එවං මෙ සුතං: එකං සමයං භගවා කොසලෙසු චාරිකං චරති මහතා භික්ඛුසඞ්ඝෙන සද්ධිං. තෙන ඛො පන සමයෙන ධනඤ්ජානී නාම බ්රාහ්මණී මණ්ඩලකප්පෙ පටිවසති අභිප්පසන්නා බුද්ධෙ ච ධම්මෙ ච සඞ්ඝෙ ච. අථ ඛො ධනඤ්ජානී බ්රාහ්මණී උපක්ඛලිත්වා තික්ඛත්තුං උදානං උදානෙසි: ‘නමො තස්ස භගවතො අරහතො සම්මාසම්බුද්ධස්ස. නමො තස්ස භගවතො අරහතො සම්මාසම්බුද්ධස්ස. නමො තස්ස භගවතො අරහතො සම්මාසම්බුද්ධස්සා’ති .

තෙන ඛො පන සමයෙන සඞ්ගාරවො නාම මාණවො මණ්ඩලකප්පෙ පටිවසති තිණ්ණං වෙදානං පාරගූ සනිඝණ්ඩුකෙටුභානං සාක්ඛරප්පභෙදානං ඉතිහාසපඤ්චමානං පදකො වෙය්යාකරණො ලොකායතමහාපුරිසලක්ඛණෙසු අනවයො. අස්සොසි ඛො සඞ්ගාරවො මාණවො ධනඤ්ජානියා බ්රාහ්මණියා එවං වාචං භාසමානාය, සුත්වා ධනඤ්ජානිං බ්රාහ්මණිං එතදවොච: අවභූතාව අයං ධනඤ්ජානී බ්රාහ්මණී, පරිභූතාව අයං ධනඤ්ජානී බ්රාහ්මණී විජ්ජමානානං බ්රාහ්මණානං. අථ ච පන තස්ස මුණ්ඩකස්ස සමණකස්ස වණ්ණං භාසතීති.

න හි පන ත්වං තාත භද්රමුඛ, තස්ස භගවතො සීලපඤ්ඤාණං ජානාසි. සචෙ ත්වං තාත භද්රමුඛ, තස්ස භගවතො සීලපඤ්ඤාණං ජානෙය්යාසි, න ත්වං තාත භද්රමුඛ, තං භගවන්තං අක්කොසිතබ්බං පරිභාසිතබ්බං මඤ්ඤෙය්යාසීති.

තෙන හි භොති, යදා සමණො ගොතමො මණ්ඩලකප්පං අනුප්පත්තො හොති. අථ මෙ ආරොචෙය්යාසීති. එවං භද්රමුඛාති ඛො ධනඤ්ජානී බ්රාහ්මණී සඞ්ගාරවස්ස මාණවස්ස පච්චස්සොසි.

අථ ඛො භගවා කොසලෙසු අනුපුබ්බෙන චාරිකං චරමානො, යෙන මණ්ඩලකප්පං තදවසරි. තත්ර සුදං භගවා මණ්ඩලකප්පෙ විහරති තොදෙය්යානං බ්රාහ්මණානං අම්බවනෙ. අස්සොසි ඛො ධනඤ්ජානී බ්රාහ්මණී. ‘භගවා කිර මණ්ඩලකප්පං අනුප්පත්තො මණ්ඩලකප්පෙ විහරති තොදෙය්යානං බ්රාහ්මණානං අම්බවනෙ’ති.

අථ ඛො ධනඤ්ජානී බ්රාහ්මණී යෙන සඞ්ගාරවො මාණවො, තෙනුපසඞ්කමි. උපසඞ්කමිත්වා සඞ්ගාරවං මාණවං එතදවොච: ‘අයං තාත භද්රමුඛ, සො භගවා මණ්ඩලකප්පං අනුප්පත්තො, මණ්ඩලකප්පෙ විහරති තොදෙය්යානං බ්රාහ්මණානං අම්බවනෙ. යස්සදානි ත්වං තාත භද්රමුඛ, කාලං මඤ්ඤසීති.

‘එවං භොතී’ති ඛො සඞ්ගාරවො මාණවො ධනඤ්ජානියා බ්රාහ්මණියා පටිස්සුත්වා යෙන භගවා තෙනුපසඞ්කමි, උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො සඞ්ගාරවො මාණවො භගවන්තං එතදවොච:

‘සන්ති ඛො භො ගොතම, එකෙ සමණබ්රාහ්මණා දිට්ඨධම්මාභිඤ්ඤාවොසානපාරමිප්පත්තා ආදිබ්රහ්මචරියං පටිජානන්ති. තත්ර භො ගොතම, යෙ තෙ සමණබ්රාහ්මණා දිට්ඨධම්මාභිඤ්ඤාවොසානපාරමිප්පත්තා ආදිබ්රහ්මචරියං පටිජානන්ති, තෙසං භවං ගොතමො කතමො’ති?

දිට්ඨධම්මාභිඤ්ඤාවොසානපාරමිප්පත්තානං ආදිබ්රහ්මචරියං පටිජානන්තානම්පි ඛො අහං භාරද්වාජ, වෙමත්තතං වදාමි. සන්ති භාරද්වාජ, එකෙ සමණබ්රාහ්මණා අනුස්සවිකා, තෙ අනුස්සවෙන දිට්ඨධම්මාභිඤ්ඤාවොසානපාරමිප්පත්තා ආදිබ්රහ්මචරියං පටිජානන්ති. සෙය්යථාපි බ්රාහ්මණා තෙවිජ්ජා. සන්ති පන භාරද්වාජ, එකෙ සමණබ්රාහ්මණා කෙවලං සද්ධාමත්තකෙන දිට්ඨධම්මාභිඤ්ඤාවොසානපාරමිප්පත්තා ආදිබ්රහ්මචරියං පටිජානන්ති. සෙය්යථාපි තක්කී වීමංසී. සන්ති භාරද්වාජ, එකෙ සමණබ්රාහ්මණා පුබ්බෙ අනනුස්සුතෙසු ධම්මෙසු සාමඤ්ඤෙව ධම්මං අභිඤ්ඤාය දිට්ඨධම්මාභිඤ්ඤාවොසානපාරමිප්පත්තා ආදිබ්රහ්මචරියං පටිජානන්ති.

තත්ර භාරද්වාජ, යෙ තෙ සමණබ්රාහ්මණා පුබ්බෙ අනනුස්සුතෙසු ධම්මෙසු සාමඤ්ඤෙව ධම්මං අභිඤ්ඤාය දිට්ඨධම්මාභිඤ්ඤාවොසානපාරමිප්පත්තා ආදිබ්රහ්මචරියං පටිජානන්ති, තෙසාහමස්මි. තදමිනාපෙතං භාරද්වාජ, පරියායෙන වෙදිතබ්බං: යථා යෙ තෙ සමණබ්රාහ්මණා පුබ්බෙ අනනුස්සුතෙසු ධම්මෙසු සාමඤ්ඤෙව ධම්මං අභිඤ්ඤාය දිට්ඨධම්මාභිඤ්ඤාවොසානපාරමිප්පත්තා ආදිබ්රහ්මචරියං පටිජානන්ති, තෙසාහමස්මීති.