පාවචන න්‍යාය නෙත්තිප්පකරණ - මඩබාවිට ඤාණාවාස හිමි 1950.pdf
- කතෘ :
- මඩබාවිට ඤාණාවාස හිමි
- ප්‍රකාශිත වර්ෂය :
- 1950
- මුද්‍රිත වර්ෂය :
- 1950
- පිටු ගණන :
- 118
- බාගත කිරීම් ගණන :
- 586
- වෙබ් අඩවියට එක් කළ දිනය :
- 2023-01-27
- ගොනුවේ ප්‍රමාණය :
- 55 MB
පොතේ පිටු කිහිපයක ඡායාරූප පහතින් බලන්න.
පාවචන න්‍යාය යනු ප්‍රාචීන භාෂෝපකාර සමිතියේ අවසාන පරීක්ෂණය (පණ්ඩිත උපාධිය) වෙනුවෙන් අලව්වේ ශ්‍රී රාහුල පරිවෙණස්ථ උප ප්‍රධානාචාර්ය පණ්ඩිත මඩබාවිට ඤාණාවාස ස්ථවිරයන් වහන්සේ විසින් සම්පාදනය කරන ලද අගනා ග්‍රන්ථයකි. ත්‍රිපිටක ධර්මය නිසියාකාරව වටහා ගැනීම පිණිස නෙත්තිප්පකරණය හා එහි අටුවාව ඇසුරු කරගනිමින් මෙම කෘතිය රචනා කර ඇත.
මෙහි ප්‍රස්තාවනාවෙහි දැක්වෙන පරිදි බුද්ධ දේශනාව විවරණය කෙරෙන නෙත්ති ක්‍රමය හා පෙටකොපදෙසය පිළිබඳ පසුබිමද, සූත්‍ර, අභිධර්ම සහ විනය පිටකයන්හි නය ක්‍රමයන්ද මෙමගින් මනාව පැහැදිලි කෙරේ. පානදුරේ වලාපොල ශ්‍රී සද්ධර්මෝදය පරිවෙණාධිපතිව වැඩ විසූ කෝදාගොඩ උපසේන මහා නායක හිමියන්ගේ නෙත්ති රත්නාකාරය ආදී පැරණි ග්‍රන්ථයන්හි ආභාසයද මේ සඳහා ලැබී ඇත.
මෙම කෘතිය බුද්ධ වර්ෂ 2494 හෙවත් ක්‍රි.ව. 1950 දී ශ්‍රී රාහුල පාරිවේණික ආදි ශිෂ්‍ය සමිතියේ ආධාරයෙන් මුද්‍රණය කරවා ප්‍රකාශයට පත් කර තිබේ.
සංඥාපනය.
ප්‍රාචීන භාෂෝපකාර සමිතිය මගින් පවත්වනු ලබන අවසාන පරීක්‍ෂණයෙන් එතෙර වන්නන් විසින් පණ්ඩිතෝපාධිය පිණිස පොතක් ලිය යුතුයයි පැණවුණු ව්‍යවස්ථාව අනුව ත්‍රිපිටක ධර්මය නිසියාකාර තේරුම් ගැනීමේ පහසුව සලකා නෙත්තිප්පකරණය හා එහි අටුවාව ආශ්‍රය කොට ගෙන “පාවචන න්‍යාය” නමින් මේ ග්‍රන්ථය නිපදවන ලදී. එසේම මේ පොත පණ්ඩිතෝපාධි ප්‍රදානයට සුදුසු යයි සම්මත කරන ලදී.
එබැවින් මාගේ විශේෂාභිවාදය එම ප්‍රාචීන භාෂෝපකාර සමිතියට හිමිවිය යුතු බැව් සාතිශය ප්‍රීතියෙන් පළමුකොට සඳහන් කෙරෙමි.
ත්‍රිපිටක දේශනාව පිළිබඳ මේ නෙත්ති න්‍යායය පළමු කොට ප්‍රකාශ කරන ලද්දේ තථාගතයන් වහන්සේ සැකෙවින් වදාරණ ලද්ද විස්තාර වශයෙන් බෙදාලන්නවුන් අතුරෙන් අග්‍ර තැන්පත් වූවකු හැටියට ජීවමාන බුදුරජාණන් වහන්සේ කෙරෙන් අග්‍ර තනතුරු ලත් සිවුපිළිසිඹියාපත් මහාකාත්‍යායන මහරහතුන් වහන්සේ විසිනි. උන්වහන්සේ විසින් රචනා කරන ලද ග්‍රන්ථය “පෙටකොපදෙසය” යිද නෙත්තිප්පකරණය ඉන්පසු යම්කිසි ත්‍රිපිටකධාරී බුද්ධිමතෙකු විසින් පෙටකොපදෙසය ආශ්‍රය කොට ගෙන රචනා කරන ලද්දෙකැයිද සමහරු කියති. “මහා කච්චායනෙන නිද්දිට්ඨො” යනාදී නෙත්තිප්පකරණ පාඨයද සාක්ෂිකොටද දක්වති. එය උන්වහන්සේගේම කෘතියක් වීනම් “මයා නිද්දිට්ඨො” යි පැවසීම වඩා උචිත වන බැවින් අපිදු ඒ කියමන පිළිගනිමු.
බුද්ධ වචනය නිසිසේ අවබෝධ කරගනු කැමැති සියල්ලන් විසින් නෙත්ති න්‍යාය සබඳ පටුතර ඥාණයක් ඇතිකර ගත යුත්තේය. බුද්ධ වචනය පිළිබඳ ගැඹුරු ඥාණය ඇතිකර ගැනීමට උපකාර වූ න්‍යායය මෙයින් ප්‍රකාශ වන බැවින් මෙය ධර්ම සංග්‍රහයක්ම වන්නේය.
නෙත්තිප්පකරණය ළඟ අතීතයෙහිද ත්‍රිපිටකය හදාරන්නන් කෙරෙන් තරමක් ඈත්ව තිබුණේය. ප්‍රාචීන භාෂෝපකාර සමිතියේ අවසාන විභාගයට එය නියමකොට තිබීම එය හදාරන්නවුන් බහුලවීමට අනුබලයක් විය.
බුද්ධ ශාසන මහා සුර සේනාපති යන උපාධි නාමයකින් විශිෂ්ඨ වූ ඇම්. ධර්මරත්න ලක්මිණි පහන් කතුතුමා විසින් ප්‍රණීත වූ නෙත්ති ප්‍රදීපයද පිටකත්‍රයෙහි ප්‍රවීණ ඥාණයක් ඇතිව විසූ අස්මදාචාර්‍ය්‍ය පානදුරේ වලපොල ශ්‍රී සද්ධර්මෝදය පරිවෙණාධිපතිව වැඩ විසූ ත්‍රිපිටක වාගීශ්වරාචාර්‍ය්‍ය කෝදාගොඩ උපසේන මහා නායක ස්ථවිර ස්වාමින් වහන්සේ විසින් නෙත්ති න්‍යායය සූත්‍ර පාඨයන් උදාහරණ ක්‍රමයෙන් දක්වා විරචිතවූ “නෙත්ති රත්නාකාර” නම් ග්‍රන්ථයද උන්වහන්සේ විසින්ම කරන ලද නෙත්ති සන්නයද මෙය උගනු කැමැත්තවුන්ගේ පහසුව පිණිස මෑත කාලයෙහි විරචිතවූ ග්‍රන්ථයෝය.
යථෝක්ත අස්මදාචාර්ය කෝදාගොඩ උපසේන මහා නායක ස්වාමින් වහන්සේද උන්වහන්සේගේ අග්‍ර ශිෂ්‍යව සිටි සමුද්‍රාසන්නවූ බුද්ධදත්ත ස්වාමින් වහන්සේද කෘතගුණ පූර්වකව මෙහි ලා අනුස්මරණය කෙරෙමි.
එසේම යථෝක්ත මහා නායක ස්වාමින් වහන්සේගේ ශිෂ්‍යයෙකු වූද පානදුරේ ගොරකාපොල විද්‍යාරාජ පිරිවෙන් අග්‍රශිෂ්‍යවූද දැනට මාතම්මන ජයවර්ධනාරාමාධිපතිව වැඩ වසන කලවානේ සිරි ධම්මාලොක පණ්ඩිත ස්ථවිර ස්වාමින් වහන්සේ මේ කෘතිය සඳහා ගුරුපදේශ දීමෙන්ද මුද්‍රණයේදී ශෝධ්‍ය පත්‍ර බලා දීමෙන්ද කරන ලද උපකාරය ගෞරවයෙන් සිහිපත් කෙරෙමි.
තවද මේබඳු ග්‍රන්ථ රචනාවක් කිරීමේ භාග්‍යය ලබාදුන් මාගේ ආචාර්ය්‍යවරයාණන් මේ අවස්ථාවේදී සිහිකිරීම මගේ යුතුකමකි. ශාසනාභිවෘද්ධිය අපේක්ෂා කොටගෙන මා පැවිදි කිරීමෙන් ධර්ම විනයෙහි හා ශබ්ද ශාස්ත්‍රයෙහි මා හික්මවූ අලව්වේ ශ්‍රී රාහුල පරිවෙණාධිපති සද්ධර්ම ලේඛකාචාර්ය්‍ය සද්ධර්මකීර්ති පූජ්‍ය පණ්ඩිත ශ්‍රී රතනාලංකාර මහා ස්ථවිර ස්වාමීන් වහන්සේ අත්‍යන්ත ගුරු ගෞරවයෙන් ස්මරණය කෙරෙමි. දැනට මෙම රාහුල පිරිවෙන්හි උපාචාර්‍ය්‍ය පණ්ඩිත උපාලි ස්ථවිරයන් වහන්සේද ගල්පොත්තේ පොල ශාසනවංශ ස්ථවිරයන් වහන්සේද උපකාරි පූර්වකව සිහිකෙරෙමි.
මෙම පොත රචනා කොට කලක් ගතවුවද මුද්‍රණයෙන් ප්‍රකාශයට නොපැමිණුවන ලද්දේ ඒ සඳහා වියදම් කිරීමට ත්‍යාගශීලි උතුමෙකු ඉදිරිපත් නොවූ බැවිනි. එහෙත් මෙය මුද්‍රණය කරවීම සඳහා මෙම පිරිවෙනේ ආදි ශිෂ්‍ය, වෛද්‍යාචාර්‍ය්‍ය ඩී. රණසිංහ, බෝයවලන්නේ ආතර් තිලකරත්න, පාඨශාලාචාර්‍ය්‍ය ජේ. ඒ. විජේසූරිය, පාඨශාලාචාර්‍ය්‍ය ආර්. ඇස්. ඒ. ඇම්. කරුණාරත්න, කලාචාර්‍ය්‍ය එච්. ඒ. කිරිබණ්ඩා, සංගීතාචාර්‍ය්‍ය කේ. ඇම්. ආනන්ද ප්‍රසාද්, පී. පී. මඩවල, මඩවල ජයවීර මුනිදාස, තුල්හිරියේ ඇම්. පී. ඩිංගිරිබණ්ඩා, විල්ගමුවේ ඇන්. බී. හේරත්, මංගෙදර කේ. ඒ. පොඩි අප්පුහාමි, මෝරුගම කේ. ජී. ඇඩ්වින්, අලව්වේ ඩී. ඒ. සෝමදාස, මීරිගම ඩී. පි සුබසිංහ, කොහොලානේ ජී. කරුණාරත්න, පාඨශාලාචාර්‍ය්‍ය කේ. පතිරණ, යන මහතුන් මේ සඳහා විශේෂාධාර කළ බැව් ස්තුති පූර්වකව මෙයින් සිහිකෙරෙමි.
තවද මාගේ දියුණුව සඳහා මුල පටන් ආධාර කාරිවූ අලව්වේ ඇම්. පුංචිබණ්ඩා රාලහාමි ප්‍රධාන සහෝදර මහතුන් ඇතුළු ශ්‍රී රාහුල පරිවේණස්ථ දායක සභාව හා විශේෂයෙන් පී. ඇම්. පී. රත්නායක නීතිඥතුමන්ද මෙය මුද්‍රණයේදී විශේෂ උනන්දුවෙන් ක්‍රියා කළ කොළඹ එවර්ඩ් සහ සමාගමේ මහතුන්ද ස්තූති පූර්වකව සිහි කෙරෙමි.
තවද මේ සත්කෘතියෙන් ජනිත පුණ්‍යය අපවත්වූ මාගේ මව්පිය බන්ධු මිත්‍රාදීන්ට හා සියළු සත්ව සමූහයාටද සැප පිණිස පවතිවායි සම්ප්‍රාර්ථනය කෙරෙමි. මෙය සර්ව නිර්දෝෂී කෘතියෙකැයි අපි නොකියමු. මෙහි යම්කිසි ඌනාතිරික්තතාදී දෝෂයක් වේනම් සුධීහු අනුකම්පාවෙන් එය ප්‍රකාශ කිරීමෙන් ධර්ම සංග්‍රහය කෙරෙත්වා!
නැවත මුද්‍රණය කිරීමේදී මෙය වඩා පිරිසිදු ලෙස හා විස්තර ලෙසත් සකස්කොට ප්‍රකාශ කිරීමට බලාපොරොත්තුවෙමි.
මීට,
මඩබාවිට, ඤාණාවාස ස්ථවිර.
ශ්‍රී: බු: ව: 2494 බිනර පුරපසළොස්වක් ලත් සඳු දින
අලව්වේ ශ්‍රී රාහුල පිරිවෙනේදීය.