නිද්දා තන්දි විජම්භිකා අරතී භත්තසම්මදො,
එතෙන නප්පකාසති අරියමග්ගො ඉධ පාණිනන්ති.

නිද්දං තන්දිං විජම්භිකං අරතිං භත්තසම්මදං
විරියෙන නං පණාමෙත්වා අරියමග්ගො විසුජ්ඣතීති.

දුක්කරං දුත්තිතික්ඛඤ්ච අබ්යත්තෙන හි සාමඤ්ඤං,
බහූ හි තත්ථ සම්බාධා යත්ථ බාලො විසීදතීති.

කතිහං චරෙය්ය සාමඤ්ඤං චිත්තං චෙ න නිවාරයෙ,
පදෙ පදෙ විසීදෙය්ය සඞ්කප්පානං වසානුගො.

කුම්මොව අඞ්ගානි සකෙ කපාලෙ සමොදහං භික්ඛු මනොවිතක්කෙ,
අනිස්සිතො අඤ්ඤමහෙඨයානො පරිනිබ්බුතො න උපවදෙය්ය කඤ්චීති.

හිරීනිසෙධො පුරිසො කො චි ලොකස්මිං විජ්ජති,
යො නින්දං අප්පබොධති අස්සො භද්රො කසාමිවාති.

හිරීනිසෙධා තනුයා යෙ චරන්ති සදා සතා,
අන්තං දුක්ඛස්ස පප්පුය්ය චරන්ති විසමෙ සමන්ති.

කච්චි තෙ කුටිකා නත්ථි කච්චි නත්ථි කුලාවකා,
කච්චි සන්තානකා නත්ථි කච්චි මුත්තොසි බන්ධනාති.

තග්ඝ මෙ කුටිකා නත්ථි තග්ඝ නත්ථි කුලාවකා,
තග්ඝ සන්තානකා නත්ථි තග්ඝ මුත්තො’ස්මි බන්ධනාති.

කින්තාහං කුටිකං බ්රූමි කින්තෙ බ්රූමි කුලාවකං,
කින්තෙ සන්තානකං බ්රූමි කින්තාහං බ්රූමි බන්ධනන්ති.

මාතරං කුටිකං බ්රූසි භරියං බ්රූසි කුලාවකං,
පුත්තෙ සන්තානකෙ බ්රූසි තණ්හං මෙ බ්රූසි බන්ධනන්ති.

සාහු තෙ කුටිකා නත්ථි සාහු නත්ථි කුලාවකා,
සාහු සන්තානකා නත්ථි සාහු මුත්තොසි බන්ධනාති.