අච්චෙන්ති කාලා තරයන්ති රත්තියො වයොගුණා අනුපුබ්බං ජහන්ති.
එතං භයං මරණෙ පෙක්ඛමානො පුඤ්ඤානි කයිරාථ සුඛාවහානීති.

අච්චෙන්ති කාලා තරයන්ති රත්තියො වයොගුණා අනුපුබ්බං ජහන්ති,
එතං භයං මරණෙ පෙක්ඛමානො ලොකාමිසං පජහෙ සන්තිපෙක්ඛොති.

කති ඡින්දෙ කති ජහෙ කති චුත්තරි භාවයෙ,
කති සඞ්ගාතිගො ‘භික්ඛු ඔඝතිණ්ණො’ති වුච්චතීති.

පඤ්ච ඡින්දෙ පඤ්ච ජහෙ පඤ්ච චුත්තරි භාවයෙ,
පඤ්ච සඞ්ගාතිගො ‘භික්ඛු ඔඝතිණ්ණො’ති වුච්චතීති.

කති ජාගරතං සුත්තා කති සුත්තෙසු ජාගරා,
කතීහි රජමාදෙති කතීහි පරිසුජ්ඣතීති.

පඤ්ච ජාගරතං සුත්තා පඤ්ච සුත්තෙසු ජාගරා,
පඤ්චහි රජමාදෙති පඤ්චහි පරිසුජ්ඣතීති.

යෙසං ධම්මා අප්පටිවිදිතා පරවාදෙසු නීයරෙ,
සුත්තා තෙ නප්පබුජ්ඣන්ති කාලො තෙසං පබුජ්ඣිතුන්ති.

යෙසං ධම්මා සුප්පටිවිදිතා පරවාදෙසු න නීයරෙ,
සම්බුද්ධා සම්මදඤ්ඤාය චරන්ති විසමෙ සමන්ති.

යෙසං ධම්මා අසම්මුට්ඨා පරවාදෙසු න නීයරෙ,
සම්බුද්ධා සම්මදඤ්ඤාය චරන්ති විසමෙ සමං.

න මානකාමස්ස දමො ඉධත්ථි න මොනමත්ථි අසමාහිතස්ස,
එකො අරඤ්ඤෙ විහරං පමත්තො න මච්චුධෙය්යස්ස තරෙය්ය පාරන්ති.

මානං පහාය සුසමාහිතත්තො සුචෙතසො සබ්බධි විප්පමුත්තො,
එකො අරඤ්ඤෙ විහරං අප්පමත්තො ස මච්චුධෙය්යස්ස තරෙය්ය පාරන්ති.