කිස්මිං නු ඛො භික්ඛවෙ, සති කිං උපාදාය කිං අභිනිවිස්ස එවං දිට්ඨි උප්පජ්ජති : “න වාතා වායන්ති, න නජ්ජො සන්දන්ති, න ගබ්භිනියො විජායන්ති, න චන්දිමසුරියා උදෙන්ති වා අපෙන්ති වා එසිකට්ඨායිට්ඨිතා”ති.

භගවම්මූලකා නො භන්තෙ, ධම්මා -පෙ- .

රූපෙ ඛො භික්ඛවෙ, සති රූපං උපාදාය රූපං අභිනිවිස්ස එවං දිට්ඨි උප්පජ්ජති : “න වාතා වායන්ති -පෙ- එසිකට්ඨායිට්ඨිතා”ති. වෙදනාය සති -පෙ- සඤ්ඤාය සති -පෙ- සඞ්ඛාරෙසු සති -පෙ- විඤ්ඤාණෙ සති විඤ්ඤාණං උපාදාය විඤ්ඤාණං අභිනිවිස්ස එවං දිට්ඨි උප්පජ්ජති : “න වාතා වායන්ති -පෙ- එසිකට්ඨායිට්ඨිතා”ති.

තං කිං මඤ්ඤථ භික්ඛවෙ, රූපං නිච්චං වා අනිච්චං වාති -පෙ- විපරිනාමධම්මං. අපි නු තං අනුපාදාය එවං දිට්ඨි උප්පජ්ජෙය්ය : “න වාතා වායන්ති -පෙ- එසිකට්ඨායිට්ඨිතා”ති.

නො හෙතං භන්තෙ.

ඉති ඛො භික්ඛවෙ, යදනිච්චං තං දුක්ඛං. තස්මිං සති තදුපාදාය එවං දිට්ඨි උප්පජ්ජති : “න වාතා වායන්ති -පෙ- එසිකට්ඨායිට්ඨිතා”ති.(පඤ්චවීසති සුත්තන්තා එවං විත්ථාරෙතබ්බා.)

කිස්මිං නු ඛො භික්ඛවෙ, සති කිං උපාදාය කිං අභිනිවිස්ස එවං දිට්ඨි උප්පජ්ජති : “අදුක්ඛමසුඛී අත්තා හොති අරොගො පරම්මරණා”ති.

භගවම්මූලකා නො භන්තෙ ධම්මා -පෙ- .

රූපෙ ඛො භික්ඛවෙ, සති රූපං උපාදාය, රූපං අභිනිවිස්ස එවං දිට්ඨි උප්පජ්ජති : “අදුක්ඛමසුඛී අත්තා හොති අරොගො පරම්මරණා”ති. වෙදනාය සති -පෙ- සඤ්ඤාය සති -පෙ- සඞ්ඛාරෙසු සති -පෙ- විඤ්ඤාණෙ සති විඤ්ඤාණං උපාදාය විඤ්ඤාණං අභිනිවිස්ස එවං දිට්ඨි උප්පජ්ජති : “අදුක්ඛමසුඛී අත්තා හොති, අරොගො පරම්මරණා”ති.

තං කිං මඤ්ඤථ භික්ඛවෙ, රූපං නිච්චං වා අනිච්චං වාති -පෙ- විපරිනාමධම්මං. අපි නු තං අනුපාදාය එවං දිට්ඨි උප්පජ්ජෙය්ය : “අදුක්ඛමසුඛී අත්තා හොති අරොගො පරම්මරණා”ති.

නො හෙතං භන්තෙ.

වෙදනා -පෙ- සඤ්ඤා -පෙ- සඞ්ඛාරා -පෙ- විඤ්ඤාණං නිච්චං වා අනිච්චං වාති -පෙ- විපරිනාමධම්මං. අපි නු තං අනුපාදාය එවං දිට්ඨි උප්පජ්ජෙය්ය : “අදුක්ඛමසුඛී අත්තා හොති අරොගො පරම්මරණා”ති.

නො හෙතං භන්තෙ.

ඉති ඛො භික්ඛවෙ, යදනිච්චං තං දුක්ඛං. තස්මිං සති තදුපාදාය තං අභිවනිවිස්ස එවං දිට්ඨි උප්පජ්ජෙය්ය: “අදුක්ඛමසුඛී අත්තා හොති අරොගො පරම්මරණා”ති.