3. 2. 23.
එකන්තසුඛී අත්තා සුත්තං
246. සාවත්ථියං:
-පෙ- “එකන්තසුඛී අත්තා හොති අරොගො පරම්මරණා”ති.
3. 2. 24.
එකන්තදුක්ඛී අත්තා සුත්තං
247. සාවත්ථියං:
-පෙ- “එකන්තදුක්ඛී අත්තා හොති අරොගො පරම්මරණා”ති.
3. 2. 25.
සුඛදුක්ඛී අත්තා සුත්තං
248. සාවත්ථියං:
-පෙ- “සුඛදුක්ඛී අත්තා හොති අරොගො පරම්මරණා”ති.
3. 2. 26.
අදුක්ඛමසුඛී අත්තා සුත්තං
249. සාවත්ථියං:
-පෙ- “අදුක්ඛමසුඛී අත්තා හොති අරොගො පරම්මරණා”ති.
භගවම්මූලකා නො භන්තෙ, ධම්මා -පෙ-
රූපෙ ඛො භික්ඛවෙ, සති රූපං උපාදාය, රූපං අභිනිවිස්ස එවං දිට්ඨි උප්පජ්ජති : “අදුක්ඛමසුඛී අත්තා හොති අරොගො පරම්මරණා”ති. වෙදනාය සති -පෙ- සඤ්ඤාය සති -පෙ- සඞ්ඛාරෙසු සති -පෙ- විඤ්ඤාණෙ සති විඤ්ඤාණං උපාදාය විඤ්ඤාණං අභිනිවිස්ස එවං දිට්ඨි උප්පජ්ජති : “අදුක්ඛමසුඛී අත්තා හොති අරොගො පරම්මරණා”’ති.
තං කිං මඤ්ඤථ භික්ඛවෙ, රූපං නිච්චං වා අනිච්චං වාති -පෙ- විපරිනාමධම්මං, අපි නු තං අනුපාදාය එවං දිට්ඨි උප්පජ්ජෙය්ය : “අදුක්ඛමසුඛී අත්තා හොති අරොගො පරම්මරණා”ති.
නො හෙතං භන්තෙ,
වෙදනා -පෙ- සඤ්ඤා -පෙ- සඞ්ඛාරා -පෙ- විඤ්ඤාණං නිච්චං වා අනිච්චං වාති -පෙ- විපරිනාමධම්මං අපි නු තං අනුපාදාය එවං දිට්ඨි උප්පජ්ජෙය්ය : “අදුක්ඛමසුඛී අත්තා හොති අරොගො පරම්මරණා”ති.
නො හෙතං භන්තෙ.
ඉති ඛො භික්ඛවෙ, දුක්ඛෙ සති දුක්ඛං උපාදාය දුක්ඛං අභිනිවිස්ස එවං දිට්ඨි උප්පජ්ජති : “අදුක්ඛමසුඛී අත්තා හොති අරොගො පරම්මරණා”ති. -පෙ-
ගමනවග්ගො දුතියො.
තත්රුද්දානං:
වාතං එතං මම සො අත්තා නො ච මෙ සියා,
නත්ථි කරතො හෙතුච්ච මහාදිට්ඨෙන අට්ඨමං.
සස්සතො අසස්සතො චෙව අන්තා නන්තා ච වුච්චති,
තං ජීවං අඤ්ඤං ජීවං ච තථාගතෙන චත්තාරො.
රූපී අත්තා යථා හොති අරූපී ච තථා පරං,
රූපී චාරූපී ච අත්තා නෙව රූපී නාරූපී ච,
එකන්තසුඛී ච අත්තා එකන්ත දුක්ඛී තථා.
සුඛදුක්ඛී අත්තා ච අදුක්ඛමසුඛී පරං,
ඉමෙ ඡබ්බීසසුත්තන්තා දුතියවාරෙ සුදෙසිතාති.