1. එවං මෙ සුතං: එකං සමයං ආයස්මා මහාමොග්ගල්ලානො භග්ගෙසු විහරති සුංසුමාරගිරෙ භෙසකලාවනෙ මිගදායෙ. තෙන ඛො පන සමයෙන ආයස්මා මහාමොග්ගල්ලානො අබ්භොකාසෙ චඞ්කමති.

2. තෙන ඛො පන සමයෙන මාරො පාපිමා ආයස්මතො මහාමොග්ගල්ලානස්ස කුච්ඡිගතො හොති කොට්ඨමනුපවිට්ඨො. අථ ඛො ආයස්මතො මහාමොග්ගල්ලානස්ස එතදහොසි: “කින්නු ඛො මෙ කුච්ඡි ගරුගරු විය මාසාචිතං මඤ්ඤෙති. අථ ඛො ආයස්මා මහාමොග්ගල්ලානො චඞ්කමා ඔරොහිත්වා විහාරං පවිසිත්වා පඤ්ඤත්තෙ ආසනෙ නිසීදි. නිසජ්ජ ඛො ආයස්මා මහාමොග්ගල්ලානො පච්චත්තං යොනිසො මනසාකාසි.

3. අද්දසා ඛො ආයස්මා මහාමොග්ගල්ලානො මාරං පාපිමන්තං කුච්ඡිගතං කොට්ඨමනුපවිට්ඨං. දිස්වාන මාරං පාපිමන්තං එතදවොච: නික්ඛම පාපිම, නික්ඛම පාපිම, මා තථාගතං විහෙසෙසි මා තථාගතසාවකං. මා තෙ අහොසි දීඝරත්තං අහිතාය දුක්ඛායාති.

4. අථ ඛො මාරස්ස පාපිමතො එතදහොසි: “අජානමෙව ඛො මං අයං සමණො අපස්සං එවමාහ: ‘නික්ඛම පාපිම, නික්ඛම පාපිම, මා තථාගතං විහෙසෙසි මා තථාගතසාවකං. මා තෙ අහොසි දීඝරත්තං අහිතාය දුක්ඛායා’ති. යොපිස්ස සො සත්ථා, සොපි මං නෙව ඛිප්පං ජානෙය්ය, කුතො පන මං අයං සාවකො ජානිස්සතී”ති.

5. අථ ඛො ආයස්මා මහාමොග්ගල්ලානො මාරං පාපිමන්තං එතදවොච: “එතස්මිං ඛො තාහං පාපිම ජානාමි මා ත්වං මඤ්ඤිත්ථො: න මං ජානාතීති. මාරො ත්වමසි පාපිම. තුය්හං හි පාපිම එවං හොති: ‘අජානමෙව ඛො මං අයං සමණො අපස්සං එවමාහ: නික්ඛම පාපිම, නික්ඛම පාපිම, මා තථාගතං විහෙසෙසි, මා තථාගතසාවකං. මා තෙ අහොසි දීඝරත්තං අහිතාය දුක්ඛායා’ති. යොපිස්ස සො සත්ථා සොපි මං නෙව ඛිප්පං ජානෙය්ය, කුතො පන මං අයං සාවකො ජානිස්සතී”ති.

6. අථ ඛො මාරස්ස පාපිමතො එතදහොසි: ජානමෙව ඛො මං අයං සමණො පස්සං එවමාහ: නික්ඛම පාපිම, නික්ඛම පාපිම, මා තථාගතං විහෙසෙසි, මා තථාගතසාවකං. මා තෙ අහොසි දීඝරත්තං අහිතාය දුක්ඛායාති. අථ ඛො මාරො පාපිමා ආයස්මතො මහාමොග්ගල්ලානස්ස මුඛතො උග්ගන්ත්වා පච්චග්ගළෙ අට්ඨාසි.

7. අද්දසා ඛො ආයස්මා මහාමොග්ගල්ලානො මාරං පාපිමන්තං පච්චග්ගළෙ ඨිතං. දිස්වාන මාරං පාපිමන්තං එතදවොච: එත්ථපි ඛො තාහං පාපිම පස්සාමි. මා ත්වං මඤ්ඤිත්ථො: න මං පස්සතීති. එසො ත්වං පාපිම පච්චග්ගළෙ ඨිතො.

8. භූතපුබ්බාහං පාපිම දූසී නාම මාරො අහොසිං. තස්ස මෙ කාළී නාම භගිනී. තස්සා ත්වං පුත්තො. සො මෙ ත්වං භාගිනෙය්යො හොසි. තෙන ඛො පන පාපිම සමයෙන කකුසන්ධො භගවා අරහං සම්මාසම්බුද්ධො ලොකෙ උප්පන්නො හොති. කකුසන්ධස්ස ඛො පන පාපිම භගවතො අරහතො සම්මාසම්බුද්ධස්ස විධුර - සඤ්ජීව නාම සාවකයුගං අහොසි අග්ගං භද්දයුගං. යාවතා ඛො පන පාපිම කකුසන්ධස්ස භගවතො අරහතො සම්මාසම්බුද්ධස්ස සාවකා, නාස්සුධ කොචි ආයස්මතා විධුරෙන සමසමො හොති යදිදං ධම්මදෙසනාය. ඉමිනා ඛො එතං පාපිම පරියායෙන ආයස්මතො විධුරස්ස විධුරො විධුරොත්වෙව සමඤ්ඤා උදපාදි.

ආයස්මා පන පාපිම සඤ්ජීවො අරඤ්ඤගතොපි රුක්ඛමූලගතොපි සුඤ්ඤාගාරගතොපි අප්පකසිරෙනෙව සඤ්ඤාවෙදයිතනිරොධං සමාපජ්ජති. භූතපුබ්බං පාපිම ආයස්මා සඤ්ජීවො අඤ්ඤතරස්මිං රුක්ඛමූලෙ සඤ්ඤාවෙදයිතනිරොධං සමාපන්නො නිසින්නො හොති. අද්දසංසු ඛො පාපිම ගොපාලකා පසුපාලකා කස්සකා පථාවිනො ආයස්මන්තං සඤ්ජීවං අඤ්ඤතරස්මිං රුක්ඛමූලෙ සඤ්ඤාවෙදයිතනිරොධං සමාපජ්ජිත්වා නිසින්නං. දිස්වාන තෙසං එතදහොසි: අච්ඡරියං වත භො, අබ්භුතං වත භො, අයං සමණො නිසින්නකොව කාලකතො, හන්ද නං දහාමාති. අථ ඛො තෙ පාපිම ගොපාලකා පසුපාලකා කස්සකා පථාවිනො තිණඤ්ච කට්ඨඤ්ච ගොමයඤ්ච සඞ්කඩ්ඪිත්වා ආයස්මතො සඤ්ජීවස්ස කායෙ උපචිනිත්වා අග්ගිං දත්වා පක්කමිංසු. අථ ඛො පාපිම ආයස්මා සඤ්ජීවො තස්සා රත්තියා අච්චයෙන තාය සමාපත්තියා වුට්ඨහිත්වා චීවරානි පප්ඵොටෙත්වා පුබ්බන්හසමයං නිවාසෙත්වා පත්තචීවරං ආදාය ගාමං පිණ්ඩාය පාවිසි. අද්දසංසු ඛො තෙ පාපිම ගොපාලකා පසුපාලකා කස්සකා පථාවිනො ආයස්මන්තං සඤ්ජීවං පිණ්ඩාය චරන්තං. දිස්වාන නෙසං එතදහොසි: අච්ඡරියං වත භො, අබ්භුතං වත භො, අයං සමණො නිසින්නකොව කාලකතො ස්වායං පතිසඤ්ජීවිතොති. ඉමිනා ඛො එතං පාපිම පරියායෙන ආයස්මතො සඤ්ජීවස්ස සඤ්ජීවො සඤ්ජීවොත්වෙව සමඤ්ඤා උදපාදි.