1. 17. 59.
බාහිරායතන දුක්ඛසුත්තං
226. රූපා භික්ඛවෙ දුක්ඛා. සද්දා -පෙ- ගන්ධා -පෙ- රසා -පෙ- ඵොට්ඨබ්බා -පෙ- ධම්මා දුක්ඛා. එවං පස්සං භික්ඛවෙ සුතවා අරියසාවකො රූපෙසුපි නිබ්බින්දති -පෙ- නාපරං ඉත්ථත්තායාති පජානාතීති.
1. 17. 60.
බාහිරායතන අනත්තසුත්තං
227. රූපා භික්ඛවෙ අනත්තා. සද්දා -පෙ- ගන්ධා -පෙ- රසා -පෙ- ඵොට්ඨබ්බා -පෙ- ධම්මා අනත්තා. එවං පස්සං භික්ඛවෙ සුතවා අරියසාවකො රූපෙසුපි නිබ්බින්දති -පෙ- නාපරං ඉත්ථත්තායාති පජානාතීති.
සට්ඨිපෙය්යාලො සමත්තො.
තත්රුද්දානං:
ඡන්දෙනට්ඨාරස හොන්ති අතීතෙන ච ද්වෙ නව
යදනිච්චාට්ඨාරස වුත්තා තයො අජ්ඣත්තබාහිරා
පෙය්යාලො සට්ඨිකො වුත්තො බුද්ධෙනාදිච්චබන්ධුනාති.
18. සමුද්දවග්ගො
1. 18. 1.
සමුද්දසුත්තං
228. සමුද්දො සමුද්දොති භික්ඛවෙ, අස්සුතවා පුථුජ්ජනො භාසති. නෙසො භික්ඛවෙ, අරියස්ස විනයෙ සමුද්දො. මහා එසො භික්ඛවෙ, උදකරාසි, මහාඋදකණ්ණවො. චක්ඛු භික්ඛවෙ, පුරිසස්ස සමුද්දො, තස්ස රූපමයො වෙගො. යො තං රූපමයං වෙගං සහති, අයං වුච්චති භික්ඛවෙ, අතරි චක්ඛු සමුද්දං සඌමිං සාවට්ටං සගාහං සරක්ඛසං තිණ්ණො පාරගතො ථලෙ තිට්ඨති බ්රාහ්මණො.
සොතං -පෙ- ඝානං -පෙ- ජිව්හා භික්ඛවෙ, පුරිසස්ස සමුද්දො, තස්ස රසමයො වෙගො. යො තං රසමයං වෙගං සහති, අයං වුච්චති භික්ඛවෙ, අතරි ජිව්හාසමුද්දං සඌමිං සාවට්ටං සගාහං සරක්ඛසං තිණ්ණො පාරගතො ථලෙ තිට්ඨති බ්රාහ්මණො. කායං -පෙ- මනො භික්ඛවෙ, පුරිසස්ස සමුද්දො, තස්ස ධම්මමයො වෙගො. යො තං ධම්මමයං වෙගං සහති, අයං වුච්චති භික්ඛවෙ, අතරි මනොසමුද්දං සඌමිං සාවට්ටං සගාහං සරක්ඛසං තිණ්ණො පාරගතො ථලෙ තිට්ඨති බ්රාහ්මණො.
යො ඉමං සමුද්දං සගාහං
සරක්ඛසං සඌමිභයං දුත්තරං අච්චතරි
ස වෙදගූ වුසිතබ්රහ්මචරියො
ලොකන්තගූ පාරගතොති වුච්චතීති.
1. 18. 2.
දුතියසමුද්දසුත්තං
229. සමුද්දො සමුද්දොති භික්ඛවෙ, අස්සුතවා පුථුජ්ජනො භාසති. නෙසො භික්ඛවෙ, අරියස්ස විනයෙ සමුද්දො. මහා එසො භික්ඛවෙ, උදකරාසි මහා උදකණ්ණවො. සන්ති භික්ඛවෙ, චක්ඛුවිඤ්ඤෙය්යා රූපා ඉට්ඨා කන්තා මනාපා පියරූපා කාමූපසංහිතා රජනීයා. අයං වුච්චති භික්ඛවෙ, අරියස්ස විනයෙ සමුද්දො.