අථ ඛො රාජා පසෙනදි කොසලො දිවාදිවස්ස යෙන භගවා තෙනුපසඞ්කමි, උපසඞ්කමිත්වා භගවන්තං අභිවාදෙත්වා එකමන්තං නිසීදි. එකමන්තං නිසින්නං ඛො රාජානං පසෙනදිං කොසලං භගවා එතදවොච: හන්ද කුතො නු ත්වං මහාරාජ, ආගච්ඡසි දිවාදිවස්සාති?

අය්යකා මෙ භන්තෙ, කාලකතා ජිණ්ණා වුද්ධා මහල්ලිකා අද්ධගතා වයොඅනුප්පත්තා වීසංවස්සසතිකා ජාතියා. අය්යකා ඛො පන මෙ භන්තෙ, පියා අහොසි මනාපා. හත්ථිරතනෙන චෙපහං භන්තෙ, ලභෙය්යං මා මෙ අය්යකා කාලමකාසීති, හත්ථිරතනම්පහං දදෙය්යං මා මෙ අය්යකා කාලමකාසීති. අස්සරතනෙන චෙපහං භන්තෙ, ලභෙය්යං, මා මෙ අය්යකා කාලමකාසීති, අස්සරතනම්පහං දදෙය්යං මා මෙ අය්යකා කාලමකාසීති. ගාමවරෙන චෙපහං භන්තෙ, ලභෙය්යං, මා මෙ අය්යකා කාලමකාසීති, ගාමවරම්පහං දදෙය්යං මා මෙ අය්යකා කාලමකාසීති. ජනපදෙන චෙපහං භන්තෙ, ලභෙය්යං මා මෙ අය්යකා කාලමකාසීති, ජනපදම්පහං දදෙය්යං මා මෙ අය්යකා කාලමකාසීති.

සබ්බෙ සත්තා මහාරාජ, මරණධම්මා මරණපරියොසානා මරණං අනතීතාති.

අච්ඡරියං භන්තෙ අබ්භුතං භන්තෙ, යාව සුභාසිතමිදං භන්තෙ, භගවතා සබ්බෙ සත්තා මරණධම්මා මරණපරියොසානා මරණං අනතීතාති.

එවමෙතං මහාරාජ, එවමෙතං මහාරාජ, සබ්බෙ සත්තා මරණධම්මා මරණපරියොසානා මරණං අනතීතාති. සෙය්යථාපි මහාරාජ, යානි කානි චි කුම්භකාරභාජනානි ආමකානි චෙව පක්කානි ච සබ්බානි තානි භෙදනධම්මානි භෙදනපරියොසානානි භෙදනං අනතීතානි. එවමෙව ඛො මහාරාජ, සබ්බෙ සත්තා මරණධම්මා මරණපරියොසානා මරණං අනතීතාති.

එකමන්තං නිසින්නො ඛො රාජා පසෙනදි කොසලො භගවන්තං එතදවොච: කති නු ඛො භන්තෙ ලොකස්ස ධම්මා උප්පජ්ජමානා උප්පජ්ජන්ති අහිතාය දුක්ඛාය අඵාසුවිහාරායාති?