3. 3. 4.
ඉස්සත්ථසුත්තං.
135. සාවත්ථියං–
එකමන්තං නිසින්නො ඛො රාජා පසෙනදි කොසලො භගවන්තං එතදවොච: කත්ථ නු ඛො භන්තෙ දානං දාතබ්බන්ති? යත්ථ ඛො මහාරාජ, චිත්තං පසීදතීති. කත්ථ පන භන්තෙ දින්නං මහප්ඵලන්ති. අඤ්ඤං ඛො එතං මහාරාජ කත්ථ දානං දාතබ්බං. අඤ්ඤං පනෙතං කත්ථ දින්නං මහප්ඵලන්ති. සීලවතො ඛො මහාරාජ දින්නං මහප්ඵලං නො තථා දුස්සීලෙ. තෙන හි මහාරාජ තඤ්ඤෙවෙත්ථ පටිපුච්ඡිස්සාමි. යථා තෙ ඛමෙය්ය තථා නං බ්යාකරෙය්යාසි.
තං කිම්මඤ්ඤසි මහාරාජ, ඉධ ත්යාස්ස යුද්ධං පච්චුපට්ඨිතං සඞ්ගාමො සමුපබ්බූළ්හො, අථ ආගච්ඡෙය්ය ඛත්තියකුමාරො අසික්ඛිතො අකතහත්ථො අකතයොග්ගො අකතූපාසනො භීරුඡම්භී උත්රාසී පලායී. භරෙය්යාසි තං පුරිසං? අත්ථො ච තෙ තාදිසෙන පුරිසෙනාති. නාහං භන්තෙ භරෙය්යං තං පුරිසං. න ච මෙ අත්ථො තාදිසෙන පුරිසෙනාති.
අථ ආගච්ඡෙය්ය බ්රාහ්මණකුමාරො අසික්ඛිතො -පෙ- අථ ආගච්ඡෙය්ය වෙස්සකුමාරො අසික්ඛිතො -පෙ- අථ ආගච්ඡෙය්ය සුද්දකුමාරො අසික්ඛිතො -පෙ- භරෙය්යාසි තං පුරිසං? අත්ථො ච ඛො තෙ තාදිසෙන පුරිසෙනාති? නාහං භන්තෙ භරෙය්යං තං පුරිසං. න ච මෙ අත්ථො තාදිසෙන පුරිසෙනාති.
තං කිම්මඤ්ඤසි මහාරාජ, ඉධ ත්යාස්ස යුද්ධං පච්චුපට්ඨිතං සඞ්ගාමො සමුපබ්බූළ්හො. අථ ආගච්ඡෙය්ය ඛත්තියකුමාරො සුසික්ඛිතො. කතහත්ථො කතයොග්ගො කතූපාසනො අභීරු අච්ඡම්භී අනුත්රාසී අපලායී. භරෙය්යාසි තං පුරිසං? අත්ථො ච තෙ තාදිසෙන පුරිසෙනාති? භරෙය්යාහං භන්තෙ තං පුරිසං අත්ථො ච මෙ තාදිසෙන පුරිසෙනාති.
අථ ආගච්ඡෙය්ය බ්රාහ්මණකුමාරො සුසික්ඛිතො -පෙ- වෙස්සකුමාරො සුසික්ඛිතො -පෙ- සුද්දකුමාරො සුසික්ඛිතො කතහත්ථො කතයොග්ගො කතූපාසනො අභීරු අච්ඡම්භී අනුත්රාසී අපලායී. භරෙය්යාසි තං පුරිසං? අත්ථො ච තෙ තාදිසෙන පුරිසෙනාති? භරෙය්යාහං භන්තෙ තං පුරිසං, අත්ථො ච මෙ තාදිසෙන පුරිසෙනාති.
එවමෙව ඛො මහාරාජ, යස්මා කස්මා චෙපි කුලා අගාරස්මා අනගාරියං පබ්බජිතො හොති: සො ච හොති පඤ්චඞ්ගවිප්පහීනො පඤ්චඞ්ගසමන්නාගතො, තස්මිං දින්නෙ මහප්ඵලං හොති.
කතමානි පඤ්ච අඞ්ගානි පහීනානි හොන්ති? කාමච්ඡන්දො පහීනො හොති, බ්යාපාදො පහීනො හොති, ථිනමිද්ධං පහීනං හොති, උද්ධච්චකුක්කුච්චං පහීනං හොති, විචිකිච්ඡා පහීනා හොති. ඉමානි පඤ්ච අඞ්ගානි පහීනානි හොන්ති.
කතමෙහි පඤ්චහඞ්ගෙහි සමන්නාගතො හොති? අසෙඛෙන සීලක්ඛන්ධෙන සමන්නාගතො හොති, අසෙඛෙන සමාධික්ඛන්ධෙන සමන්නාගතො හොති, අසෙඛෙන පඤ්ඤාක්ඛන්ධෙන සමන්නාගතො හොති, අසෙඛෙන විමුත්තික්ඛන්ධෙන සමන්නාගතො හොති, අසෙඛෙන විමුත්තිඤාණදස්සනක්ඛන්ධෙන සමන්නාගතො හොති. ඉමෙහි පඤ්චහඞ්ගෙහි සමන්නාගතො හොති.
ඉති පඤ්චඞ්ගවිප්පහීනෙ පඤ්චඞ්ගසමන්නාගතෙ දින්නං මහප්ඵලන්ති.
ඉදමවොච භගවා ඉදං වත්වා සුගතො අථාපරං එතදවොච සත්ථා:
ඉස්සත්ථං බලවිරියඤ්ච යස්මිං විජ්ජෙථ මාණවෙ,
තං යුද්ධත්ථො භරෙ රාජා නාසූරං ජාතිපච්චයා.
තථෙව ඛන්ති සොරච්චං ධම්මා යස්මිං පතිට්ඨිතා,
තමරියවුත්තිං මෙධාවිං හීනජච්චම්පි පූජයෙ.
කාරයෙ අස්සමෙ රම්මෙ වාසයෙත්ථ බහුස්සුතෙ,
පපඤ්ච විවනෙ කයිරා දුග්ගෙ සඞ්කමනානි ච.
අන්නං පානං ඛාදනීයං වත්ථසෙනාසනානි ච,
දදෙය්ය උජුභූතෙසු විප්පසන්නෙන චෙතසා.