234. එකං සමයං ආයස්මා ච ආනන්දො, ආයස්මා ච උදායී කොසම්බියං විහරන්ති ඝොසිතාරාමෙ. අථ ඛො ආයස්මා උදායී සායන්හසමයං පටිසල්ලානා වුට්ඨිතො යෙනායස්මා ආනන්දො තෙනුපසඞ්කමි. උපසඞ්කමිත්වා ආයස්මතා ආනන්දෙන සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො ආයස්මා උදායී ආයස්මන්තං ආනන්දං එතදවොච:

යථෙව නු ඛො ආවුසො ආනන්ද, අයං කායො භගවතා අනෙකපරියායෙන අක්ඛාතො විවටො පකාසිතො, ඉතිපායං කායො අනත්තාති. සක්කා එවමෙවං විඤ්ඤාණම්පිදං ආචික්ඛිතුං දෙසෙතුං පඤ්ඤාපෙතුං පට්ඨපෙතුං විවරිතුං විභජිතුං උත්තානීකාතුං ඉතිපිදං විඤ්ඤාණං අනත්තාති.

යථෙව ඛො ආවුසො උදායී අයං කායො භගවතා අනෙක පරියායෙන අක්ඛාතො විවටො පකාසිතො, ඉතිපායං කායො අනත්තාති, සක්කා එවමෙව විඤ්ඤාණම්පිදං ආචික්ඛිතුං දෙසෙතුං පඤ්ඤාපෙතුං පට්ඨපෙතුං විවරිතුං විභජිතුං උත්තානීකාතුං ඉතිපිදං විඤ්ඤාණං අනත්තාති.

චක්ඛුඤ්චාවුසො පටිච්ච රූපෙ චුප්පජ්ජති චක්ඛුවිඤ්ඤාණන්ති, එවමාවුසොති. යො චාවුසො හෙතු යො ච පච්චයො චක්ඛුවිඤ්ඤාණස්ස උප්පාදාය සො ච හෙතු සො ච පච්චයො සබ්බෙන සබ්බං සබ්බථා සබ්බං අපරිසෙසා නිරුජ්ඣෙය්ය, අපි නු ඛො චක්ඛු විඤ්ඤාණං පඤ්ඤායෙථාති. නො හෙතං ආවුසො. ඉමිනාපි ඛො එතං ආවුසො පරියායෙන භගවතා අක්ඛාතං විවටං පකාසිතං: ඉතිපිදං විඤ්ඤාණං අනත්තාති. -පෙ-

ජිව්හඤ්චාවුසො පටිච්ච රසෙ චුප්පජ්ජති ජිව්හාවිඤ්ඤාණන්ති. එවමාවුසොති. යො චාවුසො හෙතු යො ච පච්චයො ජිව්හා විඤ්ඤාණස්ස උප්පාදාය, සො ච හෙතු සො ච පච්චයො සබ්බෙන සබ්බං සබ්බථා සබ්බං අපරිසෙසා නිරුජ්ඣෙය්ය, අපිනු ඛො ජිව්හාවිඤ්ඤාණං පඤ්ඤායෙථාති. නො හෙතං ආවුසො. ඉමිනාපි ඛො එතං ආවුසො පරියායෙන භගවතා අක්ඛාතං විවටං පකාසිතං ඉතිපිදං විඤ්ඤාණං අනත්තාති -පෙ-

මනඤ්චාවුසො පටිච්ච ධම්මෙ චුප්පජ්ජති මනොවිඤ්ඤාණන්ති. එවමාවුසොති. යො චාවුසො හෙතු යො ච පච්චයො මනොවිඤ්ඤාණස්ස උප්පාදාය, සො ච හෙතු සො ච පච්චයො සබ්බෙන සබ්බං සබ්බථා සබ්බං අපරිසෙසා නිරුජ්ඣෙය්ය. අපි නු ඛො මනොවිඤ්ඤාණං පඤ්ඤායෙථාති. නො හෙතං ආවුසො. ඉමිනාපි ඛො එතං ආවුසො පරියායෙන භගවතා අක්ඛාතං විවටං පකාසිතං ඉතිපිදං විඤ්ඤාණං අනත්තාති.

සෙය්යථාපි ආවුසො පුරිසො සාරත්ථිකො සාරගවෙසී සාරපරියෙසනං චරමානො තිණ්හං කුඨාරිං ආදාය වනං පවිසෙය්ය. සො තත්ථ පස්සෙය්ය මහන්තං කදලික්ඛන්ධං උජුකං නවං අකුක්කුකජාතං. තමෙනං මූලෙ ඡින්දෙය්ය මූලෙ ඡෙත්වා අග්ගෙ ඡින්දෙය්ය අග්ගෙ ඡෙත්වා පත්තං වට්ටිං විනිබ්භුජෙය්ය, සො තත්ථ ඵෙග්ගුම්පි නාධිගච්ඡෙය්ය, කුතො සාරං.

එවමෙව ඛො ආවුසො භික්ඛු ඡස්සු ඵස්සායතනෙසු නෙව අත්තානං නානත්තනියං සමනුපස්සති. සො එවං අසමනුපස්සන්තො න කිඤ්චි ලොකෙ උපාදියති. අනුපාදියං න පරිතස්සති. අපරිතස්සං පච්චත්තඤ්ඤෙව පරිනිබ්බායති. ඛීණා ජාති, වුසිතං බ්රහ්මචරියං, කතං කරණීයං, නාපරං ඉත්ථත්තායාති පජානාතීති.