427. එකං සමයං භගවා කොලියෙසු විහරති උත්තරකං නාම කොලියානං නිගමො. අථ ඛො පාටලියො ගාමණි යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො පාටලියො ගාමණි භගවන්තං එතදවොච: සුතං මෙතං භන්තෙ “සමණො ගොතමො මායං ජානාතී”ති. යෙ තෙ භන්තෙ එවමාහංසු: “සමණො ගොතමෙ මායං ජානාතී”ති, කච්චි තෙ භන්තෙ භගවතො වුත්තවාදිනො, න ච භගවන්තං අභූතෙන අබ්භාචික්ඛන්ති, ධම්මස්ස චානුධම්මං ව්යාකරොන්ති, න ච කොචි සහධම්මිකො වාදානුපාතො ගාරය්හං ඨානං ආගච්ඡති, අනබ්භක්ඛාතුකාමා හි මයං භන්තෙ භගවන්තන්ති.

යෙ තෙ ගාමණි එවමාහංසු: “සමණො ගොතමො මායං ජානාතී”ති, වුත්තවාදිනො චෙව මෙ තෙ, න ච මං අභූතෙන අබ්භාචික්ඛන්ති, ධම්මස්ස චානුධම්මං ව්යාකරොන්ති, නච කොචි සහධම්මිකො වාදානුපාතො ගාරය්හං ඨානං ආගච්ඡතීති, සච්චං යෙව කිර භො මයං තෙසං සමණබ්රාහ්මණානං න සද්දහාම: සමණො ගොතමො මායං ජානාතීති, සමණො ඛලු භො ගොතමො මායාවීති. යොනු ඛො ගාමණි එවං වදෙති; “අහං මායං ජානාමී”ති, සො එවං වදෙති, “අහං මායාවී”ති. තථෙව තං භගවා හොති, තථෙව තං සුගත හොතීති. තෙන හි ගාමණි, තඤ්ඤෙවෙත්ථ පටිපුච්ඡිස්සාමි, යථා තෙ ඛමෙය්ය තථා නං ව්යාකරෙය්යාසි.

තං කිම්මඤ්ඤසි ගාමණි, ජානාසි ත්වං ගාමණි, කොලියානං ලම්බචූළකෙ භටෙති. ජානාමහං භන්තෙ කොලියානං ලම්බචූළකෙ භටෙති. තං කිම්මඤ්ඤසි ගාමණි කිමත්ථියා කොලියානං ලම්බචූළකා භටාති. යෙ ච භන්තෙ කොලියානං චොරා තෙ ච පටිසෙධෙතුං, යානි ච කොලියානං දූතෙය්යානි තානි වහාතුං, එතදත්ථාය භන්තෙ කොලියානං ලම්බචූළකා භටාති. තං කිම්මඤ්ඤසි ගාමණි, ජානාසි ත්වං කොලියානං ලම්බචූළකෙ භටෙ සීලවන්තෙ වා තෙ දුස්සීලෙ වාති. ජානාමහං භන්තෙ කොලියානං ලම්බචූළකෙ භටෙ දුස්සීලෙ පාපධම්මෙ, යෙ ච ලොකෙ දුස්සීලා පාපධම්මා කොලියානං ලම්බචූළකා භටා තෙසං අඤ්ඤතරාති.

යො නු ඛො ගාමණි එවං වදෙය්ය: “පාටලියො ගාමණි ජානාති කොලියානං ලම්බචූළකෙ භටෙ දුස්සීලෙ පාපධම්මෙ, පාටලියොපි ගාමණි දුස්සීලො පාපධම්මො”ති, සම්මා නු ඛො සො වදමානො වදෙය්යාති. නො හෙතං භන්තෙ, අඤ්ඤෙ භන්තෙ කොලියානං ලම්බචූළකා භටා, අඤ්ඤො’හමස්මි. අඤ්ඤථාධම්මා කොලියානං ලම්බචූළකා භටා, අඤ්ඤථාධම්මො’හමස්මීති. ත්වං හි ගාමණි ලච්ඡසි “පාටලියො ගාමණි ජානාති කොලියානං ලම්බචූළකෙ භටෙ දුස්සීලෙ පාපධම්මෙ, න ච පාටලියො ගාමණි දුස්සීලො පාපධම්මො”ති, කස්මා තථාගතො න ලච්ඡති “තථාගතො මායං ජානාති, න ච තථාගතො මායාවී”ති.

මායං චාහං ගාමණි පජානාමි මායාය ච විපාකං, යථා පටිපන්නො ච මායාවී කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති, තඤ්ච පජානාමි. පාණාතිපාතං චාහං ගාමණි පජානාමි පාණාතිපාතස්ස ච විපාකං, යථා පටිපන්නො ච පාණාතිපාතී කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති, තඤ්ච පජානාමි. අදින්නාදානං චාහං ගාමණි පජානාමි අදින්නාදානස්ස ච විපාකං, යථාපටිපන්නො ච අදින්නාදායී කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති, තඤ්ච පජානාමි. කාමෙසු මිච්ඡාචාරං චාහං ගාමණි පජානාමි, කාමෙසු මිච්ඡාචාරස්ස ච විපාකං, යථාපටිපන්නො ච කාමෙසු මිච්ඡාචාරී කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති, තඤ්ච පජානාමි.

මුසාවාදං චාහං ගාමණි පජානාමි මුසාවාදස්ස ච විපාකං, යථා පටිපන්නො ච මුසාවාදී කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති තඤ්ච පජානාමි. පිසුනාවාචං චාහං ගාමණි පජානාමි පිසුනාවාචාය ච විපාකං, යථාපටිපන්නො ච පිසුනාවාචො කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති, තඤ්ච පජානාමි. ඵරුසවාචං චාහං ගාමණි පජානාමි ඵරුසවාචාය ච විපාකං, යථාපටිපන්නො ච ඵරුසවාචො කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති, තඤ්ච පජානාමි. සම්ඵප්පලාපං චාහං ගාමණි පජානාමි සම්ඵප්පලාපස්ස ච විපාකං, යථාපටිපන්නො ච සම්ඵප්පලාපී කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති තඤ්ච පජානාමි.

අභිජ්ඣං චාහං ගාමණි පජානාමි අභිජ්ඣාය ච විපාකං, යථාපටිපන්නො ච අභිජ්ඣාලු කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති, තඤ්ච පජානාමි. ව්යාපාදපදොසඤ්චාහං ගාමණි පජානාමි ව්යාපාදපදොසස්ස ච විපාකං, යථාපටිපන්නො ච ව්යාපන්නචිත්තො කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති තඤ්ච පජානාමි. මිච්ඡාදිට්ඨිඤ්චාහං ගාමණි පජානාමි මිච්ඡාදිට්ඨියා ච විපාකං, යථාපටිපන්නො ච මිච්ඡාදිට්ඨිකො කායස්ස භෙදා පරම්මරණා අපායං දුග්ගතිං විනිපාතං නිරයං උපපජ්ජති, තඤ්ච පජානාමි.