10. 1. 7.
පුනබ්බසුසුත්තං.
241. එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ.
තෙන ඛො පන සමයෙන භගවා භික්ඛූ නිබ්බාණපටිසංයුත්තාය ධම්මියා කථාය සන්දස්සෙති සමාදපෙති සමුත්තෙජෙති සම්පහංසෙති. තෙ ච භික්ඛූ අට්ඨිකත්වා මනසි කත්වා සබ්බචෙතසො සමන්නාහරිත්වා ඔහිතසොතා ධම්මං සුණන්ති.
අථ ඛො පුනබ්බසුමාතා යක්ඛිනී පුත්තකෙ එවං තොසෙසි:
තුණ්හී උත්තරිකෙ හොහි තුණ්හී හොහි පුනබ්බසු,
යාවාහං බුද්ධසෙට්ඨස්ස ධම්මං සොස්සාමි සත්ථුනො.
යාවාහං බුද්ධසෙට්ඨස්ස ධම්මං සොස්සාමි සත්ථුනො.
නිබ්බානං භගවා ආහ සබ්බගන්ථප්පමොචනං,
අතිවෙලා ච මෙ හොති අස්මිං ධම්මෙ පියායනා.
අතිවෙලා ච මෙ හොති අස්මිං ධම්මෙ පියායනා.
පියො ලොකෙ සකො පුත්තො පියො ලොකෙ සකො පති,
තතො පියතරා මය්හං අස්ස ධම්මස්ස මග්ගනා.
තතො පියතරා මය්හං අස්ස ධම්මස්ස මග්ගනා.
න හි පුත්තො පති වාපි පියො දුක්ඛා පමොචයෙ,
යථා සද්ධම්මසවණං දුක්ඛා මොචෙති පාණිනං.
යථා සද්ධම්මසවණං දුක්ඛා මොචෙති පාණිනං.
ලොකෙ දුක්ඛපරෙතස්මිං ජරාමරණසංයුතෙ,
ජරාමරණමොක්ඛාය යං ධම්මං අභිසම්බුද්ධං,
තං ධම්මං සොතුමිච්ඡාමි තුණ්හී හොහි පුනබ්බසූති.
ජරාමරණමොක්ඛාය යං ධම්මං අභිසම්බුද්ධං,
තං ධම්මං සොතුමිච්ඡාමි තුණ්හී හොහි පුනබ්බසූති.
[පුනබ්බසු:]
අම්ම න බ්යාහරිස්සාමි තුණ්හීභූතායමුත්තරා,
ධම්මමෙව නිසාමෙහි සද්ධම්මසවණං සුඛං,
ධම්මමෙව නිසාමෙහි සද්ධම්මසවණං සුඛං,
සද්ධම්මස්ස අනඤ්ඤාය අම්ම දුක්ඛං චරාමසෙ,
එස දෙවමනුස්සානං සම්මූළ්හානං පභඞ්කරො,
බුද්ධො අන්තිමසාරීරො ධම්මං දෙසෙති චක්ඛුමාති.
එස දෙවමනුස්සානං සම්මූළ්හානං පභඞ්කරො,
බුද්ධො අන්තිමසාරීරො ධම්මං දෙසෙති චක්ඛුමාති.
[පුනබ්බසුමාතා:]
සාධු ඛො පණ්ඩිතො නාම පුත්තො ජාතො උරෙසයො,
පුත්තො මෙ බුද්ධසෙට්ඨස්ස ධම්මං සුද්ධං පියායති.
පුත්තො මෙ බුද්ධසෙට්ඨස්ස ධම්මං සුද්ධං පියායති.
පුනබ්බසු සුඛී හොහි අජ්ජාහම්හි සමුග්ගතා,
දිට්ඨානි අරියසච්චානි උත්තරා පි සුණාතු මෙති.
දිට්ඨානි අරියසච්චානි උත්තරා පි සුණාතු මෙති.
10. 1. 8.
සුදත්තසුත්තං.
242. එකං සමයං භගවා රාජගහෙ විහරති සීතවනෙ. තෙන ඛො පන සමයෙන අනාථපිණ්ඩිකො ගහපති රාජගහං අනුප්පත්තො හොති. කෙනචිදෙව කරණීයෙන. අස්සොසි ඛො අනාථපිණ්ඩිකො ගහපති බුද්ධො කිර ලොකෙ උප්පන්නොති. තාවදෙව ච පන භගවන්තං දස්සනාය උපසඞ්කමිතුකාමො අහොසි.