1. 3. 1. 3.
සක්කාය සුත්තං
105. සාවත්ථියං:
සක්කායඤ්ච වො භික්ඛවෙ, දෙසිස්සාමි සක්කායසමුදයඤ්ච සක්කායනිරොධඤ්ච සක්කායනිරොධගාමිනිඤ්ච පටිපදං. තං සුණාථ.
කතමො ච භික්ඛවෙ, සක්කායො:
පඤ්චුපාදානක්ඛන්ධාතිස්ස වචනීයං.
කතමෙ පඤ්ච,
සෙය්යථිදං: රූපුපාදානක්ඛන්ධො, -පෙ- විඤ්ඤාණුපාදානක්ඛන්ධො. අයං වුච්චති, භික්ඛවෙ, සක්කායො.
කතමො ච භික්ඛවෙ, සක්කායසමුදයො:
යායං තණ්හා පොනොභවිකා නන්දිරාගසහගතා තත්රතත්රාභිනන්දිනී, සෙය්යථිදං: කාමතණ්හා, භවතණ්හා, විභවතණ්හා. අයං වුච්චති භික්ඛවෙ, සක්කායසමුදයො.
කතමො ච භික්ඛවෙ, සක්කායනිරොධො:
යො තස්සායෙව තණ්හාය අසෙසවිරාගනිරොධො චාගො පටිනිස්සග්ගො මුත්ති අනාලයො, අයං වුච්චති භික්ඛවෙ, සක්කායනිරොධො.
කතමො ච භික්ඛවෙ, සක්කායනිරොධගාමිනී පටිපදා:
අයමෙව අරියො අට්ඨඞ්ගිකො මග්ගො. සෙය්යථිදං: සම්මාදිට්ඨි -පෙ- සම්මාසමාධි. අයං වුච්චති භික්ඛවෙ, සක්කායනිරොධගාමිනී පටිපදාති.
1. 3. 1. 4.
පරිඤ්ඤෙය්ය සුත්තං
106. සාවත්ථියං:
පරිඤ්ඤෙය්යෙ ච භික්ඛවෙ, ධම්මෙ දෙසිස්සාමි පරිඤ්ඤඤ්ච පරිඤ්ඤාතාවිඤ්ච පුග්ගලං. තං සුණාථ.
කතමෙ ච භික්ඛවෙ, පරිඤ්ඤෙය්යා ධම්මා:
රූපං භික්ඛවෙ, පරිඤ්ඤෙය්යො ධම්මො. වෙදනා පරිඤ්ඤෙය්යො ධම්මො, සඤ්ඤා -පෙ- සඞ්ඛාරා -පෙ- විඤ්ඤාණං පරිඤ්ඤෙය්යො ධම්මො. ඉමෙ වුච්චන්ති භික්ඛවෙ, පරිඤ්ඤෙය්යා ධම්මා.
කතමා ච භික්ඛවෙ, පරිඤ්ඤා:
යො භික්ඛවෙ, රාගක්ඛයො දොසක්ඛයො මොහක්ඛයො, අයං වුච්චති භික්ඛවෙ, පරිඤ්ඤා.
කතමො ච භික්ඛවෙ, පරිඤ්ඤාතාවී පුග්ගලො:
අරහා’තිස්ස වචනීයං. යො’යං ආයස්මා එවංනාමො එවංගොත්තො. අයං වුච්චති භික්ඛවෙ, පරිඤ්ඤාතාවී පුග්ගලොති.