1. 6. 9.
දුතියාසුත්තං
[දෙවතා:]
59. කිංසු දුතියා පුරිසස්ස හොති කිංසු චෙනං පසංසති,
කිස්ස චාභිරතො මච්චො සබ්බදුක්ඛා පමුච්චතීති.
[භගවා:]
සද්ධා දුතියා පුරිසස්ස හොති පඤ්ඤා චෙනං පසංසති,
නිබ්බාණාභිරතො මච්චො සබ්බදුක්ඛා පමුච්චතීති.
1. 6. 10.
කවිසුත්තං
[දෙවතා:]
60. කිංසු නිදානං ගාථානං කිංසු තාසං වියඤ්ජනං,
කිංසු සන්නිස්සිතා ගාථා කිංසු ගාථානමාසයො.
[භගවා:]
ඡන්දො නිදානං ගාථානං අක්ඛරා තාසං වියඤ්ජනං,
නාමසන්නිස්සිතා ගාථා කවි ගාථානමාසයො.
ජරාවග්ගො ඡට්ඨො.
තත්රුද්දානං:
ජරා අජරසා මිත්තං වත්ථු තීණි ජනෙති ච,
උප්පථො ච දුතියො ච කවිනා පූරිතො වග්ගොති.
7. අන්වවග්ගො
1. 7. 1.
නාම[අන්වභවි]සුත්තං
61. සාවත්ථියං–
[දෙවතා:]
කිංසු සබ්බං අන්වභවි කිස්මා භිය්යො න විජ්ජති,
කිස්සස්ස එකධම්මස්ස සබ්බෙව වසමන්වගූති.
[භගවා:]
නාමං සබ්බං අන්වභවි නාමා භිය්යො න විජ්ජති,
නාමස්ස එකධම්මස්ස සබ්බෙව වසමන්වගූති.
1. 7. 2.
චිත්තසුත්තං
[දෙවතා:]
62. කෙනස්සු නීයති ලොකො කෙනස්සු පරිකස්සති,
කිස්සස්ස එකධම්මස්ස සබ්බෙව වසමන්වගූති.
[භගවා:]
චිත්තෙන නීයති ලොකො චිත්තෙන පරිකස්සති,
චිත්තස්ස එකධම්මස්ස සබ්බෙව වසමන්වගූති.
1. 7. 3.
තණ්හාසුත්තං
[දෙවතා:]
63. කෙනස්සු නීයති ලොකො කෙනස්සු පරිකස්සති,
කිස්සස්ස එකධම්මස්ස සබ්බෙව වසමන්වගූති.
[භගවා:]
තණ්හාය නීයති ලොකො තණ්හාය පරිකස්සති,
තණ්හාය එකධම්මස්ස සබ්බෙව වසමන්වගූති.
1. 7. 4.
සංයොජනසුත්තං
[දෙවතා:]
64. කිංසු සංයොජනො ලොකො කිංසු තස්ස විචාරණං,
කිස්සස්ස විප්පහාණෙන නිබ්බණෙමිති වුච්චතීති.