1. එවං මෙ සුතං: එකං සමයං භගවා සාවත්ථියං විහරති ජෙතවනෙ අනාථපිණ්ඩිකස්ස ආරාමෙ. අථ ඛො ජාණුස්සොණි බ්රාහ්මණො යෙන භගවා තෙනුපසඞ්කමි. උපසඞ්කමිත්වා භගවතා සද්ධිං සම්මොදි. සම්මොදනීයං කථං සාරාණීයං වීතිසාරෙත්වා එකමන්තං නිසීදි. එකමන්තං නිසින්නො ඛො ජාණුස්සොණි බ්රාහ්මණො භගවන්තං එතදවොච:

2. යෙ’මෙ භො ගොතම කුලපුත්තා භවන්තං ගොතමං උද්දිස්ස සද්ධා අගාරස්මා අනගාරියං පබ්බජිතා, භවං තෙසං ගොතමො පුබ්බඞ්ගමො. භවං තෙසං ගොතමො බහුකාරො භවං තෙසං ගොතමො සමාදපෙතා. භොතො ච ගොතමස්ස සා ජනතා දිට්ඨානුගතිං ආපජ්ජතීති.

3. “එවමෙතං බ්රාහ්මණ, එවමෙතං බ්රාහ්මණ. යෙ තෙ බ්රාහ්මණ, කුලපුත්තා මමං උද්දිස්ස සද්ධා අගාරස්මා අනගාරියං පබ්බජිතා, අහං තෙසං පුබ්බඞ්ගමො. අහං තෙසං බහුකාරො. අහං තෙසං සමාදපෙතා. මමඤ්ච පන සා ජනතා දිට්ඨානුගතිං ආපජ්ජතීති.

4. දුරභිසම්භවානි හි භො ගොතම, අරඤ්ඤෙ වනපත්ථානි පන්තානි සෙනාසනානි. දුක්කරං පවිවෙකං. දුරභිරමං එකත්තෙ. හරන්ති මඤ්ඤෙ මනො වනානි සමාධිං අලභමානස්ස භික්ඛුනොති.

5. එවමෙතං බ්රාහ්මණ, එවමෙතං බ්රාහ්මණ. දුරභිසම්භවානි හි බ්රාහ්මණ, අරඤ්ඤෙ වනපත්ථානි පන්තානි සෙනාසනානි. දුක්කරං පවිවෙකං. දුරභිරමං එකත්තෙ හරන්ති මඤ්ඤෙ මනො වනානි සමාධිං අලභමානස්ස භික්ඛුනොති. මය්හම්පි ඛො බ්රාහ්මණ, පුබ්බෙව සම්බොධා අනභිසම්බුද්ධස්ස බොධිසත්තස්සෙව සතො එතදහොසි: “දුරභිසම්භවානි හි ඛො අරඤ්ඤෙ වනපත්ථානි පන්තානි සෙනාසනානි. දුක්කරං පවිවෙකං. දුරභිරමං එකත්තෙ. හරන්ති මඤ්ඤෙ මනො වනානි සමාධිං අලභමානස්ස භික්ඛුනො”ති.

6. තස්ස මය්හං බ්රාහ්මණ එතදහොසි: යෙ ඛො කෙචි සමණා වා බ්රාහ්මණා වා අපරිසුද්ධකායකම්මන්තා අරඤ්ඤෙ වනපත්ථානි පන්තානි සෙනාසනානි පටිසෙවන්ති, අපරිසුද්ධකායකම්මන්තසන්දොසහෙතු හවෙ තෙ භොන්තො සමණබ්රාහ්මණා අකුසලං භයභෙරවං අව්හයන්ති; න ඛො පනාහං අපරිසුද්ධකායකම්මන්තො අරඤ්ඤෙ වනපත්ථානි පන්තානි සෙනාසනානි පටිසෙවාමි, පරිසුද්ධකායකම්මන්තොහමස්මි. යෙ හි වො අරියා පරිසුද්ධකායකම්මන්තා අරඤ්ඤෙ වනපත්ථානි පන්තානි සෙනාසනානි පටිසෙවන්ති, තෙසමහං අඤ්ඤතමො. එතමහං බ්රාහ්මණ පරිසුද්ධකායකම්මන්තං අත්තනි සම්පස්සමානො භිය්යො පල්ලොමමාපාදිං අරඤ්ඤෙ විහාරාය.

7. තස්ස මය්හං බ්රාහ්මණ එතදහොසි: යෙ ඛො කෙචි සමණා වා බ්රාහ්මණා වා අපරිසුද්ධවචීකම්මන්තා -පෙ- අපරිසුද්ධමනොකම්මන්තා -පෙ- අපරිසුද්ධාජීවා අරඤ්ඤෙ වනපත්ථානි පන්තානි සෙනාසනානි පටිසෙවන්ති, අපරිසුද්ධාජීවසන්දොසහෙතු හවෙ තෙ භොන්තො සමණබ්රාහ්මණා අකුසලං භයභෙරවං අව්හයන්ති; න ඛො පනාහං අපරිසුද්ධාජීවො අරඤ්ඤෙ වනපත්ථානි පන්තානි සෙනාසනානි පටිසෙවාමි, පරිසුද්ධාජීවොහමස්මි. යෙ හි වො අරියා පරිසුද්ධාජීවා අරඤ්ඤෙ වනපත්ථානි පන්තානි සෙනාසනානි පටිසෙවන්ති, තෙසමහං අඤ්ඤතමො. එතමහං බ්රාහ්මණ පරිසුද්ධාජීවතං අත්තනි සම්පස්සමානො භිය්යො පල්ලොමමාපාදිං අරඤ්ඤෙ විහාරාය.

8. තස්ස මය්හං බ්රාහ්මණ එතදහොසි: යෙ ඛො කෙචි සමණා වා බ්රාහ්මණා වා අභිජ්ඣාලූ කාමෙසු තිබ්බසාරාගා අරඤ්ඤෙ වනපත්ථානි පන්තානි සෙනාසනානි පටිසෙවන්ති, අභිජ්ඣාලු කාමෙසු තිබ්බසාරාගසන්දොසහෙතු හවෙ තෙ භොන්තො සමණබ්රාහ්මණා අකුසලං භයභෙරවං අව්හයන්ති. න ඛො පනාහං අභිජ්ඣාලු කාමෙසු තිබ්බසාරාගො අරඤ්ඤෙ වනපත්ථානි පන්තානි සෙනාසනානි පටිසෙවාමි, අනභිජ්ඣාලූහමස්මි. යෙ හි වො අරියා අනභිජ්ඣාලූ අරඤ්ඤෙ වනපත්ථානි පන්තානි සෙනාසනානි පටිසෙවන්ති, තෙසමහං අඤ්ඤතමො. එතමහං බ්රාහ්මණ අනභිජ්ඣාලුතං අත්තනි සම්පස්සමානො භිය්යො පල්ලොමමාපාදිං අරඤ්ඤෙ විහාරාය.