2. වෙදනාසංයුත්තං
1. සගාථාවග්ගො
1. 20. 1.
සමාධිසුත්තං
249. තිස්සො ඉමා භික්ඛවෙ වෙදනා. කතමා තිස්සො: සුඛා වෙදනා දුක්ඛා වෙදනා අදුක්ඛමසුඛා වෙදනා. ඉමා ඛො භික්ඛවෙ තිස්සො වෙදනාති.
සමාහිතො සම්පජානො සතො බුද්ධස්ස සාවකො
වෙදනා ච පජානාති වෙදනානඤ්ච සම්භවං.
යත්ථ චෙතා නිරුජ්ඣන්ති මග්ගඤ්ච ඛයගාමිනං
වෙදනානං ඛයා භික්ඛු නිච්ඡාතො පරිනිබ්බුතොති.
වෙදනා ච පජානාති වෙදනානඤ්ච සම්භවං.
යත්ථ චෙතා නිරුජ්ඣන්ති මග්ගඤ්ච ඛයගාමිනං
වෙදනානං ඛයා භික්ඛු නිච්ඡාතො පරිනිබ්බුතොති.
1. 20. 2.
සුඛසුත්තං
250. තිස්සො ඉමා භික්ඛවෙ වෙදනා. කතමා තිස්සො: සුඛා වෙදනා, දුක්ඛා වෙදනා, අදුක්ඛමසුඛා වෙදනා. ඉමා ඛො භික්ඛවෙ, තිස්සො වෙදනාති.
සුඛං වා යදි වා දුක්ඛං අදුක්ඛමසුඛං සහ
අජ්ඣත්තඤ්ච බහිද්ධා ච යං කිඤ්චි අත්ථි වෙදිතං
එතං දුක්ඛන්ති ඤත්වාන, මොසධම්මං පලොකිතං
ඵුස්ස ඵුස්ස වයම්පස්සං එවං තත්ථ විරජ්ජතීති.
අජ්ඣත්තඤ්ච බහිද්ධා ච යං කිඤ්චි අත්ථි වෙදිතං
එතං දුක්ඛන්ති ඤත්වාන, මොසධම්මං පලොකිතං
ඵුස්ස ඵුස්ස වයම්පස්සං එවං තත්ථ විරජ්ජතීති.
1. 20. 3.
පහානසුත්තං
250. තිස්සො ඉමා භික්ඛවෙ වෙදනා. කතමා තිස්සො: සුඛා වෙදනා දුක්ඛා වෙදනා අදුක්ඛමසුඛාවෙදනා. සුඛාය භික්ඛවෙ වෙදනාය රාගානුසයො පහාතබ්බො, දුක්ඛාය වෙදනාය පටිඝානුසයො පහාතබ්බො, අදුක්ඛමසුඛාය වෙදනාය අවිජ්ජානුසයො පහාතබ්බො. යතො ඛො භික්ඛවෙ, භික්ඛුනො සුඛාය වෙදනාය රාගානුසයො පහීනො හොති, දුක්ඛාය වෙදනාය පටිඝානුසයො පහීනො හොති, අදුක්ඛමසුඛාය වෙදනාය අවිජ්ජානුසයො පහීනො හොති, අයං වුච්චති භික්ඛවෙ භික්ඛු පහීනරාගානුසයො අච්ඡෙච්ඡි තණ්හං, වාවත්තයී සඤ්ඤොජනං සම්මාමානාභිසමයා අන්තමකාසි දුක්ඛස්සාති.
සුඛං වෙදියමානස්ස වෙදනං අප්පජානතො
සො රාගානුසයො හොති අනිස්සරණදස්සිනො.
සො රාගානුසයො හොති අනිස්සරණදස්සිනො.
දුක්ඛං වෙදියමානස්ස වෙදනං අප්පජානතො
පටිඝානුසයො හොති අනිස්සරණදස්සිනො.
පටිඝානුසයො හොති අනිස්සරණදස්සිනො.
අදුක්ඛමසුඛං සන්තං භූරිපඤ්ඤෙන දෙසිතං
තං චාපි අභිනන්දන්තො නෙව දුක්ඛා පමුච්චති.
තං චාපි අභිනන්දන්තො නෙව දුක්ඛා පමුච්චති.
යතො වා භික්ඛු ආතාපී සම්පජඤ්ඤං න රිඤ්චති
තතො සො වෙදනා සබ්බා පරිජානාති පණ්ඩිතො.
තතො සො වෙදනා සබ්බා පරිජානාති පණ්ඩිතො.
සො වෙදනා පරිඤ්ඤාය දිට්ඨෙ ධම්මෙ අනාසවො
කායස්ස භෙදා ධම්මට්ඨො සඞ්ඛං නොපෙති වෙදගූති.
කායස්ස භෙදා ධම්මට්ඨො සඞ්ඛං නොපෙති වෙදගූති.
1. 20. 4.
පාතාලසුත්තං
252. අස්සුතවා භික්ඛවෙ පුථුජ්ජනො එවං වාචං භාසති: ‘අත්ථි මහාසමුද්දෙ පාතාලො’ති. තං ඛො පනෙතං භික්ඛවෙ අස්සුතවා පුථුජ්ජනො අසන්තං අවිජ්ජමානං එවං වාචං භාසති: ‘අත්ථි මහාසමුද්දෙ පාතාලො’ති. සාරීරිකානං ඛො එතං භික්ඛවෙ දුක්ඛානං වෙදනානං අධිවචනං යදිදං පාතාලොති. අස්සුතවා භික්ඛවෙ පුථුජ්ජනො සාරීරිකාය දුක්ඛාය වෙදනාය ඵුට්ඨො සමානො සොචති කිලමති පරිදෙවති උරත්තාළිං කන්දති. සම්මොහං ආපජ්ජති. අයං වුච්චති භික්ඛවෙ අස්සුතවා පුථුජ්ජනො පාතාලෙ න පච්චුට්ඨාසි, ගාධඤ්ච නාජ්ඣගා. සුතවා භික්ඛවෙ අරියසාවකො සාරීරිකාය දුක්ඛාය වෙදනාය ඵුට්ඨො සමානො න සොචති, න කිලමති, න පරිදෙවති, න උරත්තාළිං කන්දති, න සම්මොහං ආපජ්ජති. අයං වුච්චති භික්ඛවෙ, සුතවා අරියසාවකො පාතාලෙ පච්චුට්ඨාසි, ගාධඤ්ච අජ්ඣගාති.
යො එතා නාධිවාසෙති උප්පන්නා වෙදනා දුඛා
සාරීරිකා පාණහරා යාහි ඵුට්ඨො පවෙධති.
සාරීරිකා පාණහරා යාහි ඵුට්ඨො පවෙධති.
අක්කන්දති පරොදති දුබ්බලො අප්පථාමකො
න සො පාතාලෙ පච්චුට්ඨාසි අථො ගාධම්පි නාජ්ඣගා.
න සො පාතාලෙ පච්චුට්ඨාසි අථො ගාධම්පි නාජ්ඣගා.
යො චෙතා අධිවාසෙති උප්පන්නා වෙදනා දුඛා
සාරීරිකා පාණහරා යාහි ඵුට්ඨො න වෙධති
ස වෙ පාතාලෙ පච්චුට්ඨාසි අථො ගාධම්පි අජ්ඣගාති.
සාරීරිකා පාණහරා යාහි ඵුට්ඨො න වෙධති
ස වෙ පාතාලෙ පච්චුට්ඨාසි අථො ගාධම්පි අජ්ඣගාති.