52. කිංසු අජරසා සාධු කිංසු සාධු අධිට්ඨිතං,
කිංසු නරානං රතනං කිංසු චොරෙහි’හාරියන්ති.

සීලං අජරසා සාධු සද්ධා සාධු අධිට්ඨිතා,
පඤ්ඤා නරානං රතනං පුඤ්ඤං චොරෙහි’හාරියන්ති.

53. කිංසු පවසතො මිත්තං කිංසු මිත්තං සකෙ ඝරෙ,
කිං මිත්තං අත්ථජාතස්ස කිං මිත්තං සම්පරායිකන්ති.

සත්ථො පවසතො මිත්තං මාතා මිත්තං සකෙ ඝරෙ,
සහායො අත්ථජාතස්ස හොති මිත්තං පුනප්පුනං,
සයං කතානි පුඤ්ඤානි තං මිත්තං සම්පරායිකන්ති.

54. කිංසු වත්ථු මනුස්සානං කිං සූධ පරමො සඛා,
කිංසු භූතූපජීවන්ති යෙ පාණා පඨවිංසිතාති.

54. පුත්තා වත්ථු මනුස්සානං භරියාව පරමො සඛා,
වුට්ඨිං භූතූපජීවන්ති යෙ පාණා පඨවිංසිතාති.

55. කිංසු ජනෙති පුරිසං කිංසු තස්ස විධාවති,
කිංසු සංසාරමාපාදි කිංසු තස්ස මහබ්භයන්ති.

තණ්හා ජනෙති පුරිසං චිත්තමස්ස විධාවති,
සත්තො සංසාරමාපාදි දුක්ඛමස්ස මහබ්භයන්ති.

56. කිංසු ජනෙති පුරිසං කිංසු තස්ස විධාවති,
කිංසු සංසාරමාපාදි කිස්මා න පරිමුච්චතීති.

තණ්හා ජනෙති පුරිසං චිත්තමස්ස විධාවති,
සත්තො සංසාරමාපාදි දුක්ඛා න පරිමුච්චතීති.

57. කිංසු ජනෙති පුරිසං කිංසු තස්ස විධාවති,
කිංසු සංසාරමාපාදි කිංසු තස්ස පරායණන්ති.

තණ්හා ජනෙති පුරිසං චිත්තමස්ස විධාවති,
සත්තො සංසාරමාපාදි කම්මං තස්ස පරායණන්ති.