1. 14. 11.
බාහිරදුක්ඛසුත්තං
144. රූපා භික්ඛවෙ දුක්ඛා. යොපි හෙතු යොපි පච්චයො රූපානං උප්පාදාය සොපි දුක්ඛො. දුක්ඛසම්භූතා භික්ඛවෙ රූපා කුතො සුඛා භවිස්සන්ති සද්දා -පෙ- ගන්ධා -පෙ- රසා -පෙ- ඵොට්ඨබ්බා -පෙ- ධම්මා දුක්ඛා. යොපි හෙතු යොපි පච්චයො ධම්මානං උප්පාදාය සොපි දුක්ඛො. දුක්ඛසම්භූතා භික්ඛවෙ ධම්මා කුතො සුඛා භවිස්සන්ති.
එවං පස්සං භික්ඛවෙ සුතවා අරියසාවකො -පෙ- නාපරං ඉත්ථත්තායාති පජානාතීති.
1. 14. 12.
බාහිරඅනත්තසුත්තං
145. රූපා භික්ඛවෙ අනත්තා. යොපි හෙතු යොපි පච්චයො රූපානං උප්පාදාය සොපි අනත්තා. අනත්තසම්භූතා භික්ඛවෙ රූපා කුතො අත්තා භවිස්සන්ති. සද්දා -පෙ- ගන්ධා -පෙ- රසා -පෙ- ඵොට්ඨබ්බා -පෙ- ධම්මා අනත්තා. යොපි හෙතු යොපි පච්චයො ධම්මානං උප්පාදාය සොපි අනත්තා. අනත්තසම්භූතා භික්ඛවෙ ධම්මා කුතො අත්තා භවිස්සන්ති.
එවං පස්සං භික්ඛවෙ සුතවා අරියසාවකො -පෙ- නාපරං ඉත්ථත්තායාති පජානාතීති.
දෙවදහවග්ගො චුද්දසමො.
තත්රුද්දානං:
දෙවදහ ඛණො සතය්හ ගය්හ ද්වෙ හොන්ති පලාසීනා
හෙතුනා’පි තයො වුත්තා තෙ ඛො අජ්ඣත්ත බාහිරාති.
15. නවපුරාණවග්ගො
1. 15. 1.
කම්මසුත්තං
146. නවපුරාණානි භික්ඛවෙ, කම්මානි දෙසිස්සාමි, කම්මනිරොධඤ්ච, කම්මනිරොධගාමිනිඤ්ච පටිපදං. තං සුණාථ, සාධුකං මනසිකරොථ, භාසිස්සාමීති.
කතමඤ්ච භික්ඛවෙ පුරාණං කම්මං: චක්ඛුං භික්ඛවෙ පුරාණං කම්මං අභිසඞ්ඛතං අභිසඤ්චෙතයිතං වෙදනීයං දට්ඨබ්බං. සොතං පුරාණං කම්මං අභිසඞ්ඛතං අභිසඤ්චෙතයිතං වෙදනීයං දට්ඨබ්බං. ඝානං පුරාණං කම්මං අභිසඞ්ඛතං අභිසඤ්චෙතයිතං වෙදනීයං දට්ඨබ්බං. ජිව්හා පුරාණං කම්මං අභිසඞ්ඛතා අභිසඤ්චෙතයිතා වෙදනීයා දට්ඨබ්බා. කායො පුරාණං කම්මං අභිසඞ්ඛතො අභිසඤ්චෙතයිතො වෙදනීයො දට්ඨබ්බො. මනො පුරාණං කම්මං අභිසඞ්ඛතො අභිසඤ්චෙතයිතො වෙදනීයො දට්ඨබ්බො. ඉදං වුච්චති භික්ඛවෙ, පුරාණං කම්මං.
කතමඤ්ච භික්ඛවෙ නවං කම්මං: යං ඛො භික්ඛවෙ එතරහි කම්මං කරොති කායෙන වාචාය මනසා, ඉදං වුච්චති භික්ඛවෙ, නවං කම්මං.
කතමො ච භික්ඛවෙ කම්මනිරොධො: යො ඛො භික්ඛවෙ කායකම්මවචීකම්මමනොකම්මස්ස නිරොධා විමුත්තිං ඵුසති, අයං වුච්චති භික්ඛවෙ, කම්මනිරොධො.
කතමා ච භික්ඛවෙ කම්මනිරොධගාමිනී පටිපදා: අයමෙව අරියො අට්ඨඞ්ගිකො මග්ගො, සෙය්යථිදං: සම්මාදිට්ඨි සම්මාසඞ්කප්පො සම්මාවාචා සම්මාකම්මන්තො සම්මාආජීවො සම්මාවායාමො සම්මාසති සම්මාසමාධි. අයං වුච්චති භික්ඛවෙ, කම්මනිරොධගාමිනී පටිපදා.
ඉති ඛො භික්ඛවෙ දෙසිතං වො මයා පුරාණං කම්මං දෙසිතං නවං කම්මං, දෙසිතො කම්මනිරොධො, දෙසිතා කම්මනිරොධගාමිනී පටිපදා. යං වො භික්ඛවෙ, සත්ථාරා කරණීයං සාවකානං හිතෙසිනා අනුකම්පකෙන අනුකම්පං උපාදාය, කතං වො තං මයා. එතානි භික්ඛවෙ රුක්ඛමූලානි, එතානි සුඤ්ඤාගාරානි. ඣායථ භික්ඛවෙ, මා පමාදත්ථ, මා පච්ඡා විප්පටිසාරිනො අහුවත්ථ. අයං වො අම්හාකං අනුසාසනීති.