158. එකං සමයං භගවා සක්කෙසු විහරති සිලාවතියං. තෙන ඛො පන සමයෙන ආයස්මා සමිද්ධි භගවතො අවිදූරෙ අප්පමත්තො ආතාපී පහිතත්තො විහරති.

අථ ඛො ආයස්මතො සමිද්ධිස්ස රහොගතස්ස පටිසල්ලීනස්ස එවං චෙතසො පරිවිතක්කො උදපාදි. ලාභා වත මෙ සුලද්ධං වත මෙ යස්ස මෙ සත්ථා අරහං සම්මාසම්බුද්ධො. ලාභා වත මෙ සුලද්ධං වත මෙ යො’හං එවං ස්වාක්ඛාතෙ ධම්මවිනයෙ පබ්බජිතො. ලාභා වත මෙ සුලද්ධං වත මෙ යස්ස මෙ සබ්රහ්මචාරයො සීලවන්තො කල්යාණධම්මාති.

අථ ඛො මාරො පාපිමා ආයස්මතො සමිද්ධිස්ස චෙතසා චෙතොපරිවිතක්කමඤ්ඤාය යෙනායස්මා සමිද්ධි තෙනුපසඞ්කමි. උපසඞ්කමිත්වා ආයස්මතො සමිද්ධිස්ස අවිදූරෙ මහන්තං භයභෙරවසද්දං අකාසි, අපිස්සුදං පඨවී මඤ්ඤෙ උද්රීයතීති.

අථ ඛො ආයස්මා සමිද්ධි යෙන භගවා තෙනුපසඞ්කමි. උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නො ඛො ආයස්මා සමිද්ධි භගවන්තං එතදවොච: ඉධාහං භන්තෙ භගවතො අවිදූරෙ අප්පමත්තො ආතාපී පහිතත්තො විහරාමි. තස්ස මය්හං භන්තෙ රහොගතස්ස පටිසල්ලීනස්ස එවං චෙතසො පරිවිතක්කො උදපාදි: ලාභා වත මෙ, සුලද්ධං වත මෙ, යස්ස මෙ සත්ථා අරහං සම්මාසම්බුද්ධො. ලාභා වත මෙ, සුලද්ධං වත මෙ, යො’හං එවං ස්වාක්ඛාතෙ ධම්මවිනයෙ පබ්බජිතො. ලාභා වත මෙ, සුලද්ධං වත මෙ, යස්ස මෙ සබ්රහ්මචාරයො සීලවන්තො කල්යාණධම්මාති. තස්ස මය්හං භන්තෙ අවිදූරෙ මහාභයභෙරවසද්දො අහොසි, අපිස්සුදං පඨවී මඤ්ඤෙ උද්රීයතීති.

නෙසා සමිද්ධි පඨවී උද්රීයති. මාරො එසො පාපිමා. තුය්හං විචක්ඛුකම්මාය ආගතො. ගච්ඡ ත්වං සමිද්ධි තත්ථෙව අප්පමත්තො ආතාපී පහිතත්තො විහරාහීති.

එවම්භන්තෙති ඛො ආයස්මා සමිද්ධි භගවතො පටිස්සුත්වා උට්ඨායාසනා භගවන්තං අභිවාදෙත්වා පදක්ඛිණං කත්වා පක්කාමි. දුතියම්පි ඛො ආයස්මා සමිද්ධි තත්ථෙව අප්පමත්තො ආතාපී පහිතත්තො විහාසි. දුතියම්පි ඛො ආයස්මතො සමිද්ධිස්ස රහොගතස්ස පටිසල්ලීනස්ස එවං චෙතසො පරිවිතක්කො උදපාදි. ලාභා වත මෙ, සුලද්ධං වත මෙ -පෙ- යස්ස මෙ සබ්රහ්මචාරයො සීලවන්තො කල්යාණධම්මාති. දුතියම්පි ඛො මාරො පාපිමා ආයස්මතො සමිද්ධිස්ස චෙතසා චෙතොපරිවිතක්කමඤ්ඤාය -පෙ- අපිස්සුදං පඨවී මඤ්ඤෙ උද්රීයතීති.

අථ ඛො ආයස්මා සමිද්ධි මාරො අයං පාපිමා ඉති විදිත්වා මාරං පාපිමන්තං ගාථාය අජ්ඣභාසි:

අථ ඛො මාරො පාපිමා ජානාති මං සමිද්ධි භික්ඛූති දුක්ඛී දුම්මනො තත්ථෙවන්තරධායීති.