66. සාවත්ථියං:

අථ ඛො අඤ්ඤතරො භික්ඛු -පෙ- භගවන්තං එතදවොච:

සාධු මෙ භන්තෙ භගවා සඞ්ඛිත්තෙන ධම්මං දෙසෙතු, යමහං භගවතො ධම්මං සුත්වා එකො වූපකට්ඨො අප්පමත්තො ආතාපී පහිතත්තො විහරෙය්ය’න්ති.

යං ඛො භික්ඛු, අනිච්චං, තත්ර තෙ ඡන්දො පහාතබ්බො’ති.

අඤ්ඤාතං භගවා අඤ්ඤාතං සුගතා’ති.

යථාකථං පන ත්වං භික්ඛු, මයා සඞ්ඛිත්තෙන භාසිතස්ස විත්ථාරෙන අත්ථං ආජානාසී’ති.

රූපං ඛො භන්තෙ, අනිච්චං, තත්ර මෙ ඡන්දො පහාතබ්බො, වෙදනා අනිච්චා -පෙ- සඤ්ඤා අනිච්චා -පෙ- සඞ්ඛාරා අනිච්චා -පෙ- විඤ්ඤාණං අනිච්චං, තත්ර මෙ ඡන්දො පහාතබ්බො. ඉමස්ස ඛ්වා’හං භන්තෙ, භගවතා සඞ්ඛිත්තෙන භාසිතස්ස එවං විත්ථාරෙන අත්ථං ආජානාමී’ති.

සාධු සාධු භික්ඛු, සාධු ඛො ත්වං භික්ඛු, මයා සඞ්ඛිත්තෙන භාසිතස්ස විත්ථාරෙන අත්ථං ආජානාසි. රූපං ඛො භික්ඛු, අනිච්චං, තත්ර තෙ ඡන්දො පහාතබ්බො. වෙදනා -පෙ- සඤ්ඤා -පෙ- සඞ්ඛාරා -පෙ- විඤ්ඤාණං අනිච්චං, තත්ර තෙ ඡන්දො පහාතබ්බො. ඉමස්ස ඛො භික්ඛු, මයා සඞ්ඛිත්තෙන භාසිතස්ස එවං විත්ථාරෙන අත්ථො දට්ඨබ්බො’ති.

අථ ඛො සො භික්ඛු, භගවතො භාසිතං අභිනන්දිත්වා -පෙ- අඤ්ඤතරො ච පන සො භික්ඛු අරහතං අහොසීති.

67. සාවත්ථියං:

අථ ඛො අඤ්ඤතරො භික්ඛු -පෙ- එකමන්තං නිසින්නො ඛො සො භික්ඛු භගවන්තං එතදවොච:

සාධු මෙ භන්තෙ භගවා සඞ්ඛිත්තෙන ධම්මං දෙසෙතු -පෙ- පහිතත්තො විහරෙය්යන්ති.

යං ඛො භික්ඛු, දුක්ඛං, තත්ර තෙ ඡන්දො පහාතබ්බො’ති.

අඤ්ඤාතං භගවා’ අඤ්ඤාතං සුගතා’ති.

යථා කථං පන ත්වං භික්ඛු, මයා සඞ්ඛිත්තෙන භාසිතස්ස විත්ථාරෙන අත්ථං ආජානාසී’ති?

රූපං ඛො භන්තෙ, දුක්ඛං, තත්ර මෙ ඡන්දො පහාතබ්බො. වෙදනා දුක්ඛා -පෙ- සඤ්ඤා දුක්ඛා -පෙ- සඞ්ඛාරා දුක්ඛා -පෙ- විඤ්ඤාණං දුක්ඛං, තත්ර මෙ ඡන්දො පහාතබ්බො. ඉමස්ස ඛ්වා’හං භන්තෙ, භගවතා සඞ්ඛිත්තෙන භාසිතස්ස එවං විත්ථාරෙන අත්ථං ආජානාමී’ති.