1. තෙන ඛො පන සමයෙන අඤ්ඤතරො භික්ඛු පරිවසන්තො විබ්භමි. සො පුන පච්චාගන්ත්වා භික්ඛූ උපසම්පදං යාචි. භගවතො එතමත්ථං ආරොචෙසුං.

2. (1) ඉධ පන භික්ඛවෙ භික්ඛු පරිවසන්තො විබ්භමති. විබ්භන්තකස්ස භික්ඛවෙ පරිවාසො න රූහති. සො චෙ පුන උපසම්පජ්ජති, තස්ස තදෙව පුරිමං පරිවාසදානං. යො පරිවාසො දින්නො, සුදින්නො. යො පරිවුත්ථො සුපරිවුත්ථො, අවසෙසො පරිවසිතබ්බො.

(2) ඉධ පන භික්ඛවෙ භික්ඛු පරිවසන්තො සාමණෙරො හොති. සාමණෙරස්ස භික්ඛවෙ පරිවාසො න රූහති. සො චෙ පුන උපසම්පජ්ජති, තස්ස තදෙව පුරිමං පරිවාසදානං. යො පරිවාසො දින්නො, සුදින්නො. යො පරිවුත්ථො සුපරිවුත්ථො, අවසෙසො පරිවසිතබ්බො.

3. (3) ඉධ පන භික්ඛවෙ භික්ඛු පරිවසන්තො උම්මත්තකො හොති. උම්මත්තකස්ස භික්ඛවෙ පරිවාසො න රූහති. සො චෙ පුන අනුම්මත්තකො හොති, තස්ස තදෙව පුරිමං පරිවාසදානං. යො පරිවාසො දින්නො, සුදින්නො යො පරිවුත්ථො, සුපරිවුත්ථො. අවසෙසො පරිවසිතබ්බො.

(4) ඉධ පන භික්ඛවෙ, භික්ඛු පරිවසන්තො ඛිත්තචිත්තො හොති. ඛිත්තචිත්තස්ස භික්ඛවෙ, පරිවාසො න රූහති. සො චෙ පුන අක්ඛිත්තචිත්තො හොති, තස්ස තදෙව පුරිමං පරිවාසදානං. යො පරිවාසො දින්නො, සුදින්නො. යො පුරිවුත්ථො සුපරිවුත්ථො, අවසෙසො පරිවසිතබ්බො.

(5) ඉධ පන, භික්ඛවෙ, භික්ඛු පරිවසන්තො වෙදනට්ටො හොති. වෙදනට්ටස්ස භික්ඛවෙ පරිවාසො න රූහති. සො චෙ පුන අවෙදනට්ටො හොති, තස්ස තදෙව පුරිමං පරිවාසදානං -පෙ-

4. (6) ඉධ පන භික්ඛවෙ භික්ඛු පරිවසන්තො ආපත්තියා අදස්සනෙ උක්ඛිපීයති. උක්ඛිත්තකස්ස භික්ඛවෙ පරිවාසො න රූහති. සො චෙ පුන ඔසාරීයති, තස්ස තදෙව පුරිමං පරිවාසදානං -පෙ-

(7) ඉධ පන භික්ඛවෙ භික්ඛු පරිවසන්තො ආපත්තියා අප්පටිකම්මෙ උක්ඛිපීයති. උක්ඛිත්තකස්ස භික්ඛවෙ පරිවාසො න රූහති. -පෙ-

(8) ඉධ පන භික්ඛවෙ භික්ඛු පරිවසන්තො පාපිකාය දිට්ඨියා අප්පටිනිස්සග්ගෙ උක්ඛිපීයති. උක්ඛිත්තකස්ස භික්ඛවෙ පරිවාසො න රූහති. සො චෙ පුන ඔසාරීයති, තස්ස තදෙව පුරිමං පරිවාසදානං. යො පරිවාසො දින්නො, සුදින්නො. යො පරිවුත්ථො සුපරිවුත්ථො. අවසෙසො පරිවසිතබ්බො.

5. (9-16) ඉධ පන භික්ඛවෙ භික්ඛු මූලායපටිකස්සනාරහො විබ්භමති. විබ්භන්තකස්ස භික්ඛවෙ මූලායපටිකස්සනා න රූහති. සො චෙ පුන උපසම්පජ්ජති, තස්ස තදෙව පුරිමං පරිවාසදානං. යො පරිවාසො දින්නො, සුදින්නො. යො පරිවුත්ථො, සුපරිවුත්ථො. සො භික්ඛු මූලාය පටිකස්සිතබ්බො. ඉධ පන භික්ඛවෙ භික්ඛු මූලායපටිකස්සනාරහො සාමණෙරො හොති -පෙ- උම්මත්තකො හොති -පෙ- ඛිත්තචිත්තො හොති -පෙ- වෙදනට්ටො හොති -පෙ- ආපත්තියා අදස්සනෙ උක්ඛිපීයති -පෙ- ආපත්තියා අප්පටිකම්මෙ උක්ඛිපීයති -පෙ- පාපිකාය දිට්ඨියා අප්පටිනිස්සග්ගෙ උක්ඛිපීයති. උක්ඛිත්තකස්ස භික්ඛවෙ මූලායපටිකස්සනා න රූහති. සො චෙ පුන ඔසාරීයති, තස්ස තදෙව පුරිමං පරිවාසදානං. යො පරිවාසො දින්නො, සුදින්නො. යො පරිවුත්ථො, සුපරිවුත්ථො. සො භික්ඛු මූලාය පටිකස්සිතබ්බො.

6. (17-24) ඉධ පන භික්ඛවෙ භික්ඛු මානත්තාරහො විබ්භමති. විබ්භන්තකස්ස භික්ඛවෙ මානත්තදානං න රූහති. සො චෙ පුන උපසම්පජ්ජති, තස්ස තදෙව පුරිමං පරිවාසදානං. යො පරිවාසො දින්නො, සුදින්නො. යො පරිවුත්ථො, සුපරිවුත්ථො. තස්ස භික්ඛුනො මානත්තං දාතබ්බං. ඉධ පන භික්ඛවෙ භික්ඛු මානත්තාරහො සාමණෙරො හොති -පෙ- උම්මත්තකො හොති -පෙ- ඛිත්තචිත්තො හොති -පෙ- වෙදනට්ටො හොති -පෙ- ආපත්තියා අදස්සනෙ උක්ඛිපීයති -පෙ- ආපත්තියා අප්පටිකම්මෙ උක්ඛිපීයති -පෙ- පාපිකාය දිට්ඨියා, අප්පටිනිස්සග්ගෙ උක්ඛිපීයති. උක්ඛිත්තකස්ස භික්ඛවෙ මානත්තදානං න රූහති. සො චෙ පුන ඔසාරීයති, තස්ස තදෙව පුරිමං පරිවාසදානං. යො පරිවාසො දින්නො, සුදින්නො. යො පරිවුත්ථො, සුපරිවුත්ථො. තස්ස භික්ඛුනො මානත්තං දාතබ්බං.

7. (25) ඉධ පන භික්ඛවෙ භික්ඛු මානත්තං චරන්තො විබ්භමති. විබ්භන්තකස්ස භික්ඛවෙ මානත්තචරියා න රූහති. සො චෙ පුන උපසම්පජ්ජති, තස්ස තදෙව පුරිමං පරිවාසදානං. යො පරිවාසො දින්නො, සුදින්නො. යො පරිවුත්ථො, සුපරිවුත්ථො. යං මානත්තං දින්නං සුදින්නං. යං මානත්තං චිණ්ණං, සුචිණ්ණං. අවසෙසං චරිතබ්බං.