙත්වා භගවතො කාලං ආරොචාපෙසි. කාලො භන්තෙ නිට්ඨිතං භත්තන්ති. අථ ඛො භගවා පුබ්බන්හසමයං නිවාසෙත්වා පත්තචීවරමාදාය යෙන තස්ස දළිද්දස්ස කම්මකරස්ස නිවෙසනං තෙනුපසඞ්කමි, උපසඞ්කමිත්වා පඤ්ඤත්තෙ ආසනෙ නිසීදි. සද්ධිං භික්ඛුසඞ්ඝෙන. අථ ඛො සො දළිද්දො කම්මකරො භත්තග්ගෙ භික්ඛූ පරිවිසති. භික්ඛූ එවමාහංසු: “ථොකං ආවුසො දෙහි, ථොකං ආවුසො දෙහී”ති. මා ඛො තුම්හෙ භන්තෙ අයං දළිද්දො කම්මකරොති ථොකං ථොකං පටිගණ්හිත්ථ, පහූතං මෙ ඛාදනීයං භොජනීයං පටියත්තං පටිග්ගණ්හාථ භන්තෙ යාවදත්ථන්ති. න ඛො මයං ආවුසො එතං කාරණා ථොකං ථොකං පටිග්ගණ්හාම අපි ච මයං කාලස්සෙව පිණ්ඩාය චරිත්වා භුඤ්ජිම්හා, තෙන මයං ථොකං ථොකං පටිග්ගණ්හාමාති. අථ ඛො සො දළිද්දො කම්මකාරො උජ්ඣායති ඛීයති විපාචෙති: “කථං හි නාම භදන්තා මයා නිමන්තිතා අඤ්ඤත්ර භුඤ්ජිස්සන්ති, න චාහං පටිබලො යාවදත්ථං දාතුන්ති. අස්සොසුං ඛො භික්ඛූ තස්ස දළිද්දස්ස කම්මකාරස්ස උජ්ඣායන්තස්ස ඛීයන්තස්ස විපාචෙන්තස්ස.