1. තෙන සමයෙන බුද්ධො භගවා චම්පායං විහරති ගග්ගරාය පොක්ඛරණියා තීරෙ. තෙන ඛො පන සමයෙන කාසීසු ජනපදෙ වාසභගාමො නාම හොති. තත්ථ කස්සපගොත්තො නාම භික්ඛු ආවාසිකො හොති තන්තිබද්ධො උස්සුක්කං ආපන්නො “කින්ති අනාගතා ච පෙසලා භික්ඛූ ආගච්ඡෙය්යුං, ආගතා ච පෙසලා භික්ඛූ ඵාසුං විහරෙය්යුං, අයඤ්ච ආවාසො වුද්ධිං විරූළ්හිං වෙපුල්ලං ආපජ්ජෙය්යා”ති.

2. තෙන ඛො පන සමයෙන සම්බහුලා භික්ඛූ කාසීසු චාරිකං චරමානා යෙන වාසභගාමො තදවසරුං. අද්දසා ඛො කස්සපගොත්තො භික්ඛු තෙ භික්ඛූ දූරතොව ආගච්ඡන්තෙ. දිස්වාන ආසනං පඤ්ඤාපෙසි. පාදොදකං පාදපීඨං පාදකඨලිකං උපනික්ඛිපි. පච්චුග්ගන්ත්වා පත්තචීවරං පටිග්ගහෙසි. පානීයෙන ආපුච්ඡි. නහානෙ උස්සුක්කං අකාසි. උස්සුක්කම්පි අකාසි යාගුයා ඛාදනීයෙ භත්තස්මිං.

3. අථ ඛො තෙසං ආගන්තුකානං භික්ඛූනං එතදහොසි: “භද්දකො ඛො අයං ආවුසො, ආවාසිකො භික්ඛු නහානෙ උස්සුක්කං කරොති. උස්සුක්කම්පි කරොති යාගුයා ඛාදනීයෙ භත්තස්මිං. හන්ද මයං ආවුසො ඉධෙව වාසභගාමෙ නිවාසං කප්පෙමා”ති. අථ ඛො තෙ ආගන්තුකා භික්ඛූ තත්ථෙව වාසභගාමෙ නිවාසං කප්පෙසුං.

4. අථ ඛො කස්සපගොත්තස්ස භික්ඛුනො එතදහොසි: “යො ඛො ඉමෙසං ආගන්තුකානං භික්ඛූනං ආගන්තුකකිලමථො සො පටිපස්සද්ධො. යෙපි මෙ ගොචරෙ අප්පකතඤ්ඤුනො, තෙ දානිමෙ ගොචරෙ පකතඤ්ඤුනො. දුක්කරං ඛො පන පරකුලෙසු යාවජීවං උස්සුක්කං කාතුං. විඤ්ඤත්ති ච මනුස්සානං අමනාපා. යන්නූනාහං න උස්සුක්කං කරෙය්යං යාගුයා ඛාදනීයෙ භත්තස්මි”න්ති. සො න උස්සුක්කං අකාසි යාගුයා ඛාදනීයෙ භත්තස්මිං.

5. අථ ඛො තෙසං ආගන්තුකානං භික්ඛූනං එතදහොසි: “පුබ්බෙ ඛ්වායං ආවුසො ආවාසිකො භික්ඛු නහානෙ උස්සුක්කං අකාසි: උස්සුක්කම්පි අකාසි යාගුයා ඛාදනීයෙ භත්තස්මිං. සො දානායං න උස්සුක්කං කරොති යාගුයා ඛාදනීයෙ භත්තස්මිං. දුට්ඨො දානායං ආවුසො, ආවාසිකො භික්ඛු. හන්ද මයං ආවුසො, ආවාසිකං භික්ඛුං උක්ඛිපාමා”ති.

6. අථ ඛො තෙ ආගන්තුකා භික්ඛූ සන්නිපතිත්වා කස්සපගොත්තං භික්ඛුං එතදවොචුං: “පුබ්බෙ ඛො ත්වං ආවුසො නහානෙ උස්සුක්කං කරොසි. උස්සුක්කම්පි කරොසි යාගුයා ඛාදනීයෙ භත්තස්මිං. සොදානි ත්වං න උස්සුක්කං කරොසි යාගුයා ඛාදනීයෙ භත්තස්මිං. ආපත්තිං ත්වං, ආවුසො, ආපන්නො. පස්සසෙතං ආපත්ති”න්ති. “නත්ථි මෙ ආවුසො ආපත්ති, යමහං පස්සෙය්ය”න්ති.

7. අථ ඛො තෙ ආගන්තුකා භික්ඛූ කස්සපගොත්තං භික්ඛුං ආපත්තියා අදස්සනෙ උක්ඛිපිංසු. අථ ඛො කස්සපගොත්තස්ස භික්ඛුනො එතදහොසි: “අහං ඛො එතං න ජානාමි - ආපත්ති වා එසා අනාපත්ති වා? ආපන්නො චම්හි අනාපන්නො වා? උක්ඛිත්තො චම්හි අනුක්ඛිත්තො වා ධම්මිකෙන වා අධම්මිකෙන වා කුප්පෙන වා අකුප්පෙන වා ඨානාරහෙන වා අට්ඨානාරහෙන වා? යන්නූනාහං චම්පං ගන්ත්වා භගවන්තං එතමත්ථං පුච්ඡෙය්ය”න්ති.

8. අථ ඛො කස්සපගොත්තො භික්ඛු සෙනාසනං සංසාමෙත්වා පත්තචීවරමාදාය යෙන චම්පා තෙන පක්කාමි. අනුපුබ්බෙන යෙන චම්පා යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි.

9. ආචිණ්ණං ඛො පනෙතං බුද්ධානං භගවන්තානං ආගන්තුකෙහි භික්ඛූහි සද්ධිං පටිසම්මොදිතුං. අථ ඛො භගවා කස්සපගොත්තං භික්ඛුං එතදවොච: “කච්චි භික්ඛු ඛමනීයං? කච්චි යාපනීයං? කච්චිසි අප්පකිලමථෙන අද්ධානං ආගතො? කුතො ච ත්වං භික්ඛු ආගච්ඡසී?”ති.

10. “ඛමනීයං භගවා. යාපනීයං භගවා. අප්පකිලමථෙන චාහං භන්තෙ අද්ධානං ආගතො. අත්ථි භන්තෙ කාසීසු ජනපදෙ වාසභගාමො නාම. තත්ථාහං ආවාසිකො තන්තිබද්ධො උස්සුක්කං ආපන්නො: “කින්ති අනාගතා ච පෙසලා භික්ඛූ ආගච්ඡෙය්යුං. ආගතා ච පෙසලා භික්ඛූ ඵාසු විහරෙය්යුං. අයඤ්ච ආවාසො වුද්ධිං විරූළ්හිං වෙපුල්ලං ආපජ්ජෙය්යා”ති.

11. “අථ ඛො භන්තෙ සම්බහුලා භික්ඛූ කාසීසු චාරිකං චරමානා යෙන වාසභගාමො තදවසරුං. අද්දසං ඛො අහං භන්තෙ, තෙ භික්ඛූ දූරතොව ආගච්ඡන්තෙ දිස්වාන ආසනං පඤ්ඤාපෙසිං. පාදොදකං පාදපීඨං පාදකඨලිකං උපනික්ඛිපිං. පච්චුග්ගන්ත්වා පත්තචීවරං පටිග්ගහෙසිං. පානීයෙන ආපුච්ඡිං. නහානෙ උස්සුක්කං අකාසිං. උස්සුක්කම්පි අකාසිං යාගුයා ඛාදනීයෙ භත්තස්මිං.

12. “අථ ඛො තෙසං භන්තෙ, ආගන්තුකානං භික්ඛූනං එතදහොසි: “භද්දකො ඛො අයං ආවුසො ආවාසිකො භික්ඛු නහානෙ උස්සුක්කං කරොති. උස්සුක්කම්පි කරොති යාගුයා ඛාදනීයෙ භත්තස්මිං. හන්ද මයං ආවුසො ඉධෙව වාසභගාමෙ නිවාසං කප්පෙමා”ති. අථ ඛො තෙ භන්තෙ, ආගන්තුකා භික්ඛූ තත්ථෙව වාසභගාමෙ නිවාසං කප්පෙසුං.

13. “තස්ස මය්හං භන්තෙ, එතදහොසි: “යො ඛො ඉමෙසං ආගන්තුකානං භික්ඛූනං ආගන්තුකකිලමථො සො පටිප්පස්සද්ධො. යෙපිමෙ ගොචරෙ අප්පකතඤ්ඤුනො තෙ’දානි’මෙ ගොචරෙ පකතඤ්ඤුනො. දුක්කරං ඛො පන පරකුලෙසු යාවජීවං උස්සුක්කං කාතුං. විඤ්ඤත්ති ච මනුස්සානං අමනාපා. යන්නූනාහං න උස්සුක්කං කරෙය්යං යාගුයා ඛාදනීයෙ භත්තස්මි”න්ති. සො ඛො අහං භන්තෙ, න උස්සුක්කං අකාසිං යාගුයා ඛාදනීයෙ භත්තස්මිං.