1. තෙන ඛො පන සමයෙන අඤ්ඤතරො භික්ඛු සම්බහුලා සඞ්ඝාදිසෙසා ආපත්තියො ආපන්නො හොති. එකා ආපත්ති එකාහපටිච්ඡන්නා, එකා ආපත්ති ද්වීහපටිච්ඡන්නා, එකා ආපත්ති තීහපටිච්ඡන්නා, එකා ආපත්ති චතූහපටිච්ඡන්නා, එකා ආපත්ති පඤ්චාහපටිච්ඡන්නා, එකා ආපත්ති ඡාහපටිච්ඡන්නා, එකා ආපත්ති සත්තාහපටිච්ඡන්නා, එකා ආපත්ති අට්ඨාහපටිච්ඡන්නා, එකා ආපත්ති නවාහපටිච්ඡන්නා, එකා ආපත්ති දසාහපටිච්ඡන්නා.

2. සො භික්ඛූනං ආරොචෙසි: අහං ආවුසො සම්බහුලාසඞ්ඝාදිසෙසා ආපත්තියො ආපජ්ජිං. එකා ආපත්ති එකාහපටිච්ඡන්නා -පෙ- එකා ආපත්ති දසාහපටිච්ඡන්නා. කථං නු ඛො මයා පටිපජ්ජිතබ්බන්ති? භගවතො එතමත්ථං ආරොචෙසුං: තෙන හි භික්ඛවෙ සඞ්ඝො තස්ස භික්ඛුනො තාසං ආපත්තීනං යා ආපත්ති දසාහපටිච්ඡන්නා තස්සා අග්ඝෙන සමොධානපරිවාසං දෙතු. එවං ච පන භික්ඛවෙ දාතබ්බො: තෙන භික්ඛවෙ භික්ඛුනා සඞ්ඝං උපසඞ්කමිත්වා -පෙ- එවමස්ස වචනීයො: “අහං භන්තෙ සම්බහුලා සඞ්ඝාදිසෙසා ආපත්තියො ආපජ්ජිං. එකා ආපත්ති එකාහපටිච්ඡන්නා -පෙ- එකා ආපත්ති දසාහපටිච්ඡන්නා. සො’හං භන්තෙ සඞ්ඝං තාසං ආපත්තීනං යා ආපත්ති දසාහපටිච්ඡන්නා, තස්සා අග්ඝෙන සමොධානපරිවාසං යාචාමීති. දුතියම්පි යාචිතබ්බො. -පෙ- තතියම්පි යාචිතබ්බො. -පෙ-

3. ව්යත්තෙන භික්ඛුනා පටිබලෙන සඞ්ඝො ඤාපෙතබ්බො:

“සුණාතු මෙ භන්තෙ සඞ්ඝො: අයං ඉත්ථන්නාමො භික්ඛු සම්බහුලා සඞ්ඝාදිසෙසා ආපත්තියො ආපජ්ජි. එකා ආපත්ති එකාහපටිච්ඡන්නා -පෙ- එකා ආපත්ති දසාහපටිච්ඡන්නා. සො සඞ්ඝං තාසං ආපත්තීනං යා ආපත්ති දසාහපටිච්ඡන්නා, තස්සා අග්ඝෙන සමොධානපරිවාසං යාචති. යදි සඞ්ඝස්ස පත්තකල්ලං, සඞ්ඝො ඉත්ථන්නාමස්ස භික්ඛුනො තාසං ආපත්තීනං යා ආපත්ති දසාහපටිච්ඡන්නා, තස්සා අග්ඝෙන සමොධානපරිවාසං දදෙය්ය. එසා ඤත්ති.

සුණාතු මෙ භන්තෙ සඞ්ඝො: අයං ඉත්ථන්නාමො භික්ඛු සම්බහුලා සඞ්ඝාදිසෙසා ආපත්තියො ආපජ්ජි. එකා ආපත්ති එකාහපටිච්ඡන්නා -පෙ- එකා ආපත්ති දසාහපටිච්ඡන්නා. සො සඞ්ඝං තාසං ආපත්තීනං යා ආපත්ති දසාහපටිච්ඡන්නා, තස්සා අග්ඝෙන සමොධානපරිවාසං යාචති. සඞ්ඝො ඉත්ථන්නාමස්ස භික්ඛුනො තාසං ආපත්තීනං යා ආපත්ති දසාහපටිච්ඡන්නා තස්සා අග්ඝෙන සමොධානපරිවාසං දෙති. යස්සායස්මතො ඛමති ඉත්ථන්නාමස්ස භික්ඛුනො තාසං ආපත්තීනං යා ආපත්ති දසාහපටිච්ඡන්නා තස්සා අග්ඝෙන සමොධානපරිවාසස්ස දානං, සො තුණ්හස්ස. යස්ස නක්ඛමති සො භාසෙය්ය.

දුතියම්පි එතමත්ථං වදාමි -පෙ-. තතියම්පි එතමත්ථං වදාමි -පෙ-.

දින්නො සඞ්ඝෙන ඉත්ථන්නාමස්ස භික්ඛුනො තාසං ආපත්තීනං යා ආපත්ති දසාහපටිච්ඡන්නා, තස්සා අග්ඝෙන සමොධානපරිවාසො. ඛමති සඞ්ඝස්ස. තස්මා තුණ්හී. එවමෙතං ධාරයාමී”ති.