එවං මෙ සුතං: එකං සමයං භගවා කොසලෙසු චාරිකං චරති මහතා භික්ඛුසඞ්ඝෙන සද්ධිං. අථ ඛො භගවා මග්ගා ඔක්කම්ම අඤ්ඤතරස්මිං පදෙසෙ සිතං පාත්වාකාසි. අථ ඛො ආයස්මතො ආනන්දස්ස එතදහොසි: ‘කො නු ඛො හෙතු, කො පච්චයො භගවතො සිතස්ස පාතුකම්මාය, න අකාරණෙ තථාගතා සිතං පාතුකරොන්තී’ති. අථ ඛො ආයස්මා ආනන්දො එකංසං චීවරං කත්වා යෙන භගවා තෙනඤ්ජලිම්පණාමෙත්වා භගවන්තං එතදවොච: ‘කො නු ඛො භන්තෙ හෙතු, කො පච්චයො භගවතො සිතස්ස පාතුකම්මාය, න අකාරණෙ තථාගතා සිතං පාතුකරොන්තී’ති.

භූතපුබ්බං ආනන්ද, ඉමස්මිං පදෙසෙ වෙහලිඞ්ගං නාම ගාමනිගමො අහොසි ඉද්ධො චෙව ඵීතො ච බහුජනො ආකිණ්ණමනුස්සො. වෙහලිඞ්ගං ඛො ආනන්ද, ගාමනිගමං කස්සපො භගවා අරහං සම්මාසම්බුද්ධො උපනිස්සාය විහාසි. ඉධ සුදං ආනන්ද, කස්සපස්ස භගවතො අරහතො සම්මාසම්බුද්ධස්ස ආරාමො අහොසි. ඉධ සුදං ආනන්ද, කස්සපො භගවා අරහං සම්මාසම්බුද්ධො නිසින්නකො භික්ඛුසඞ්ඝං ඔවදතීති.

අථ ඛො ආයස්මා ආනන්දො චතුග්ගුණං සඞ්ඝාටිං පඤ්ඤාපෙත්වා භගවන්තං එතදවොච: තෙන හි භන්තෙ, භගවා නිසීදතු, එවා’යං භූමිප්පදෙසො ද්වීහි අරහන්තෙහි සම්මාසම්බුද්ධෙහි පරිභුත්තො භවිස්සතී’ති. නිසීදි භගවා පඤ්ඤත්තෙ ආසනෙ. නිසජ්ජ ඛො භගවා ආයස්මන්තං ආනන්දං ආමන්තෙසි:

‘භූතපුබ්බං ආනන්ද, ඉමස්මිං පදෙසෙ වෙහලිඞ්ගං නාම ගාමනිගමො අහොසි ඉද්ධො චෙව ඵීතො ච බහුජනො ආකිණ්ණමනුස්සො. වෙහලිඞ්ගං ඛො ආනන්ද, ගාමනිගමං කස්සපො භගවා අරහං සම්මාසම්බුද්ධො උපනිස්සාය විහාසි. ඉධ සුදං ආනන්ද, කස්සපස්ස භගවතො අරහතො සම්මාසම්බුද්ධස්ස ආරාමො අහොසි. ඉධ සුදං ආනන්ද, කස්සපො භගවා අරහං සම්මාසම්බුද්ධො නිසින්නකො භික්ඛුසඞ්ඝං ඔවදති.

වෙහලිඞ්ගෙ ඛො ආනන්ද, ගාමනිගමෙ ඝටීකාරො නාම කුම්භකාරො කස්සපස්ස භගවතො අරහතො සම්මාසම්බුද්ධස්ස උපට්ඨාකො අහොසි අග්ගුපට්ඨාකො. ඝටීකාරස්ස ඛො ආනන්ද, කුම්භකාරස්ස ජොතිපාලො නාම මාණවො සහායො අහොසි පියසහායො. අථ ඛො ආනන්ද, ඝටීකාරො කුම්භකාරො ජොතිපාලං මාණවං ආමන්තෙසි: ‘ආයාම සම්ම

ජොතිපාල, කස්සපං භගවන්තං අරහන්තං සම්මාසම්බුද්ධං දස්සනාය උපසඞ්කමිස්සාම. සාධුසම්මතං හි මෙ තස්ස භගවතො දස්සනං අරහතො සම්මාසම්බුද්ධස්සා’ති. එවං වුත්තෙ ආනන්ද, ජොතිපාලො මාණවො ඝටීකාරං කුම්භකාරං එතදවොච: ‘අලං සම්ම ඝටීකාර, කිං පන තෙන මුණ්ඩකෙන සමණකෙන දිට්ඨෙනා’ති? දුතියම්පි ඛො ආනන්ද -පෙ- තතියම්පි ඛො ආනන්ද, ඝටීකාරො කුම්භකාරො ජොතිපාලං මාණවං එතදවොච: ‘ආයාම සම්ම ජොතිපාල, කස්සපං භගවන්තං අරහන්තං සම්මාසම්බුද්ධං දස්සනාය උපසඞ්කමිස්සාම. සාධුසම්මතං හි මෙ තස්ස භගවතො දස්සනං අරහතො සම්මාසම්බුද්ධස්සා’ති. තතියම්පි ඛො ආනන්ද, ජොතිපාලො මාණවො ඝටීකාරං කුම්භකාරං එතදවොච: ‘අලං සම්ම ඝටීකාර. කිං පන තෙන මුණ්ඩකෙන සමණකෙන දිට්ඨෙනා’ති. තෙන හි සම්ම ජොතිපාල, සොත්තිං සිනානිං ආදාය නදිං ගමිස්සාම සිනායිතුන්ති. එවං සම්මා’ති ඛො ආනන්ද, ජොතිපාලො මාණවො ඝටීකාරස්ස කුම්භකාරස්ස පච්චස්සොසි. අථ ඛො ආනන්ද, ඝටීකාරො ච කුම්භකාරො ජොතිපාලො ච මාණවො සොත්තිං සිනානිං ආදාය නදිං අගමංසු සිනායිතුං.

අථ ඛො ආනන්ද, ඝටීකාරො කුම්භකාරො ජොතිපාලං මාණවං ආමන්තෙසි: අයං සම්ම ජොතිපාල, කස්සපස්ස භගවතො අරහතො සම්මාසම්බුද්ධස්ස අවිදූරෙ ආරාමො. ආයාම සම්ම ජොතිපාල, කස්සපං භගවන්තං අරහන්තං සම්මාසම්බුද්ධං දස්සනාය උපසඞ්කමිස්සාම. සාධුසම්මතං හි මෙ තස්ස භගවතො දස්සනං අරහතො සම්මාසම්බුද්ධස්සා’ති.

එවං වුත්තෙ ආනන්ද, ජොතිපාලො මාණවො ඝටීකාරං කුම්භකාරං එතදවොච: අලං සම්ම ඝටීකාර, කිං පන තෙන මුණ්ඩකෙන සමණකෙන දිට්ඨෙනා’ති? දුතියම්පි ඛො ආනන්ද -පෙ- තතියම්පි ඛො ආනන්ද, ඝටීකාරො කුම්භකාරො ජොතිපාලං මාණවං එතදවොච: අයං සම්ම ජොතිපාල, කස්සපස්ස භගවතො අරහතො සම්මාසම්බුද්ධස්ස අවිදූරෙ ආරාමො. ආයාම සම්ම ජොතිපාල, කස්සපං භගවන්තං අරහන්තං සම්මාසම්බුද්ධං දස්සනාය උපසඞ්කමිස්සාම. සාධුසම්මතං හි මෙ තස්ස භගවතො දස්සනං අරහතො සම්මාසම්බුද්ධස්සා’ති. තතියම්පි ඛො ආනන්ද, ජොතිපාලො මාණවො ඝටීකාරං කුම්භකාරං එතදවොච: අලං සම්ම ඝටීකාර, කිං පන තෙන මුණ්ඩකෙන සමණකෙන දිට්ඨෙනා’ති?

අථ ඛො ආනන්ද, ඝටීකාරො කුම්භකාරො ජොතිපාලං මාණවං ඔවට්ටිකාය පරාමසිත්වා එතදවොච: අයං සම්ම ජොතිපාල, කස්සපස්ස භගවතො අරහතො සම්මාසම්බුද්ධස්ස අවිදූරෙ ආරාමො. ආයාම සම්ම ජොතිපාල, කස්සපං භගවන්තං අරහන්තං සම්මාසම්බුද්ධං දස්සනාය උපසඞ්කමිස්සාම. සාධුසම්මතං හි මෙ තස්ස භගවතො දස්සනං අරහතො සම්මාසම්බුද්ධස්සා’ති.

අථ ඛො ආනන්ද, ජොතිපාලො මාණවො ඔවට්ටිකං විනිවෙඨෙත්වා ඝටීකාරං කුම්භකාරං එතදවොච: අලං සම්ම ඝටීකාර, කිං පන තෙන මුණ්ඩකෙන සමණකෙන දිට්ඨෙනාති?