381-388 අථ ඛො සන්තුසිතො දෙවපුත්තො -පෙ- ඵොට්ඨබ්බෙහීති.

389-396 අථ ඛො සුනිම්මිතො දෙවපුත්තො -පෙ- ඵොට්ඨබ්බෙහීති.

397-404 අථ ඛො වසවත්තී දෙවපුත්තො -පෙ- ඵොට්ඨබ්බෙහීති.

(යථා සක්කසුත්තානි තථා ඉමෙ සුත්තන්තාපි විත්ථාරෙතබ්බා).

405. එකං සමයං සම්බහුලා ථෙරා භික්ඛූ මච්ඡිකාසණ්ඩෙ විහරන්ති අම්බාටකවනෙ. තෙන ඛො පන සමයෙන සම්බහුලානං ථෙරානං භික්ඛූනං පච්ඡාභත්තං පිණ්ඩපාතපටික්කන්තානං මණ්ඩලමාලෙ සන්නිසින්නානං සන්නිපතිතානං අයමන්තරාකථා උදපාදි: සඤ්ඤොජනන්ති වා ආවුසො සඤ්ඤොජනියා ධම්මාති වා ඉමෙ ධම්මා නානත්ථා නානාව්යඤ්ජනා, උදාහු එකත්ථා ව්යඤ්ජනමෙව නානන්ති?

තත්රෙකච්චෙහි ථෙරෙහි භික්ඛූහි එවං ව්යාකතං හොති: “සඤ්ඤොජනන්ති වා ආවුසො සඤ්ඤොජනියා ධම්මාති වා ඉමෙ ධම්මා නානත්ථා චෙව නානාව්යඤ්ජනා චා”ති. එකච්චෙහි ථෙරෙහි භික්ඛූහි එවං ව්යාකතං හොති: සඤ්ඤොජනන්ති වා ආවුසො සඤ්ඤොජනියා ධම්මාති වා ඉමෙ ධම්මා එකත්ථා ව්යඤ්ජනමෙව නාන”න්ති.

තෙන ඛො පන සමයෙන චිත්තො ගහපති මිගපථකං අනුප්පත්තො හොති කෙනචිදෙව කරණීයෙන. අස්සොසි ඛො චිත්තො ගහපති සම්බහුලානං කිර ථෙරානං භික්ඛූනං පච්ඡාභත්තං පිණ්ඩපාතපටික්කන්තානං මණ්ඩලමාලෙ සන්නිසින්නානං සන්නිපතිතානං අයමන්තරාකථා උදපාදි: “සඤ්ඤොජනන්ති වා ආවුසො සඤ්ඤොජනියා ධම්මාති වා ඉමෙ ධම්මා නානත්ථා නානාව්යඤ්ජනා, උදාහු එකත්ථා ව්යඤ්ජනමෙව නානන්ති? තත්රෙකච්චෙහි ථෙරෙහි භික්ඛූහි එවං ව්යාකතං: සඤ්ඤොජනන්ති වා ආවුසො සඤ්ඤොජනියා ධම්මාති වා ඉමෙ ධම්මා නානත්ථා චෙව නානාව්යඤ්ජනා චා”ති. එකච්චෙහි ථෙරෙහි භික්ඛූහි එවං ව්යාකතං: සඤ්ඤොජනන්ති වා ආවුසො සඤ්ඤොජනියා ධම්මාති වා ඉමෙ ධම්මා එකත්ථා ව්යඤ්ජනමෙව නානන්ති”. අථ ඛො චිත්තො ගහපති යෙන ථෙරා භික්ඛූ තෙනුපසඞ්කමි, උපසඞ්කමිත්වා ථෙරෙ භික්ඛූ අභිවාදෙත්වා එකමන්තං නිසීදි. එකමන්තං නිසින්නො ඛො චිත්තො ගහපති ථෙරෙ භික්ඛූ එතදවොච: