2. රජ්ජවග්ගො
4. 2. 1.
පාසාණසුත්තං.
147. එවං මෙ සුතං: එකං සමයං භගවා රාජගහෙ විහරති ගිජ්ඣකූටෙ පබ්බතෙ. තෙන ඛො පන සමයෙන භගවා රත්තන්ධකාරතිමිසායං අජ්ඣොකාසෙ නිසින්නො හොති. දෙවො ච එකමෙකං ඵුසායති.
අථ ඛො මාරො පාපිමා භගවතො භයං ඡම්භිතත්තං ලොමහංසං උප්පාදෙතුකාමො යෙන භගවා තෙනුපසඞ්කමි. උපසඞ්කමිත්වා භගවතො අවිදූරෙ මහන්තෙ පාසාණෙ පදාලෙසි.
අථ ඛො භගවා මාරො අයං පාපිමා ඉති විදිත්වා මාරං පාපිමන්තං ගාථාය අජ්ඣභාසි:
සචෙමං කෙවලං සබ්බං ගිජ්ඣකූටං චලෙය්යසි,
නෙව සම්මා විමුත්තානං බුද්ධානං අත්ථි ඉඤ්ජිතන්ති.
නෙව සම්මා විමුත්තානං බුද්ධානං අත්ථි ඉඤ්ජිතන්ති.
අථ ඛො මාරො පාපිමා ජානාති මං භගවා, ජානාති මං සුගතොති දුක්ඛී දුම්මනො තත්ථෙවන්තරධායීති.
4. 2. 2.
සීහසුත්තං
148. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන භගවා මහතියා පරිසාය පරිවුතො ධම්මං දෙසෙති.
අථ ඛො මාරස්ස පාපිමතො එතදහොසි: අයං ඛො සමණො ගොතමො මහතියා පරිසාය පරිවුතො ධම්මං දෙසෙති. යන්නූනාහං යෙන සමණො ගොතමො තෙනුපසඞ්කමෙය්යං විචක්ඛුකම්මායාති. අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
කින්නු සීහොව නදසි පරිසායං විසාරදො,
පටිමල්ලො හි තෙ අත්ථි විජිතාවී නු මඤ්ඤසීති.
පටිමල්ලො හි තෙ අත්ථි විජිතාවී නු මඤ්ඤසීති.
[භගවා:]
නදන්ති වෙ මහාවීරා පරිසාසු විසාරදා,
තථාගතා බලප්පත්තා තිණ්ණා ලොකෙ විසත්තිකන්ති.
තථාගතා බලප්පත්තා තිණ්ණා ලොකෙ විසත්තිකන්ති.
අථ ඛො මාරො පාපිමා ජානාති මං භගවා, ජානාති මං සුගතොති දුක්ඛී දුම්මනො තත්ථෙවන්තරධායීති.
4. 2. 3.
සකලිකසුත්තං
149. එවං මෙ සුතං: එකං සමයං භගවා රාජගහෙ විහරති මද්දකුච්ඡිස්මිං මිගදායෙ. තෙන ඛො පන සමයෙන භගවතො පාදො සකලිකාය ඛතො හොති. භුසා සුදං භගවතො වෙදනා වත්තන්ති සාරීරිකා දුක්ඛා තිබ්බා ඛරා කටුකා අසාතා අමනාපා. තා සුදං භගවා සතො සම්පජානො අධිවාසෙති අවිහඤ්ඤමානො. අථ ඛො භගවා චතුග්ගුණං සඞ්ඝාටිං පඤ්ඤපෙත්වා දක්ඛිණෙන පස්සෙන සීහසෙය්යං කප්පෙසි පාදෙ පාදං අච්චාධාය සතො සම්පජානො.
අථ ඛො මාරො පාපිමා යෙන භගවා තෙනුපසඞ්කමි. උපසඞ්කමිත්වා භගවන්තං ගාථාය අජ්ඣභාසි:
මන්දියා නු ඛො සෙසි උදාහු කාවෙය්යමත්තො
අත්ථා නු තෙ සම්පචුරා න සන්ති,
එකො විවිත්තෙ සයනාසනම්හි
නිද්දාමුඛො කිමිදං සොප්පසෙවාති.
අත්ථා නු තෙ සම්පචුරා න සන්ති,
එකො විවිත්තෙ සයනාසනම්හි
නිද්දාමුඛො කිමිදං සොප්පසෙවාති.
[භගවා:]
න මන්දියා සයාමි නාපි කාවෙය්යමත්තො
අත්ථං සමෙච්චාහ මපෙතසොකො,
එකො විවිත්තෙ සයනාසනම්හි
සයාමහං සබ්බභූතානුකම්පී.
අත්ථං සමෙච්චාහ මපෙතසොකො,
එකො විවිත්තෙ සයනාසනම්හි
සයාමහං සබ්බභූතානුකම්පී.
යෙසම්පි සල්ලං උරසී පවිට්ඨං
මුහුං මුහුං හදයං වෙධමානං,
තෙපීධ සොප්පං ලබ්භරෙ සසල්ලා
කස්මා අහං න සුපෙ වීතසල්ලො.
මුහුං මුහුං හදයං වෙධමානං,
තෙපීධ සොප්පං ලබ්භරෙ සසල්ලා
කස්මා අහං න සුපෙ වීතසල්ලො.
ජග්ගං න සඞ්කෙ නපි භෙමි සොත්තුං
රත්තින්දිවා නානුතපන්ති මා මං,
හානිං න පස්සාමි කුහිඤ්චි ලොකෙ
තස්මා සුපෙ සබ්බභූතානුකම්පීති.
රත්තින්දිවා නානුතපන්ති මා මං,
හානිං න පස්සාමි කුහිඤ්චි ලොකෙ
තස්මා සුපෙ සබ්බභූතානුකම්පීති.
අථ ඛො මාරො පාපිමා ජානාති මං භගවා -පෙ- තත්ථෙවන්තරධායීති.