1. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. තත්ර ඛො භගවා භික්ඛූ ආමන්තෙසි භික්ඛවොති. භදන්තෙති තෙ භික්ඛූ භගවතො පච්චස්සොසුං. භගවා එතදවොච:

සම්පන්නසීලා භික්ඛවෙ විහරථ සම්පන්නපාතිමොක්ඛා. පාතිමොක්ඛසංවරසංවුතා විහරථ ආචාරගොචරසම්පන්නා. අණුමත්තෙසු වජ්ජෙසු භයදස්සාවී සමාදාය සික්ඛථ සික්ඛාපදෙසු.

2. ආකඞ්ඛෙය්ය චෙ භික්ඛවෙ භික්ඛු ‘සබ්රහ්මචාරීනං පියො චස්සං මනාපො ගරු භාවනීයො චා’ති සීලෙස්වෙවස්ස පරිපූරකාරී අජ්ඣත්තං චෙතොසමථමනුයුත්තො අනිරාකතජ්ඣානො විපස්සනාය සමන්නාගතො බ්රූහෙතා සුඤ්ඤාගාරානං. (1)

3. ආකඞ්ඛෙය්ය චෙ භික්ඛවෙ භික්ඛු “ලාභී අස්සං චීවරපිණ්ඩපාතසෙනාසනගිලානපච්චයභෙසජ්ජපරික්ඛාරාන”න්ති, සීලෙස්වෙවස්ස පරිපූරකාරී අජ්ඣත්තං චෙතොසමථමනුයුත්තො අනිරාකතජ්ඣානො විපස්සනාය සමන්නාගතො බ්රූහෙතා සුඤ්ඤාගාරානං. (2)

4. ආකඞ්ඛෙය්ය චෙ භික්ඛවෙ භික්ඛු “යෙසාහං චීවරපිණ්ඩපාතසෙනාසනගිලානපච්චයභෙසජ්ජපරික්ඛාරං පරිභුඤ්ජාමි, තෙසං තෙ කාරා මහප්ඵලා අස්සු මහානිසංසා”ති, සීලෙස්වෙවස්ස පරිපූරකාරී -පෙ- බ්රූහෙතා සුඤ්ඤාගාරානං. (3)

5. ආකඞ්ඛෙය්ය චෙ භික්ඛවෙ භික්ඛු “යෙ මෙ ඤාතිසාලොහිතා පෙතා කාලකතා පසන්නචිත්තා අනුස්සරන්ති, තෙසං තං මහප්ඵලං අස්ස මහානිසංසන්ති,” සීලෙස්වෙවස්ස පරිපූරකාරී -පෙ- බ්රූහෙතා සුඤ්ඤාගාරානං. (4)

6. ආකඞ්ඛෙය්ය චෙ භික්ඛවෙ භික්ඛු “අරතිරතිසහො අස්සං න ච මං අරති සහෙය්ය, උප්පන්නං අරතිං අභිභුය්ය අභිභුය්ය විහරෙය්ය”න්ති, සීලෙස්වෙවස්ස පරිපූරකාරී -පෙ- බ්රූහෙතා සුඤ්ඤාගාරානං. (5)

7. ආකඞ්ඛෙය්ය චෙ භික්ඛවෙ භික්ඛු “භයභෙරවසහො අස්සං න ච මං භයභෙරවං සහෙය්ය, උප්පන්නං භයභෙරවං අභිභුය්ය අභිභුය්ය විහරෙය්ය”න්ති, සීලෙස්වෙවස්ස පරිපූරකාරී -පෙ- බ්රූහෙතා සුඤ්ඤාගාරානං. (6)

8. ආකඞ්ඛෙය්ය චෙ භික්ඛවෙ භික්ඛු “චතුන්නං ඣානානං ආභිචෙතසිකානං දිට්ඨධම්මසුඛවිහාරානං නිකාමලාභී අස්සං අකිච්ඡලාභී අකසිරලාභී”ති, සීලෙස්වෙවස්ස පරිපූරකාරී -පෙ- බ්රූහෙතා සුඤ්ඤාගාරානං. (7)

9. ආකඞ්ඛෙය්ය චෙ භික්ඛවෙ භික්ඛු “යෙ තෙ සන්තා විමොක්ඛා අතික්කම්ම රූපෙ ආරුප්පා, තෙ කායෙන ඵස්සිත්වා විහරෙය්ය”න්ති, සීලෙස්වෙවස්ස පරිපූරකාරී -පෙ- බ්රූහෙතා සුඤ්ඤාගාරානං. (8)