අථ ඛො අඤ්ඤතරො භික්ඛු යෙන භගවා තෙනුපසඞ්කමි -පෙ- එකමන්තං නිසින්නො ඛො සො භික්ඛු භගවන්තං එතදවොච: ධම්මකථිකො ධම්මකථිකොති භන්තෙ වුච්චති. කිත්තාවතා නු ඛො භන්තෙ, ධම්මකථිකො හොතීති?

චක්ඛුස්ස චෙ භික්ඛු නිබ්බිදාය විරාගාය නිරොධාය ධම්මං දෙසෙති, ධම්මකථිකො භික්ඛූති අලං වචනාය; චක්ඛුස්ස චෙ භික්ඛු නිබ්බිදාය විරාගාය නිරොධාය පටිපන්නො හොති, ධම්මානුධම්මපටිපන්නො භික්ඛූති අලං වචනාය; චක්ඛුස්ස චෙ භික්ඛු නිබ්බිදා විරාගා නිරොධා අනුපාදා විමුත්තො හොති, දිට්ඨධම්මනිබ්බානප්පත්තො භික්ඛූති අලං වචනාය;

සොතස්ස -පෙ- ඝානස්ස -පෙ- ජිව්හාය -පෙ- කායස්ස -පෙ- මනස්ස චෙ භික්ඛු නිබ්බිදාය විරාගාය නිරොධාය ධම්මං දෙසෙති, ධම්මකථිකො භික්ඛූති අලං වචනාය; මනස්ස චෙ භික්ඛු නිබ්බිදාය විරාගාය නිරොධාය පටිපන්නො හොති, ධම්මානුධම්මප්පටිපන්නො භික්ඛූති අලං වචනාය; මනස්ස චෙ භික්ඛු නිබ්බිදා විරාගා නිරොධා අනුපාදාවිමුත්තො හොති, දිට්ඨධම්මනිබ්බානප්පත්තො භික්ඛූති අලංවචනායාති.

156. සාවත්ථියං–

අනිච්චං යෙව භික්ඛවෙ භික්ඛු චක්ඛුං අනිච්චන්ති පස්සති. සාස්ස හොති සම්මාදිට්ඨි. සම්මා පස්සං නිබ්බින්දති. නන්දික්ඛයා රාගක්ඛයො රාගක්ඛයා නන්දික්ඛයො නන්දිරාගක්ඛයා චිත්තං ‘සුවිමුත්තන්ති’ වුච්චති. අනිච්චං යෙව භික්ඛවෙ, භික්ඛු සොතං අනිච්චන්ති පස්සති -පෙ- ඝානං අනිච්චන්ති පස්සති -පෙ- ජිව්හං අනිච්චන්ති පස්සති අනිච්චන්ති පස්සති -පෙ- කායං අනිච්චන්ති පස්සති -පෙ- අනිච්චං යෙව භික්ඛවෙ භික්ඛු මනං අනිච්චන්ති පස්සති සාස්ස හොති සම්මාදිට්ඨි. සම්මා පස්සං නිබ්බින්දති. නන්දික්ඛයා රාගක්ඛයො රාගක්ඛයා නන්දික්ඛයො නන්දිරාගක්ඛයා චිත්තං සුවිමුත්තන්ති වුච්චතීති.

157. අනිච්චෙයෙව භික්ඛවෙ භික්ඛු රූපෙ අනිච්චාති පස්සති, සාස්ස හොති සම්මාදිට්ඨි. සම්මා පස්සං නිබ්බින්දති. නන්දික්ඛයා රාගක්ඛයො රාගක්ඛයා නන්දික්ඛයො නන්දිරාගක්ඛයා චිත්තං සුවිමුත්තන්ති වුච්චති. අනිච්චෙයෙව භික්ඛවෙ භික්ඛු සද්දෙ -පෙ- ගන්ධෙ -පෙ- රසෙ -පෙ- ඵොට්ඨබ්බෙ -පෙ- ධම්මෙ අනිච්චාති පස්සති, සාස්ස හොති සම්මාදිට්ඨි. සම්මා පස්සං නිබ්බින්දති. නන්දික්ඛයා රාගක්ඛයො, රාගක්ඛයා නන්දික්ඛයො, නන්දිරාගක්ඛයා චිත්තං සුවිමුත්තන්ති වුච්චතීති.

158. චක්ඛුං භික්ඛවෙ යොනිසො මනසි කරොථ, චක්ඛුඅනිච්චතඤ්ච යථාභූතං සමනුපස්සථ. චක්ඛුං භික්ඛවෙ භික්ඛු යොනිසො මනසිකරොන්තො චක්ඛුඅනිච්චතඤ්ච යථාභූතං සමනුපස්සන්තො චක්ඛුස්මිම්පි නිබ්බින්දති. නන්දික්ඛයා රාගක්ඛයො, රාගක්ඛයා නන්දික්ඛයො නන්දිරාගක්ඛයා චිත්තං සුවිමුත්තන්ති වුච්චති.