11. 1. 5.
සුභාසිතජයසුත්තං.
251. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. -පෙ- භගවා එතදවොච:
භූතපුබ්බං භික්ඛවෙ දෙවාසුරසඞ්ගාමො සමුපබ්බූළ්හො අහොසි. අථ ඛො භික්ඛවෙ වෙපචිත්ති අසුරින්දො සක්කං දෙවානමින්දං එතදවොච: හොතු දෙවානමින්ද, සුභාසිතෙන ජයොති. හොතු වෙපචිත්ති, සුභාසිතෙන ජයොති.
අථ ඛො භික්ඛවෙ දෙවා ච අසුරා ච පාරිසජ්ජෙ ඨපෙසුං: ඉමෙ නො සුභාසිතං දුබ්භාසිතං ආජානිස්සන්තීති.
අථ ඛො භික්ඛවෙ වෙපචිත්ති අසුරින්දො සක්කං දෙවානමින්දං එතදවොච: භණ දෙවානමින්ද, ගාථන්ති.
එවං වුත්තෙ භික්ඛවෙ සක්කො දෙවානමින්දො වෙපචිත්ති අසුරින්දං එතදවොච: තුම්හෙ ඛ්වෙත්ථ වෙපචිත්ති, පුබ්බදෙවා. භණ වෙපචිත්ති, ගාථන්ති. එවං වුත්තෙ භික්ඛවෙ වෙපචිත්ති අසුරින්දො ඉමං ගාථං අභාසි:
භිය්යො බාලා පභිජ්ජෙය්යුං නො චස්ස පටිසෙධකො,
තස්මා භුසෙන දණ්ඩෙන ධීරො බාලං නිසෙධයෙති.
තස්මා භුසෙන දණ්ඩෙන ධීරො බාලං නිසෙධයෙති.
භාසිතාය ඛො පන භික්ඛවෙ වෙපචිත්තිනා අසුරින්දෙන ගාථාය අසුරා අනුමොදිංසු. දෙවා තුණ්හී අහෙසුං.
අථ ඛො භික්ඛවෙ වෙපචිත්ති අසුරින්දො සක්කං දෙවානමින්දං එතදවොච: භණ දෙවානමින්ද, ගාථන්ති. එවං වුත්තෙ භික්ඛවෙ සක්කො දෙවානමින්දො ඉමං ගාථං අභාසි:
එතදෙව අහං මඤ්ඤෙ බාලස්ස පටිසෙධනං,
පරං සංකුපිතං ඤත්වා යො සතො උපසම්මතීති.
පරං සංකුපිතං ඤත්වා යො සතො උපසම්මතීති.
භාසිතාය ඛො පන භික්ඛවෙ සක්කෙන දෙවානමින්දෙන ගාථාය දෙවා අනුමොදිංසු. අසුරා තුණ්හී අහෙසුං.
අථ ඛො භික්ඛවෙ සක්කො දෙවානමින්දො වෙපචිත්තිං අසුරින්දං එතදවොච: භණ වෙපචිත්ති ගාථන්ති. එවං වුත්තෙ භික්ඛවෙ වෙපචිත්ති අසුරින්දො ඉමං ගාථං අභාසි:
එතදෙව තිතික්ඛාය වජ්ජං පස්සාමි වාසව,
යදා නං මඤ්ඤති බාලො භයා ම්යායං තිතික්ඛති,
අජ්ඣාරුහති දුම්මෙධො ගො’ව භිය්යො පලායිනන්ති.
යදා නං මඤ්ඤති බාලො භයා ම්යායං තිතික්ඛති,
අජ්ඣාරුහති දුම්මෙධො ගො’ව භිය්යො පලායිනන්ති.
භාසිතාය ඛො පන භික්ඛවෙ වෙපචිත්තිනා අසුරින්දෙන ගාථාය අසුරා අනුමොදිංසු. දෙවා තුණ්හී අහෙසුං.
අථ ඛො භික්ඛවෙ වෙපචිත්ති අසුරින්දො සක්කං දෙවානමින්දං එතදවොච: භණ දෙවානමින්ද ගාථන්ති.
එවං වුත්තෙ භික්ඛවෙ සක්කො දෙවානමින්දො ඉමා ගාථායො අභාසි:
කාමං මඤ්ඤතු වා මා වා භයා ම්යායං තිතික්ඛති,
සදත්ථපරමා අත්ථා ඛන්ත්යා භිය්යො න විජ්ජති.
සදත්ථපරමා අත්ථා ඛන්ත්යා භිය්යො න විජ්ජති.
යො හවෙ බලවා සන්තො දුබ්බලස්ස තිතික්ඛති,
තමාහු පරමං ඛන්තිං නිච්චං ඛමති දුබ්බලො.
තමාහු පරමං ඛන්තිං නිච්චං ඛමති දුබ්බලො.
අබලන්තං බලං ආහු යස්ස බාලබලං බලං,
බලස්ස ධම්මගුත්තස්ස පටිවත්තා න විජ්ජති.
බලස්ස ධම්මගුත්තස්ස පටිවත්තා න විජ්ජති.
තස්සෙව තෙන පාපියො යො කුද්ධං පටිකුජ්ඣති,
කුද්ධං අප්පටිකුජ්ඣන්තො සඞ්ගාමං ජෙති දුජ්ජයං.
කුද්ධං අප්පටිකුජ්ඣන්තො සඞ්ගාමං ජෙති දුජ්ජයං.
උභින්නමත්ථං චරති අත්තනො ච පරස්ස ච,
පරං සඞ්කුපිතං ඤත්වා යො සතො උපසම්මති.
පරං සඞ්කුපිතං ඤත්වා යො සතො උපසම්මති.
උභින්නං තිකිච්ඡන්තානං අත්තනො ච පරස්ස ච,
ජනා මඤ්ඤන්ති බාලොති යෙ ධම්මස්ස අකොවිදාති.
ජනා මඤ්ඤන්ති බාලොති යෙ ධම්මස්ස අකොවිදාති.
භාසිතාසු ඛො පන භික්ඛවෙ සක්කෙන දෙවානමින්දෙන ගාථාසු දෙවා අනුමොදිංසු. අසුරා තුණ්හී අහෙසුං.
අථ ඛො භික්ඛවෙ දෙවානඤ්ච අසුරානඤ්ච පාරිසජ්ජා එතදවොචුං: භාසිතා ඛො වෙපචිත්තිනා අසුරින්දෙන ගාථායො. තා ච ඛො සදණ්ඩාවචරා සසත්ථාවචරා ඉති භණ්ඩනං ඉති විග්ගහො ඉති කලහො. භාසිතා ඛො පන සක්කෙන දෙවානමින්දෙන ගාථායො. තා ච ඛො අදණ්ඩාවචරා අසත්ථාවචරා ඉති අභණ්ඩනං ඉති අවිග්ගහො ඉති අකලහො. සක්කස්ස දෙවානමින්දස්ස සුභාසිතෙන ජයොති.
ඉති ඛො භික්ඛවෙ සක්කස්ස දෙවානමින්දස්ස සුභාසිතෙන ජයො අහොසීති.