246. යස්ස කස්ස චි භික්ඛවෙ භික්ඛුස්ස වා භික්ඛුනියා වා චක්ඛුවිඤ්ඤෙය්යෙසු රූපෙසු උප්පජ්ජෙය්ය ඡන්දො වා රාගො වා දොසො වා මොහො වා පටිඝං වා චෙතසො, තතො චිත්තං නිවාරයෙ, සභයො චෙසො මග්ගො සප්පටිභයො ච සකණ්ටකො ච සගහනො ච උම්මග්ගො ච කුම්මග්ගො ච දුහිතිකො ච. අසප්පුරිසසෙවිතො චෙසො මග්ගො න චෙසො මග්ගො සප්පුරිසෙහි සෙවිතො. න ත්වං අරහසීති තතො චිත්තං නිවාරයෙ චක්ඛුවිඤ්ඤෙය්යෙහි රූපෙහි.

යස්ස කස්සචි භික්ඛවෙ භික්ඛුස්ස වා භික්ඛුනියා වා සොතවිඤ්ඤෙය්යෙසු සද්දෙසු -පෙ- ඝානවිඤ්ඤෙය්යෙසු ගන්ධෙසු -පෙ- ජිව්හාවිඤ්ඤෙය්යෙසු රසෙසු -පෙ- කායවිඤ්ඤෙය්යෙසු ඵොට්ඨබ්බෙසු -පෙ- මනොවිඤ්ඤෙය්යෙසු ධම්මෙසු උප්පජ්ජෙය්ය ඡන්දො වා රාගො වා දොසො වා මොහො වා පටිඝං වා චෙතසො, තතො චිත්තං නිවාරයෙ. සභයො චෙසො මග්ගො සප්පටිභයො ච සකණ්ටකො ච සගහනො ච උම්මග්ගො ච කුම්මග්ගො ච දුහිතිකො ච. අසප්පුරිසසෙවිතො චෙසො මග්ගො, න චෙසො මග්ගො සප්පුරිසෙහි සෙවිතො. න ත්වං එතං අරහසීති. තතො චිත්තං නිවාරයෙ මනො විඤ්ඤෙය්යෙහි ධම්මෙහි.

සෙය්යථාපි භික්ඛවෙ කිට්ඨං සම්පන්නං, කිට්ඨරක්ඛකොච පමත්තො ගොණො ච කිට්ඨාදො අදුං කිට්ඨං ඔතරිත්වා යාවදත්ථං මදං ආපජ්ජෙය්ය, එවමෙව ඛො භික්ඛවෙ අස්සුතවා පුථුජ්ජනො ඡසු ඵස්සායතනෙසු අසංවුතකාරී පඤ්චසු කාමගුණෙසු යාවදත්ථං මදං ආපජ්ජති. සෙය්යථාපි භික්ඛවෙ කිට්ඨං සම්පන්නං කිට්ඨරක්ඛකො ච අප්පමත්තො ගොණො ච කිට්ඨාදො අදුං කිට්ඨං ඔතරෙය්ය තමෙනං කිට්ඨරක්ඛකො නාසාය සුග්ගහීතං ගණ්හෙය්ය. නාසාය සුග්ගහිතං ගහෙත්වා උපරිඝටායං සුනිග්ගහිතං නිග්ගණ්හෙය්ය. උපරිඝටායං සුනිග්ගහිතං නිග්ගහෙත්වා දණ්ඩෙන සුතාළිතං තාළෙය්ය. දණ්ඩෙන සුතාළිතං තාළෙත්වා ඔසජ්ජෙය්ය,

දුතියම්පි ඛො භික්ඛවෙ -පෙ- තතියම්පි ඛො භික්ඛවෙ ගොණො කිට්ඨාදො අදුං කිට්ඨං ඔතරෙය්ය. තමෙනං කිට්ඨරක්ඛකො නාසාය සුග්ගහිතං ගණ්හෙය්ය. නාසාය සුග්ගහිතං ගහෙත්වා උපරිඝටායං සුනිග්ගහිතං නිග්ගණ්හෙය්ය. උපරිඝටායං සුනිග්ගහිතං නිග්ගහෙත්වා දණ්ඩෙන සුතාළිතං තාළෙය්ය. දණ්ඩෙන සුතාළිතං තාළෙත්වා ඔස්සජෙය්ය. එවං හි සො භික්ඛවෙ ගොණො කිට්ඨාදො ගාමගතො වා අරඤ්ඤගතො වා ඨාන බහුලො අස්ස නිසජ්ජබහුලො, න තං කිට්ඨං පුන ඔතරෙය්ය. තමෙව පුරිමං දණ්ඩසම්ඵස්සං සමනුස්සරන්තො. එවමෙව ඛො භික්ඛවෙ යතො භික්ඛුනො ඡසු ඵස්සායතනෙසු චිත්තං උදුජ්ජිතං හොති සුදුජ්ජිතං අජ්ඣත්තං සන්තිට්ඨති, සන්නිසීදති, එකොදි හොති, සමාධියති.

සෙය්යථාපි භික්ඛවෙ රඤ්ඤො වා රාජමහාමත්තස්ස වා වීණාය සද්දො අස්සුතපුබ්බො අස්ස. සො වීණාසද්දං සුණෙය්ය. සො එවං වදෙය්ය: “අම්භො, කිස්සනුඛො එසො සද්දො එවං රජනීයො එවං කමනීයො එවං මදනීයො එවං මුච්ඡනීයො එවංබන්ධනීයො”ති? තමෙනං එවං වදෙය්යුං: “එසා ඛො භන්තෙ වීණා නාම යස්සා එසො සද්දො එවං රජනීයො එවං කමනීයො එවං මදනීයො එවං මුච්ඡනීයො එවං බන්ධනීයො”ති.

සො එවං වදෙය්ය: “ගච්ඡථ මෙ භො තං වීණං ආහරථා”ති. තස්ස තං වීණං ආහරෙය්යුං. තමෙනං එවං වදෙය්යුං: “අයං ඛො සා භන්තෙ, වීණා යස්සා එසො සද්දො එවං රජනීයො එවං කමනීයො එවං මදනීයො එවං මුච්ඡනීයො එවං බන්ධනීයො”ති. සො එවං වදෙය්ය: “අලං මෙ භො තාය වීණාය, තමෙව මෙ සද්දං ආහරථා”ති.