නන්දති පුත්තෙහි පුත්තිමා ගොමිකො ගොහි තථෙව නන්දති,
උපධී හි නරස්ස නන්දනා න හි සො නන්දති යො නිරූපධීති

සොචති පුත්තෙහි පුත්තිමා ගොමිකො ගොහි තථෙව සොචති,
උපධී හි නරස්ස සොචනා න හි සො සොචති යො නිරූපධීති.

නත්ථි පුත්තසමං පෙමං නත්ථි ගොසමිතං ධනං,
නත්ථි සුරියසමා ආභා සමුද්දපරමා සරාති.

නත්ථි අත්තසමං පෙමං නත්ථි ධඤ්ඤසමං ධනං,
නත්ථි පඤ්ඤාසමා ආභා වුට්ඨි වෙ පරමා සරාති.

ඛත්තියො දිපදං සෙට්ඨො බලිවද්දො චතුප්පදං,
කොමාරී සෙට්ඨා භරියානං යො ච පුත්තාන පුබ්බජොති.

සම්බුද්ධො ද්විපදං සෙට්ඨො ආජානීයො චතුප්පදං,
සුස්සූසා සෙට්ඨා භරියානං යො ච පුත්තානමස්සවොති.

ඨිතෙ මජ්ඣන්තිකෙ කාලෙ සන්නිසීවෙසු පක්ඛිසු,
සනතෙව බ්රහාරඤ්ඤං තං භයං පටිභාති මන්ති.

ඨිතෙ මජ්ඣන්තිකෙ කාලෙ සන්නිසීවෙසු පක්ඛිසු,
සනතෙව බ්රහාරඤ්ඤං සා රතී පටිභාති මන්ති.

නිද්දා තන්දි විජම්භිකා අරතී භත්තසම්මදො,
එතෙන නප්පකාසති අරියමග්ගො ඉධ පාණිනන්ති.

නිද්දං තන්දිං විජම්භිකං අරතිං භත්තසම්මදං
විරියෙන නං පණාමෙත්වා අරියමග්ගො විසුජ්ඣතීති.

දුක්කරං දුත්තිතික්ඛඤ්ච අබ්යත්තෙන හි සාමඤ්ඤං,
බහූ හි තත්ථ සම්බාධා යත්ථ බාලො විසීදතීති.

කතිහං චරෙය්ය සාමඤ්ඤං චිත්තං චෙ න නිවාරයෙ,
පදෙ පදෙ විසීදෙය්ය සඞ්කප්පානං වසානුගො.

කුම්මොව අඞ්ගානි සකෙ කපාලෙ සමොදහං භික්ඛු මනොවිතක්කෙ,
අනිස්සිතො අඤ්ඤමහෙඨයානො පරිනිබ්බුතො න උපවදෙය්ය කඤ්චීති.