10. 1. 11.
චීරාසුත්තං.
245. එකං සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන අඤ්ඤතරො උපාසකො චීරාය භික්ඛුනියා චීවරං අදාසි. අථ ඛො චීරාය භික්ඛුනියා අභිප්පසන්නො යක්ඛො රාජගහෙ රථිකාය රථිකං සිඞ්ඝාටකෙන සිඞ්ඝාටකං උපසඞ්කමිත්වා තායං වෙලායං ඉමං ගාථං අභාසි:
පුඤ්ඤං වත පසවි බහුං සප්පඤ්ඤො වතායමුපාසකො,
යො චීරාය අදාසි චීවරං සබ්බයොගෙහි විප්පමුත්තායාති.
යො චීරාය අදාසි චීවරං සබ්බයොගෙහි විප්පමුත්තායාති.
10. 1. 12.
ආළවකසුත්තං.
246. එවං මෙ සුතං: එකං සමයං භගවා ආළවියං විහරති ආළවකස්ස යක්ඛස්ස භවනෙ. අථ ඛො ආළවකො යක්ඛො යෙන භගවා තෙනුපසඞ්කමි. උපසඞ්කමිත්වා භගවන්තං එතදවොච: නික්ඛම සමණාති, සාධාවුසොති භගවා නික්ඛමි. පවිස සමණාති, සාධාවුසොති භගවා පාවිසි.
දුතියම්පි ඛො ආළවකො යක්ඛො භගවන්තං එතදවොච: නික්ඛම සමණාති. සාධාවුසොති භගවා නික්ඛමි. පවිස සමණාති. සාධාවුසොති භගවා පාවිසි. තතියම්පි ඛො ආළවකො යක්ඛො භගවන්තං එතදවොච: නික්ඛම සමණාති. සාධාවුසොති භගවා නික්ඛමි. පවිස සමණාති. සාධාවුසොති භගවා පාවිසි. චතුත්ථම්පි ඛො ආළවකො යක්ඛො භගවන්තං එතදවොච: නික්ඛම සමණාති. න ඛ්වාහං ආවුසො නික්ඛමිස්සාමි. යං තෙ කරණීයං තං කරොහීති.
[ආළවකො:]
පඤ්හං තං සමණ පුච්ඡිස්සාමි. සචෙ මෙ න බ්යාකරිස්සසි, චිත්තං වා තෙ ඛිපිස්සාමි, හදයං වා තෙ ඵාලෙස්සාමි, පාදෙසු වා ගහෙත්වා පාරගඞ්ගාය ඛිපිස්සාමීති.
[භගවා:]
න ඛ්වාහං තං ආවුසො පස්සාමි සදෙවකෙ ලොකෙ සමාරකෙ සබ්රහ්මකෙ සස්සමණබ්රාහ්මණියා පජාය සදෙවමනුස්සාය, යෙ මෙ චිත්තං වා ඛිපෙය්ය හදයං වා ඵාලෙය්ය පාදෙසු වා ගහෙත්වා පාරගඞ්ගාය ඛිපෙය්ය. අපි ච ත්වං ආවුසො පුච්ඡ යදාකඞ්ඛසීති.
අථ ඛො ආළවකො යක්ඛො භගවන්තං ගාථාය අජ්ඣභාසි:
කිං සූධ විත්තං පුරිසස්ස සෙට්ඨං කිං සු සුචිණ්ණං සුඛමාවහාති,
කිං සු හවෙ සාදුතරං රසානං කථං ජීවී ජීවිතමාහු සෙට්ඨන්ති?
කිං සු හවෙ සාදුතරං රසානං කථං ජීවී ජීවිතමාහු සෙට්ඨන්ති?
[භගවා:]
සද්ධීධ විත්තං පුරිසස්ස සෙට්ඨං ධම්මො සුචිණ්ණො සුඛමාවහාති,
සච්චං හවෙ සාදුතරං රසානං පඤ්ඤාජීවිං ජීවිතමාහු සෙට්ඨන්ති.
සච්චං හවෙ සාදුතරං රසානං පඤ්ඤාජීවිං ජීවිතමාහු සෙට්ඨන්ති.
[ආළවකො:]
කථං සු තරති ඔඝං කථංසු තරති අණ්ණවං,
කථං සු දුක්ඛං අච්චෙති කථං සු පරිසුජ්ඣතීති.
කථං සු දුක්ඛං අච්චෙති කථං සු පරිසුජ්ඣතීති.
[භගවා:]
සද්ධාය තරති ඔඝං අප්පමාදෙන අණ්ණවං,
විරියෙන දුක්ඛං අච්චෙති පඤ්ඤාය පරිසුජ්ඣතීති.
විරියෙන දුක්ඛං අච්චෙති පඤ්ඤාය පරිසුජ්ඣතීති.
[ආළවකො:]
කථං සු ලභතෙ පඤ්ඤං කථංසු වින්දතෙ ධනං,
කථං සු කිත්තිං පප්පොති කථං මිත්තානි ගන්ථති,
අස්මා ලොකා පරං ලොකං කථං පෙච්ච න සොචතීති?
කථං සු කිත්තිං පප්පොති කථං මිත්තානි ගන්ථති,
අස්මා ලොකා පරං ලොකං කථං පෙච්ච න සොචතීති?
[භගවා:]
සද්දහානො අරහතං ධම්මං නිබ්බාණපත්තියා,
සුස්සූසා ලභතෙ පඤ්ඤං අප්පමත්තො විචක්ඛණො.
සුස්සූසා ලභතෙ පඤ්ඤං අප්පමත්තො විචක්ඛණො.
පතිරූපකාරී ධුරවා උට්ඨාතා වින්දතෙ ධනං,
සච්චෙන කිත්තිං පප්පොති දදං මිත්තානි ගන්ථති.
සච්චෙන කිත්තිං පප්පොති දදං මිත්තානි ගන්ථති.
යස්සෙතෙ චතුරො ධම්මා සද්ධස්ස ඝරමෙසිනො,
සච්චං ධම්මො ධිති චාගො ස චෙ පෙච්ච න සොචති,
අස්මා ලොකා පරං ලොකං එවං පෙච්ච න සොචතීති.
සච්චං ධම්මො ධිති චාගො ස චෙ පෙච්ච න සොචති,
අස්මා ලොකා පරං ලොකං එවං පෙච්ච න සොචතීති.
ඉඞ්ඝ අඤ්ඤෙපි පුච්ඡස්සු පුථූ සමණබ්රාහ්මණෙ,
යදි සච්චා දමා චාගා ඛන්ත්යා භිය්යොධ විජ්ජතීති.
යදි සච්චා දමා චාගා ඛන්ත්යා භිය්යොධ විජ්ජතීති.
[ආළවකො:]
කථං නු දානි පුච්ඡෙය්යං පුථූ සමණබ්රාහ්මණෙ,
සො’හං අජ්ජ පජානාමි යො අත්ථො සම්පරායිකො.
සො’හං අජ්ජ පජානාමි යො අත්ථො සම්පරායිකො.
අත්ථාය වත මෙ බුද්ධො වාසායාළවිමාගමා,
සො’හං අජ්ජ පජානාමි යත්ථ දින්නං මහප්ඵලං.
සො’හං අජ්ජ පජානාමි යත්ථ දින්නං මහප්ඵලං.