එකමන්තං නිසින්නො ඛො ආයස්මා රාධො භගවන්තං එතදවොච : ‘මාරො මාරො’ති භන්තෙ, වුච්චති. කතමො නු ඛො භන්තෙ මාරොති?

රූපං ඛො රාධ මාරො, වෙදනා මාරො, සඤ්ඤා මාරො, සඞ්ඛාරා මාරො, විඤ්ඤාණං මාරො. එවං පස්සං රාධ, සුතවා අරියසාවකො රූපස්මිම්පි නිබ්බින්දති, වෙදනායපි නිබ්බින්දති, සඤ්ඤායපි නිබ්බින්දති, සඞ්ඛාරෙසුපි නිබ්බින්දති, විඤ්ඤාණස්මිම්පි නිබ්බින්දති. නිබ්බින්දං විරජ්ජති, විරාගා විමුච්චති. විමුත්තස්මිං විමුත්තමිති ඤාණං හොති. ඛීණා ජාති වුසිතං බ්රහ්මචරියං කතං කරණීයං නාපරං ඉත්ථත්තායාති පජානාතීති.

එකමන්තං නිසින්නො ඛො ආයස්මා රාධො භගවන්තං එතදවොච : “මාරධම්මො මාරධම්මො”ති භන්තෙ, වුච්චති. කතමො නු ඛො භන්තෙ, මාරධම්මොති?

රූපං ඛො රාධ, මාරධම්මො, වෙදනා මාරධම්මො, සඤ්ඤා මාරධම්මො, සඞ්ඛාරා මාරධම්මො, විඤ්ඤාණං මාරධම්මො. එවං පස්සං රාධ සුතවා අරියසාවකො -පෙ- නාපරං ඉත්ථත්තායාති පජානාතීති.

එකමන්තං නිසින්නො ඛො ආයස්මා රාධො භගවන්තං එතදවොච : “අනිච්චං අනිච්චන්ති” භන්තෙ, වුච්චති. කතමන්නු ඛො භන්තෙ, අනිච්චන්ති?

රූපං ඛො රාධ, අනිච්චං, වෙදනා අනිච්චා, සඤ්ඤා අනිච්චා, සඞ්ඛාරා අනිච්චා, විඤ්ඤාණං අනිච්චං. එවං පස්සං රාධ, සුතවා අරියසාවකො -පෙ- නාපරං ඉත්ථත්තායාති පජානාතීති.

එකමන්තං නිසින්නො ඛො ආයස්මා රාධො භගවන්තං එතදවොච : “අනිච්චධම්මො අනිච්චධම්මො”ති භන්තෙ වුච්චති. කතමො නු ඛො භන්තෙ, අනිච්චධම්මොති?

රූපං ඛො රාධ, අනිච්චධම්මො වෙදනා අනිච්චධම්මො සඤ්ඤා අනිච්චධම්මො සඞ්ඛාරා අනිච්චධම්මො, විඤ්ඤාණං අනිච්චධම්මො. එවං පස්සං රාධ, සුතවා අරියසාවකො -පෙ- නාපරං ඉත්ථත්තායාති පජානාතීති.

එකමන්තං නිසින්නො ඛො ආයස්මා රාධො භගවන්තං එතදවොච : “දුක්ඛං දුක්ඛ”න්ති භන්තෙ, වුච්චති. කතමන්නු ඛො භන්තෙ, දුක්ඛන්ති?

රූපං ඛො රාධ, දුක්ඛං, වෙදනා දුක්ඛා සඤ්ඤා දුක්ඛා සඞ්ඛාරා දුක්ඛා විඤ්ඤාණං දුක්ඛං. එවං පස්සං රාධ සුතවා අරියසාවකො -පෙ- නාපරං ඉත්ථත්තායාති පජානාතීති.

එකමන්තං නිසින්නො ඛො ආයස්මා රාධො භගවන්තං එතදවොච : “දුක්ඛධම්මො දුක්ඛධම්මො”ති භන්තෙ, වුච්චති. කතමො නු ඛො භන්තෙ, දුක්ඛධම්මොති?

රූපං ඛො රාධ, දුක්ඛධම්මො වෙදනා දුක්ඛධම්මො සඤ්ඤා දුක්ඛධම්මො සඞ්ඛාරා දුක්ඛධම්මො විඤ්ඤාණං දුක්ඛධම්මො. එවං පස්සං රාධ සුතවා අරියසාවකො -පෙ- නාපරං ඉත්ථත්තායාති පජානාතීති.