පට්ඨාන ප්‍රකරණ අධ්‍යයන ප්‍රවේශය, ශුද්ධ සංඛ්‍යා සහ ස්වරූපාර්ථ - කඩුවෙල අතුලඤාණ හිමි 2023.pdf
- කතෘ :
- කඩුවෙල අතුලඤාණ හිමි
- ප්‍රකාශිත වර්ෂය :
- 2022
- මුද්‍රිත වර්ෂය :
- 2022
- පිටු ගණන :
- 185
- බාගත කිරීම් ගණන :
- 1,738
- වෙබ් අඩවියට එක් කළ දිනය :
- 2023-02-14
- ගොනුවේ ප්‍රමාණය :
- 1.4 MB
පොතේ පිටු කිහිපයක ඡායාරූප පහතින් බලන්න.
පට්ඨාන ප්‍රකරණ අධ්‍යයන ප්‍රවේශය (ශුද්ධ සංඛ්‍යා සහ ස්වරූපාර්ථ) යනු අභිධර්ම පිටකයේ එන මහාප්‍රකරණ හෙවත් පට්ඨාන ප්‍රකරණය හැදෑරීම සඳහා මූලික අඩිතාලම සපයන මාර්ගෝපදේශී ග්‍රන්ථයකි. බුරුමයේ ඉන්සෙයින් ්‍යුවාමා පරියත්ති විහාරාධිපති භදන්ත ඌ. තිලෝකාභිවංස මහාස්ථවිරයන් වහන්සේ විසින් සම්පාදිත කෘතියක් ඇසුරෙන්, ශාස්ත්‍රපති පූජ්‍ය කඩුවෙල අතුලඤාණ හිමියන් විසින් මෙම කෘතිය සිංහල බසට නංවා සකස් කර ඇත.
පට්ඨානය හැදෑරීමේ දී මතක තබාගත යුතු ශුද්ධ සංඛ්‍යා, විසිහතරක් වූ ප්‍රත්‍යයන්ගේ ස්වරූපාර්ථ සහ මූලික කරුණු මෙමගින් සංක්ෂේපයෙන් හා ක්‍රමානුකූලව ඉදිරිපත් කර තිබේ. පුරාණ මහා විහාරීය පරියප්ති සම්ප්‍රදාය හා බුරුම සම්ප්‍රදාය අනුව වාචෝද්ගාත කිරීම හෙවත් කටපාඩම් කිරීම පහසු වන අයුරින් මෙය සම්පාදනය කර ඇත.
මෙම ප්‍රථම මුද්‍රණය බුද්ධ වර්ෂ 2566 (ක්‍රි.ව. 2022) දී අනුරාධපුර සද්ධිතිස්සාරාම මහා විහාරයේ ථේරවාද පබ්ලිකේෂන්ස් සොසයිටි (Theravada Publications Society Limited) මගින් ධර්ම දානයක් ලෙස මුද්‍රණය කර ප්‍රකාශයට පත් කර ඇත.
සබ්බදානං ධම්මදානං ජිනාති
අභිධර්ම පිටකයට අයත් පට්ඨානප්‍රකරණය හැදෑරීමට අත්වැලක් ලෙස සකස් කළ “පට්ඨානප්‍රකරණ අධ්‍යයන ප්‍රවේශය - ශුද්ධ සංඛ්‍යා සහ ස්වරූපාර්ථ” නමැති ග්‍රන්ථය මුද්‍රණය කරන්නට ලැබීම ඉමහත් ධර්ම ප්‍රීතිය උපදවන්නක් බව කිව යුතුය. ඊට හේතුව නම් සම්මා සම්බුදුරජාණන් වහන්සේගේ අතිශය ගැඹුරු වූ ධර්මය හදාරන්නට කියවන්නට එය අනුව ප්‍රායෝගිකව සිය දිවියට යොදා ගන්නට කැමැති ගිහි පැවිදි බොහෝ දෙනෙකු සිටින බැවිනි. එසේ ම මෙම මුද්‍රණය සඳහා අවකාශ ලැබෙන්නේ ද එවැනි ම දායක පිරිස නිසා මෙන් ම ඔවුන්ගේ සසුනට හිතකාමී ධර්මයට විනයට ලැදි භාවය නිසා ම යැයි කීම අතිශයෝක්තියක් නොවනු ඇතැ’යි සිතමි.
තථාගත දේශනාව සිහි කරන අප සෑම දන්නා කාරණය නම් “සියලු දානයට වඩා ධර්ම දානය උතුම් බව” යි. ධර්මය නො අසන්නාහු නම් සත්ත්වයෝ හැන්දක් පමණ කැඳ හෝ බත් හෝ දන් නො දෙන්නාහ. එසේ ම සියලු ම බුදුරජාණන් වහන්සේලා සහ පසේ බුදුරජාණන් වහන්සේලා හැරපියා කල්පයක් පුරාවට වැසි වසින කල්හි වැහි බිංදු වුව ද ගණන් කිරීමට හැකි ප්‍රඥාවෙන් සමන්විත වූ සැරියුත් ආදි තෙරවරු වුව ද ස්ව ඥානයෙන් ම සෝවාන් ආදි මග පල ලබන්නට සමත් නො වෙති. අස්සජී තෙරුන් වහන්සේලා විසින් කියනු ලැබූ ධර්මය ම අසා මග පල ලැබූහ. සම්මා සම්බුදුරජාණන් වහන්සේගේ ධර්මදේශනාවෙන් ශ්‍රාවක පාරමී ඥානය සාක්ෂාත්කාර කළහ. එබැවින් ධර්ම දානය උතුම් වේ.
මුද්‍රණය සඳහා අවස්ථාව සලසා දෙන පින්වත් දායකයන් විසින් කරනු ලබන්නේ ද ධර්ම දානමය පුණ්‍ය කර්මයකි. බුදුරජාණන් වහන්සේ විසින් ශ්‍රී මුඛයෙන් දේශිත ථේරීය පරම්පරානුයාත ව අපට ලැබුණු මහාප්‍රකරණ නම් පට්ඨානප්‍රකරණ හැදෑරීමට මාර්ගෝපදේශනය කරන මෙම ග්‍රන්ථය මුද්‍රණය කොට සැදැහැතියන් වෙත ධර්මයෙහි නැඹුරු වන්නන් වෙත බෙදා දීමට කළ අදහස ද ප්‍රශංසාර්භ ය.
එබැවින් මේ සඳහා දායක වන්නා වූ දේශාන් අලහකෝන් මහතා, කේ. එල්. චන්ද්‍රතිලක මහතා, වෛද්‍ය සමිතා චන්ද්‍රතිලක මහත්මිය, ගණනාත් චන්ද්‍රතිලක මහතා, මෙවන් දිසානායක මහතා යන දායක පිරිසට මෙම ධර්ම දානමය පින හේතුකොටගෙන චතුරාර්ය සත්‍ය ධර්මාවබෝධය තුළින් නිර්වාණ සුවය සාක්ෂාත් කරගන්නට උපකාර වේවා යි ඉත සිතින් ආශිංසනය කරමි. තව ද දේශාන් අලහකෝන් මහතාගේ සුජීවත්ව සිටින දෙමව්පියන් නිදුක් නීරෝගී චිරජීවනය පිණිස ද මෙම කුසල ශක්තිය හේතු වේවා.
මීට,
මෙත් සිතින්,
පූජ්‍ය කඩුවෙල අතුලඤාණ හිමි.
පූජ්‍ය කඩුවෙල අතුලඤාණ හිමි.
තිපිටක කම්මට්ඨාන විහාරය,
උතුරු ශැන් ප්‍රාන්තය,
නෞන්ජෝ නගරය,
මියන්මාරය.
2022-12-18
ඇදුරු ආශීර්වාදය
“පට්ඨාන ප්‍රකරණ අධ්‍යයන ප්‍රවේශය - ශුද්ධ සංඛ්‍යා සහ ස්වරූපාර්ථ” නමින් අද දින ප්‍රකාශයට පත් වන මෙම ග්‍රන්ථය පට්ඨානප්‍රකරණය හැදෑරීමේ දී ශිෂ්‍යයා විසින් අත්‍යවශ්‍යයෙන් ම මතක තබා ගතයුතු කොටස් සහ මූලිකව අධ්‍යයනය කළයුතු කොටස් සංක්ෂේපයෙන් දැක්වීම පිණිස විරචිත අගනා ග්‍රන්ථයකි.
අභිධර්මය ත්‍රිපිටක පාලියෙහි ඇතුළත් පරම ගම්භීර ධර්මය යි. එහි ද පරම ගම්භීර වනුයේ පට්ඨාන මහාප්‍රකරණය යි. එබැවින් පට්ඨාන ප්‍රකරණය හදාරණ ශිෂ්‍යයින් පළමුව පට්ඨානයෙහි ස්වරූපාර්ථ හා මූලික කරුණු ගැන පැහැදිලිතාවයක් ඇති කරගැනීම බොහෝ සෙයින් විෂය පහසු කරවීම පිණිස හේතු වෙයි. පුරාණ මහා විහාරීය පරියප්ති සම්ප්‍රදාය තුළ කුසල ත්‍රික පට්ඨානයෙහි සේ ම, පට්ඨාන ප්‍රකරණය පුරාවටමත් එන ස්වරූපාර්ථ කෙරෙහි විශේෂ අවධානයක් යොමු කළේ මේ හේතුවෙනි. බුරුම රට පට්ඨානය ඉගැන්වෙන සෑම පන්තියක දී ම මෙබඳු පොතක් භාවිතා කිරීම අනිවාර්ය ය. සියවස් ගණනාවක් පුරා අභිධර්ම අධ්‍යයන ක්‍රමය සුරක්ෂිත කළා වූ එරට මෙබඳු ග්‍රන්ථ සුලභ ය. එනමුත් ලක්දිව දක්නට නොලැබෙන මෙම ශුද්ධ සංඛ්‍යා සහ ස්වරූපාර්ථ වාචෝද්ගාතකරණ ග්‍රන්ථය සිංහල භාෂාවෙන් රචනා කිරීම නියඟයට වට පිනි පොදක් සේ අතිශය විරල ශාසනික මෙහෙවරකි.
මහා විහාර වංශාලංකාර, අභිධර්මඤ්ඤෙය්‍යනිධජ, ශාසන ජෝතික, ථේරවාදී ධර්ම අධ්‍යයන පීඨයේ කථිකාචාර්ය, ශාස්ත්‍රපති, ත්‍රිපිටකාචාර්ය කඩුවෙල අතුලඤාණ ස්ථවිරයන්වහන්සේ අවුරුදු කිහිපයක් පුරාවට බුරුම රට පරියප්ති මධ්‍යස්ථානයන් හි සැරිසරමින් ඒ ඒ තැනින් උගත යුතු ධර්ම කොටස් මනාව හදාරමින් විශේෂයෙන් ම අභිධර්මය පිළිබඳ විශේෂඥ දැනුමක් ඇතිකරගත් යතිවරයෙකි.
පරියප්තිය අතුරුදන් වීමේ දී පළමුව අතුරුදන් වන පට්ඨාන ප්‍රකරණ අධ්‍යයන ක්‍රමය නැවත ලක්දිව පිහිටුවමි යි උදාර චේතනාවෙන් කටයුතු කරන අතර තමන් වහන්සේ විසින් උගත් පට්ඨානය දිද්දෙණිය අරණ්‍ය සේනාසනවාසී සඟ පිරිසට හැදෑරවීම සඳහා පවත්වන දේශනා මාලාවට උපකාරක ලේඛන සැකසීමේ දී මෙම ග්‍රන්ථය සම්පාදනය විය. එහි දී ශිෂ්‍ය භික්ෂූන් වහන්සේලා විසින් මෙහි එන කරුණු කටපාඩම් කොට අධ්‍යයනයෙහි යෙදීම අනිවාර්ය ය.
මෙකල බොහෝ උගත් යැයි සම්මත වූවෝ වාචෝද්ගාත කිරීම අත්‍යවශ්‍ය නොවූවක් ලෙස සළකති. එනමුදු “සුතා ධතා වචසා පරිචිතා මනසානුපෙක්ඛිතා දිට්ඨියා සුප්පටිවිද්ධා” යන දේශනා පාඨයෙන් පරියප්තිය වචනයෙන් පුහුණු කිරීම ධර්ම ප්‍රතිවේධ මාර්ග යෙහි විශේෂාංගයක් බව ප්‍රකට වන්නේය. නූතන ලාංකික භික්ෂූන් වහන්සේලා පැවිද්දෙහි මුල දී ම වාචෝද්ගාත කළ යුතු සාමණේර බණදහම් පොත, පිරිවානා පොත් වහන්සේ වැනි ප්‍රාථමික ග්‍රන්ථ පවා ග්‍රහණයෙහි උත්සාහ නොදැරීම සංවේගයට කරුණකි. එබඳු ග්‍රන්ථ වාචෝද්ගාත කොට හුරු වීමෙන් පසුව පාලි ව්‍යාකරණ සහ පිටක ග්‍රන්ථ වෙත පිවිසෙන භික්ෂුව පහසුවෙන් සමස්ත ත්‍රිපිටකය ම අධ්‍යයනය කරනු ඇත. එහෙයින් බුද්ධාදි නුවණැති උතුමන් විසින් ප්‍රශංසා කරන ලද වාචෝද්ගාතකරණයෙහි යෙදී සද්ධර්මය පන්දහසක් කල් සුරකිත්වා’යි අපේ පැතුම යි.
කතුවරයන් වහන්සේ බුරුම දේශයට වැඩම කරනුයේත්, එම දේශයේදී ඉගෙන ගැනීම් කටයුතු කරනුයේත් ගුරුවරුන්ගේ ආරාධනා හා ආශීර්වාදය ඇතිව වීමත් විශේෂත්වයකි. ගතින් සැතපුම් දහස් ගණනකින් ඈත සිට මේ කටයුතු වල නියුතු වූ ඒ සත්පුරුෂ ශිෂ්‍යවරයා, සිතින් ගුරුශිෂ්‍ය සබඳතා කිසි ලෙසකින්වත් අත් නො හළේය. හැකි සෑම විට ගුරුන් විමසා කටයුතු කිරීමට වගබලාගත් බව ද කිවමනා ය.
එබඳු සත්පුරුෂ උගතෙකු අතින් අද දින අභිධර්ම පරියප්තිකාමීන් හට පිදෙන මෙම “පට්ඨාන ප්‍රකරණ අධ්‍යයන ප්‍රවේශය - ශුද්ධ සංඛ්‍යා සහ ස්වරූපාර්ථ” නම් කෘතිය බුදුසසුනේ චිරපැවැත්මට හේතුවනු නොඅනුමාන යි. තව ද එය සහශ්‍ර සංඛ්‍යාත සිසුන් පිරිසකට පට්ඨානප්‍රකරණය පහසුවෙන් ඉගෙනීමට මහත් පිටුවහලක් වනු ඇත.
මේ සිසුවරයා නිර්මාණය කිරීම වෙනුවෙන් අප කළ හැම ශාසන සංග්‍රහයකට ම ප්‍රතිසාධාරණයක් ඔහු විසින් ඉටු කරනු දැක, ගුරුවරයෙකු වශයෙන් මහත් සේ සොම්නස් වෙමි.
කඩුවෙල අතුලඤාණ ස්ථවිරයන්වහන්සේගේ ධර්මඥාන හා ශාස්ත්‍රඥාන තවතවත් දියුණු වේවා! ලක්දිව බුදු සසුනට එය ආලෝකයක් වේවා!
මෙයට සසුන් දියුණුව පතන මා, නුවරඑළියේ ඤාණසීල මහාස්ථවිර.
මෙයට සසුන් දියුණුව පතන මා,
නුවරඑළියේ ඤාණසීල මහාස්ථවිර.
බුරුම ග්‍රන්ථයේ කතුවර ඌ. තිලෝකාභිවංස මාහිමිපාණන් වහන්සේගේ ආශිංසනය
විඤ්ඤාපනමිදං භවතු සබ්බමංගලං
අයං තාව පට්ඨානපාහතසංඛාතො ගන්ථො මරම්මපාළිමිස්සිතභාසාය විරචිතො චෙව යාවජීවං වාචිතො ච සුඛුග්ගහණාය සුඛවාචනාය සුඛධාරණාය සුඛෙන ධම්මසාකච්ඡාය විසෙසෙන බුද්ධඅභිධම්මස්ස ච බුද්ධසාසනස්ස ච චිරට්ඨිතියා මම සන්තිකෙ සම්මාසම්බුද්ධභාසිතං අභිධම්මපට්ඨානසාසං උග්ගණ්හන්තානං සිස්සානුසිස්සානං. සො හි ගන්ථො මරම්මරට්ඨෙ යාවජ්ජතනා බහුපකාරො හොති යෙභුය්‍යෙන අභිධම්මපට්ඨානං පරිචිතානං බහුභික්ඛුසාමණෙරානං වා බහුසීලවතීනං වා බහුඋපාසකඋපාසිකානං වා.
ඉදානි පනම්හාකං මරම්මරට්ඨතො අඤ්ඤත්ථ සිරිලංකාදීපරට්ඨෙ වසන්තා සොතාරාපි ධම්මසුතෙසිනාපි අභිධම්ම පට්ඨානං පරිචිතුකාමා හොන්ති. තෙසං ච අත්ථාය හිතාය සුඛාය “පට්ඨානපාහත”න්ති නාමකො මම ගන්ථො පුන මාපිතො සිරිලංකාදීපරට්ඨියකෙන ආයස්මතා භද්දන්ත අතුලඤාණෙන. කථං? මරම්මපාළිමිස්සභාසාතො අඤ්ඤරට්ඨියකභාසාභූතං ලංකාදීපෙ බහුජනවලඤ්ජිතං සීහළභාසං පරිවත්තෙත්වා.
තෙන ච ථෙරෙන සීහළභාසාය විරචිතො සො භාසාපරිවත්තිතගන්ථො බහුපකාරො හොති බහුකානං සුතෙසීනං සිස්සානුසිස්සානං බුද්ධසාසනස්ස ච. එවඤ්ච කත්වා තං ආයස්මන්තං අතුලඤාණං මයම්පි සම්මා පස්සාම ගුණපොමනං කරොමාති.
අභිධම්මො පට්ඨානං ච - ඨාතු හාතු චිරං චිරං සබ්බෙ දෙවානුරක්ඛන්තු - සුඛන්තු සබ්බදා පජා
භද්දන්ත තිලෝකාභිවංසො (පට්ඨානපාහතගන්ථකාරකො) ඉන්සෙයින්යුචාමා පරියත්තිවිජ්ජාලයාධිපති, ඉන්සෙයින් නගරෙ, වෙරික්ඛයමහානගරෙ, මරම්මරට්ඨෙ
භද්දන්ත තිලෝකාභිවංසො (පට්ඨානපාහතගන්ථකාරකො)
ඉන්සෙයින්යුචාමා පරියත්තිවිජ්ජාලයාධිපති, ඉන්සෙයින් නගරෙ,
වෙරික්ඛයමහානගරෙ, මරම්මරට්ඨෙ