11. 3. 3.
මායාසුත්තං
269. සාවත්ථියං–
භූතපුබ්බං භික්ඛවෙ, වෙපචිත්ති අසුරින්දො ආබාධිකො අහොසි, දුක්ඛිතො බාළ්හගිලානො. අථ ඛො භික්ඛවෙ, සක්කො දෙවානමින්දො යෙන වෙපචිත්ති අසුරින්දො තෙනුපසඞ්කමි ගිලානපුච්ඡකො.
අද්දසා ඛො භික්ඛවෙ, වෙපචිත්ති අසුරින්දො සක්කං දෙවානමින්දං දූරතො’ව ආගච්ඡන්තං. දිස්වාන සක්කං දෙවානමින්දං එතදවොච: තිකිච්ඡ මං දෙවානමින්දාති.
වාචෙහි මං වෙපචිත්ති සම්බරීමායන්ති. න තාවාහං වාචෙමි යාවාහං මාරිස අසුරෙ පටිපුච්ඡාමීති.
අථ ඛො භික්ඛවෙ වෙපචිත්ති අසුරින්දො අසුරෙ පටිපුච්ඡි: වාචෙමහං මාරිසා සක්කං. දෙවානමින්දං සම්බරීමායන්ති. මා ඛො ත්වං මාරිස වාචෙසි සක්කං දෙවානමින්දං සම්බරීමායන්ති.
අථ ඛො භික්ඛවෙ වෙපචිත්ති අසුරින්දො සක්කං දෙවානමින්දං ගාථාය අජ්ඣභාසි:
මායාවී මඝවා සක්ක දෙවරාජා සුජම්පති,
උපෙති නිරයං ඝොරං සම්බරො’ව සතං සමන්ති.
11. 3. 4.
අච්චයසුත්තං
270. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ද්වෙ භික්ඛූ සම්පයොජෙසුං. තත්රෙකො භික්ඛු අච්චසරා. අථ ඛො සො භික්ඛු තස්ස භික්ඛුනො සන්තිකෙ අච්චයං අච්චයතො දෙසෙති. සො භික්ඛු න පටිගණ්හාති.
අථ ඛො සම්බහුලා භික්ඛූ යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. එකමන්තං නිසින්නා ඛො තෙ භික්ඛූ භගවන්තං එතදවොචුං: ඉධ භන්තෙ ද්වෙ භික්ඛූ සම්පයොජෙසුං. තත්රෙකො භික්ඛු අච්චසරා. අථ ඛො සො භන්තෙ භික්ඛු තස්ස භික්ඛුනො සන්තිකෙ අච්චයං අච්චයතො දෙසෙති. සො භික්ඛු න පටිගණ්හාතීති.
ද්වෙ මෙ භික්ඛවෙ බාලා: යො ච අච්චයං අච්චයතො න පස්සති, යො ච අච්චයං දෙසෙන්තස්ස යථාධම්මං න පටිගණ්හාති. ඉමෙ ඛො භික්ඛවෙ, ද්වෙ බාලා. ද්වෙ මෙ භික්ඛවෙ පණ්ඩිතා: යො ච අච්චයං අච්චයතො පස්සති, යො ච අච්චයං දෙසෙන්තස්ස යථාධම්මං පටිගණ්හාති. ඉමෙ ඛො භික්ඛවෙ ද්වෙ පණ්ඩිතා.
භූතපුබ්බං භික්ඛවෙ සක්කො දෙවානමින්දො සුධම්මායං සභායං දෙවෙ තාවතිංසෙ අනුනයමානො තායං වෙලායං ඉමං ගාථං අභාසි:
කොධො වො වසමායාතු මා ච මිත්තෙ හි වො ජරා,
අගරහියං මා ගරහිත්ථ මා ච භාසිත්ථ පෙසුණං,
අථ පාපජනං කොධො පබ්බතො වාභිමද්දතීති.
11. 3. 5.
අක්කොධසුත්තං
271. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තෙන ඛො පන සමයෙන ද්වෙ භික්ඛූ සම්පයොජෙසුං -පෙ-
භූතපුබ්බං භික්ඛවෙ සක්කො දෙවානමින්දො සුධම්මායං සභායං දෙවෙ තාවතිංසෙ අනුනයමානො තායං වෙලායං ඉමං ගාථං අභාසි:
මා වො කොධො අජ්ඣභවි මා ච කුජ්ඣිත්ථ කුජ්ඣතං,
අක්කොධො අවිහිංසා ච අරියෙසු වසතී සදා,
අථ පාපජනං කොධො පබ්බතො වාභිමද්දතීති.
සක්කපඤ්චකං.