1. 16. 12.
අත්තානුදිට්ඨිප්පහානසුත්තං
167. සාවත්ථියං–
එකමන්තං නිසින්නො ඛො සො භික්ඛු භගවන්තං එතදවොච: කථන්නුඛො භන්තෙ ජානතො කථං පස්සතො අත්තානුදිට්ඨි පහීයතීති?
චක්ඛුං ඛො භික්ඛු අනත්තතො ජානතො පස්සතො අත්තානුදිට්ඨි පහීයති. රූපෙ අනත්තතො ජානතො පස්සතො අත්තානුදිට්ඨි පහීයති. චක්ඛුවිඤ්ඤාණං අනත්තතො ජානතො පස්සතො අත්තානුදිට්ඨි පහීයති. චක්ඛුසම්ඵස්සං අනත්තතො ජානතො පස්සතො අත්තානුදිට්ඨි පහීයති. යම්පිදං චක්ඛුසම්ඵස්සපච්චයා උප්පජ්ජති වෙදයිතං සුඛං වා දුක්ඛං වා අදුක්ඛමසුඛං වා, තම්පි අනත්තතො ජානතො පස්සතො අත්තානුදිට්ඨි පහීයති.
සොතං -පෙ- ඝානං -පෙ- ජිව්හං -පෙ- කායං -පෙ- මනං අනත්තතො ජානතො පස්සතො අත්තානුදිට්ඨි පහීයති. ධම්මෙ අනත්තතො -පෙ- මනොවිඤ්ඤාණං අනත්තතො -පෙ- මනොසම්ඵස්සො අනත්තතො -පෙ- යම්පිදං මනොසම්ඵස්සපච්චයා උප්පජ්ජති වෙදයිතං සුඛං වා දුක්ඛං වා අදුක්ඛමසුඛං වා තම්පි අනත්තතො ජානතො පස්සතො අත්තානුදිට්ඨි පහීයති. එවං ඛො භික්ඛු ජානතො එවං පස්සතො අත්තානුදිට්ඨි පහීයතීති.
නන්දික්ඛයවග්ගො සොළසමො.
තත්රුද්දානං:
නන්දික්ඛයෙන චත්තාරො - ජීවකම්බවනෙ දුවෙ
කොට්ඨිතෙන තයො වුත්තා - මිච්ඡාසක්කාය අත්තනොති.
17. සට්ඨිපෙය්යාලො
1. 17. 1.
අනිච්චඡන්දසුත්තං
168. සාවත්ථියං–
යං භික්ඛවෙ අනිච්චං, තත්ර වො ඡන්දො පහාතබ්බො. කිඤ්ච භික්ඛවෙ අනිච්චං: චක්ඛුං භික්ඛවෙ අනිච්චං, තත්ර වො ඡන්දො පහාතබ්බො. සොතං අනිච්චං -පෙ- ඝානං අනිච්චං -පෙ- ජිව්හා අනිච්චා -පෙ- කායො අනිච්චො -පෙ- මනො අනිච්චො, තත්ර වො ඡන්දො පහාතබ්බො. යං භික්ඛවෙ අනිච්චං, තත්ර වො ඡන්දො පහාතබ්බොති.
1. 17. 2.
අනිච්චරාගසුත්තං
169. යං භික්ඛවෙ අනිච්චං, තත්ර වො රාගො පහාතබ්බො. කිඤ්ච භික්ඛවෙ අනිච්චං චක්ඛුං භික්ඛවෙ අනිච්චං, තත්ර වො රාගො පහාතබ්බො සොතං අනිච්චං -පෙ- ඝානං අනිච්චං -පෙ- ජිව්හා අනිච්චා -පෙ- කායො අනිච්චො -පෙ- මනො අනිච්චො, තත්ර වො රාගො පහාතබ්බො. යං භික්ඛවෙ අනිච්චං, තත්ර වො රාගො පහාතබ්බොති.
1. 17. 3.
අනිච්ච ඡන්දරාගසුත්තං
170. යං භික්ඛවෙ අනිච්චං, තත්ර වො ඡන්දරාගො පහාතබ්බො. කිඤ්ච භික්ඛවෙ අනිච්චං: චක්ඛුං භික්ඛවෙ අනිච්චං, තත්ර වො ඡන්දරාගො පහාතබ්බො. සොතං අනිච්චං -පෙ- ඝානං අනිච්චං -පෙ- ජිව්හා අනිච්චා -පෙ- කායො අනිච්චො -පෙ- මනො අනිච්චො, තත්ර වො ඡන්දරාගො පහාතබ්බො. යං භික්ඛවෙ අනිච්චං, තත්ර වො ඡන්දරාගො පහාතබ්බොති.
1. 17. 4-6.
දුක්ඛඡන්ද-දුක්ඛරාග-දුක්ඛඡන්දරාගසුත්තානි
171-173. යං භික්ඛවෙ දුක්ඛං, තත්ර වො ඡන්දො පහාතබ්බො, රාගො පහාතබ්බො, ඡන්දරාගො පහාතබ්බො. කිඤ්ච භික්ඛවෙ දුක්ඛං: චක්ඛුං භික්ඛවෙ දුක්ඛං තත්ර වො ඡන්දො පහාතබ්බො රාගො පහාතබ්බො ඡන්දරාගො පහාතබ්බො. සොතං දුක්ඛං -පෙ- ඝානං දුක්ඛං -පෙ- ජිව්හා දුක්ඛා -පෙ- කායො දුක්ඛො -පෙ- මනො දුක්ඛො, තත්ර වො ඡන්දො පහාතබ්බො, රාගො පහාතබ්බො, ඡන්දරාගො පහාතබ්බො. යං භික්ඛවෙ දුක්ඛං තත්ර වො ඡන්දො පහාතබ්බො, රාගො පහාතබ්බො, ඡන්දරාගො පහාතබ්බොති.