7. 1. 10.
බහුධීතුසුත්තං.
196. එකං සමයං භගවා කොසලෙසු විහරති අඤ්ඤතරස්මිං වනසණ්ඩෙ. තෙන ඛො පන සමයෙන අඤ්ඤතරස්ස භාරද්වාජගොත්තස්ස බ්රාහ්මණස්ස චතුද්දස බලිවද්දා නට්ඨා හොන්ති. අථ ඛො භාරද්වාජගොත්තො බ්රාහ්මණො තෙ බලිවද්දෙ ගවෙසන්තො යෙන සො වනසණ්ඩො තෙනුපසඞ්කමි. උපසඞ්කමිත්වා අද්දස භගවන්තං තස්මිං වනසණ්ඩෙ නිසින්නං පල්ලඞ්කං ආභුජිත්වා උජුං කායං පණිධාය පරිමුඛං සතිං උපට්ඨපෙත්වා. දිස්වාන යෙන භගවා තෙනුපසඞ්කමි. උපසඞ්කමිත්වා භගවතො සන්තිකෙ ඉමා ගාථායො අභාසි:
න හි නූනිමස්ස සමණස්ස බලිවද්දා චතුද්දස,
අජ්ජ සට්ඨි න දිස්සන්ති තෙනායං සමණො සුඛී.
අජ්ජ සට්ඨි න දිස්සන්ති තෙනායං සමණො සුඛී.
න හි නූනිමස්ස සමණස්ස තිලා ඛෙත්තස්මිං පාපකා,
එකපණ්ණා දුපණ්ණා ච තෙනායං සමණො සුඛී.
එකපණ්ණා දුපණ්ණා ච තෙනායං සමණො සුඛී.
න හි නූනිමස්ස සමණස්ස තුච්ඡකොට්ඨස්මිං මූසිකා,
උස්සොළ්හිකාය නච්චන්ති තෙනායං සමණො සුඛී.
උස්සොළ්හිකාය නච්චන්ති තෙනායං සමණො සුඛී.
න හි නූනිමස්ස සමණස්ස, සන්ථාරො සත්තමාසිකො,
උප්පාටකෙහි සංඡන්නො තෙනායං සමණො සුඛී.
උප්පාටකෙහි සංඡන්නො තෙනායං සමණො සුඛී.
න හි නූනිමස්ස සමණස්ස විධවා සත්තධීතරො,
එකපුත්තා දුපුත්තා ච තෙනායං සමණො සුඛී.
එකපුත්තා දුපුත්තා ච තෙනායං සමණො සුඛී.
න හි නූනිමස්ස සමණස්ස පිඞ්ගලා තිලකාහතා,
සොත්තං පාදෙන බොධෙති තෙනායං සමණො සුඛී.
සොත්තං පාදෙන බොධෙති තෙනායං සමණො සුඛී.
න හි නූනිමස්ස සමණස්ස පච්චූසම්හි ඉණායිකා,
දෙථ දෙථාති චොදෙන්ති තෙනායං සමණො සුඛීති.
දෙථ දෙථාති චොදෙන්ති තෙනායං සමණො සුඛීති.
[භගවා:]
න හි මය්හං බ්රාහ්මණ බලිවද්දා චතුද්දස,
අජ්ජ සට්ඨි න දිස්සන්ති තෙනාහං බ්රාහ්මණා සුඛී.
අජ්ජ සට්ඨි න දිස්සන්ති තෙනාහං බ්රාහ්මණා සුඛී.
න හි මය්හං බ්රාහ්මණ තිලාඛෙත්තම්හි පාපකා,
එකපණ්ණා දුපණ්ණා ච තෙනාහං බ්රාහ්මණා සුඛී.
එකපණ්ණා දුපණ්ණා ච තෙනාහං බ්රාහ්මණා සුඛී.
න හි මය්හං බ්රාහ්මණ තුච්ඡකොට්ඨස්මිං මූසිකා,
උස්සොළ්හිකාය නච්චන්ති තෙනාහං බ්රාහ්මණා සුඛී.
උස්සොළ්හිකාය නච්චන්ති තෙනාහං බ්රාහ්මණා සුඛී.
න හි මය්හං බ්රාහ්මණ සන්ථාරො සත්තමාසිකො,
උප්පාටකෙහි සඤ්ඡන්නො තෙනාහං බ්රාහ්මණා සුඛී.
උප්පාටකෙහි සඤ්ඡන්නො තෙනාහං බ්රාහ්මණා සුඛී.
න හි මය්හං බ්රාහ්මණ විධවා සත්තධීතරො,
එකපුත්තා දුපුත්තා ච තෙනාහං බ්රාහ්මණා සුඛී.
එකපුත්තා දුපුත්තා ච තෙනාහං බ්රාහ්මණා සුඛී.
න හි මය්හං බ්රාහ්මණ පිඞ්ගලා තිලකාහතා,
සොත්තං පාදෙන බොධෙති තෙනාහං බ්රාහ්මණා සුඛී.
සොත්තං පාදෙන බොධෙති තෙනාහං බ්රාහ්මණා සුඛී.