-පෙ- “හොති ච න ච හොති තථාගතො පරම්මරණා”ති? භගවම්මූලකා -පෙ- හොති ච න ච හොති තථාගතො පරම්මරණාති.

කිස්මිං නු ඛො භික්ඛවෙ, සති කිං උපාදාය කිං අභිනිවිස්ස එවං දිට්ඨි උප්පජ්ජති: “නෙව හොති න න හොති තථාගතො පරම්මරණා”ති?

භගවම්මූලකා නො භන්තෙ, ධම්මා, -පෙ-

රූපෙ ඛො භික්ඛවෙ, සති රූපං උපාදාය රූපං අභිනිවිස්ස එවං දිට්ඨි උප්පජ්ජති: “නෙව හොති න න හොති තථාගතො පරම්මරණා”ති. වෙදනාය සති -පෙ- සඤ්ඤාය සති -පෙ- සඞ්ඛාරෙසු සති -පෙ- විඤ්ඤාණෙ සති විඤ්ඤාණං උපාදාය විඤ්ඤාණං අභිනිවිස්ස එවං දිට්ඨි උප්පජ්ජති: “නෙව හොති න න හොති තථාගතො පරම්මරණා”ති.

තං කිං මඤ්ඤථ භික්ඛවෙ, -පෙ- නෙව හොති න න හොති තථාගතො පරම්මරණාති.

කිස්මිං නු ඛො භික්ඛවෙ, සති කිං උපාදාය කිං අභිනිවිස්ස එවං දිට්ඨි උප්පජ්ජති : “රූපී අත්තා හොති අරොගො පරම්මරණා”ති?

භගවම්මූලකා නො භන්තෙ, ධම්මා -පෙ-

රූපෙ ඛො භික්ඛවෙ, සති රූපං උපාදාය රූපං අභිනිවිස්ස එවං දිට්ඨි උප්පජ්ජති : රූපී අත්තා හොති අරොගො පරම්මරණා’ති. වෙදනාය සති -පෙ- සඤ්ඤාය සති -පෙ- සඞ්ඛාරෙසු සති -පෙ- විඤ්ඤාණෙ සති විඤ්ඤාණං උපාදාය විඤ්ඤාණං අභිනිවිස්ස එවං දිට්ඨි උප්පජ්ජති : “රූපී අත්තා හොති අරොගො පරම්මරණා”ති.

තං කිං මඤ්ඤථ භික්ඛවෙ, “රූපං නිච්චං වා අනිච්චං වා”ති -පෙ-

දුක්ඛං විපරිනාමධම්මං අපි නු තං අනුපාදාය එවං දිට්ඨි උප්පජ්ජෙය්ය : “රූපී අත්තා හොති අරොගො පරම්මරණා”’ති?

නො හෙතං භන්තෙ.

“වෙදනා -පෙ- “සඤ්ඤා -පෙ- “සඞ්ඛාරා -පෙ- “විඤ්ඤාණං නිච්චං වා අනිච්චං වා”ති -පෙ-

දුක්ඛං විපරිනාමධම්මං අපි නු තං අනුපාදාය එවං දිට්ඨි උප්පජ්ජෙය්ය “රූපී අත්තා හොති අරොගො පරම්මරණා”ති?

නො හෙතං භන්තෙ.

ඉති ඛො භික්ඛවෙ, දුක්ඛෙ සති දුක්ඛං උපාදාය දුක්ඛං අභිනිවිස්ස එවං දිට්ඨි උප්පජ්ජති; “රූපී අත්තා හොති අරොගො පරම්මරණාති.

කිස්මිං නු ඛො භික්ඛවෙ, සති කිං උපාදාය කිං අභිනිවිස්ස එවං දිට්ඨි උප්පජ්ජති ; “අරූපී අත්තා හොති අරොගො පරම්මරණා”ති.

(සො යෙව පෙය්යාලො විත්ථාරෙතබ්බො.)