4. 1. 4.
කිමත්ථියසුත්තං
319. කිමත්ථියං ආවුසො සාරිපුත්ත, සමණෙ ගොතමෙ බ්රහ්මචරියං වුස්සතීති. දුක්ඛස්ස ඛො ආවුසො, පරිඤ්ඤත්ථං භගවති බ්රහ්මචරියං වුස්සතීති. අත්ථි පනාවුසො මග්ගො අත්ථි පටිපදා එතස්ස දුක්ඛස්ස පරිඤ්ඤායාති. අත්ථි ඛො ආවුසො මග්ගො අත්ථි පටිපදා එතස්ස දුක්ඛස්ස පරිඤ්ඤායාති. කතමො පනාවුසො මග්ගො කතමා පටිපදා එතස්ස දුක්ඛස්ස පරිඤ්ඤායාති. අයමෙව ඛො ආවුසො අරියො අට්ඨඞ්ගිකො මග්ගො එතස්ස දුක්ඛස්ස පරිඤ්ඤාය, සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතස්ස දුක්ඛස්ස පරිඤ්ඤායාති. භද්දකො ආවුසො මග්ගො භද්දිකා පටිපදා එතස්ස දුක්ඛස්ස පරිඤ්ඤාය. අලඤ්ච පනාවුසො සාරිපුත්ත අප්පමාදායාති.
4. 1. 5.
අස්සාසසුත්තං
320. අස්සාසප්පත්තො අස්සාසප්පත්තොති ආවුසො සාරිපුත්ත වුච්චති. කිත්තාවතා නු ඛො ආවුසො සාරිපුත්ත අස්සාසප්පත්තො හොතීති. යතො ඛො ආවුසො භික්ඛු ඡන්නං ඵස්සායතනානං සමුදයඤ්ච අත්ථගමඤ්ච අස්සාදඤ්ච ආදීනවඤ්ච නිස්සරණඤ්ච යථාභූතං පජානාති, එත්තාවතා ඛො ආවුසො අස්සාසප්පත්තො හොතීති. අත්ථි පනාවුසො මග්ගො අත්ථි පටිපදා එතස්ස අස්සාසස්ස සච්ඡිකිරියායාති. අත්ථි ඛො ආවුසො මග්ගො අත්ථි පටිපදා එතස්ස අස්සාසස්ස සච්ඡිකිරියායාති.
කතමො පනාවුසො මග්ගො කතමා පටිපදා එතස්ස අස්සාසස්ස සච්ඡිකිරියායාති. අයමෙව ඛො ආවුසො අරියො අට්ඨඞ්ගිකො මග්ගො එතස්ස අස්සාසස්ස සච්ඡිකිරියාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතස්ස අස්සාසස්ස සච්ඡිකිරියායාති. භද්දකො ආවුසො මග්ගො භද්දිකා පටිපදා එතස්ස අස්සාසස්ස සච්ඡිකිරියාය. අලඤ්ච පනාවුසො සාරිපුත්ත, අප්පමාදායාති.
4. 1. 6.
පරමස්සාසසුත්තං
321. පරමස්සාසප්පත්තො පරමස්සාසප්පත්තොති ආවුසො සාරිපුත්ත, වුච්චති. කිත්තාවතා නු ඛො ආවුසො සාරිපුත්ත, පරමස්සාසප්පත්තො හොතීති. යතො ඛො ආවුසො භික්ඛු ඡන්නං ඵස්සායතනානං සමුදයඤ්ච අත්ථගමඤ්ච අස්සාදඤ්ච ආදීනවඤ්ච නිස්සරණඤ්ච යථාභූතං විදිත්වා අනුපාදා විමුත්තො හොති, එත්තාවතා ඛො ආවුසො පරමස්සාසප්පත්තො හොතීති. අත්ථි පනාවුසො මග්ගො අත්ථි පටිපදා එතස්ස පරමස්සාසස්ස සච්ඡිකිරියායාති. අත්ථි ඛො ආවුසො මග්ගො අත්ථි පටිපදා එතස්ස පරමස්සාසස්ස සච්ඡිකිරියායාති.
කතමො පනාවුසො මග්ගො කතමා පටිපදා එතස්ස පරමස්සාසස්ස සච්ඡිකිරියායාති. අයමෙව ඛො ආවුසො අරියො අට්ඨඞ්ගිකො මග්ගො එතස්ස පරමස්සාසස්ස සච්ඡිකිරියාය. සෙය්යථිදං: සම්මාදිට්ඨි -පෙ- සම්මාසමාධි. අයං ඛො ආවුසො මග්ගො අයං පටිපදා එතස්ස පරමස්සාසස්ස සච්ඡිකිරියායාති. භද්දකො ආවුසො මග්ගො භද්දිකා පටිපදා එතස්ස පරමස්සාසස්ස සච්ඡිකිරියාය. අලඤ්ච පනාවුසො සාරිපුත්ත අප්පමාදායාති.