සාමණේර විනය - මාතර ධම්මවංස හිමි 1938.pdf
- කතෘ :
- මාතර ධම්මවංස හිමි
- ප්‍රකාශිත වර්ෂය :
- 1938
- මුද්‍රිත වර්ෂය :
- 1938
- පිටු ගණන :
- 209
- බාගත කිරීම් ගණන :
- 763
- වෙබ් අඩවියට එක් කළ දිනය :
- 2022-11-17
- ගොනුවේ ප්‍රමාණය :
- 20 MB
පොතේ පිටු කිහිපයක ඡායාරූප පහතින් බලන්න.
සාමණේර විනය යනු මාතර වල්පොල සිරිමංගල පිරිවෙනෙහි ආචාර්යය පූජ්‍ය පණ්ඩිත මාතර ශ්‍රී ධම්මවංස ස්ථවිරයන් වහන්සේ විසින් සම්පාදනය කරන ලද සාමණේර භික්ෂූන් වහන්සේලා උදෙසා වූ වත්පිළිවෙත් හා ධර්ම විනය සංග්‍රහයකි.
මරදානේ චන්ද්‍රසේන පුස්තකාලයාධිපති එච්. කේ. ඩී. චන්ද්‍රසේන මහතාගේ ඉල්ලීම පරිදි සම්පාදනය කර බුද්ධ වර්ෂ 2482 (ක්‍රි.ව. 1938) දී ප්‍රකාශයට පත් කරන ලද මෙම කෘතිය, පැවිදි වීමට අපේක්ෂිත කුලදරුවන්ට සහ නවක සාමණේර හිමිවරුන්ට පාඩම් කරගත යුතු තිසරණ පන්සිල්, බුද්ධ වන්දනා, පිරිත් සූත්‍ර, පැවිදි විධි, වත්පිළිවෙත් සහ ධම්මපද ගාථා ඇතුළු කරුණු රැසකින් සමන්විත වේ.
සංඥාපනය.
පැවිදි වනු කැමති කුල දරුවන් විසින් ද පැවිදි වූ නව හේරණ තැන් විසින් ද දත යුතු වූ ද වාචොද්ගත කළ යුතු වූ ද ධර්ම විනය කොටස් මෙහි ඇතුළත් ය. වත්තක්ඛන්ධ පාළිය ඇතුළත් කරන ලද්දේ විශේෂයෙන් එය පාඩගත කරවනු සඳහා ය. එයින් පාලි භාෂාව පිළිබඳ විශේෂ පුහුණුවෙක් ද වේ. ඒ ඒ තන්හි දී ම එහි අර්ථ ආචාර්‍ය්‍ය වරයන් විසින් අතවැස්සනට තේරුම් කැරැ දිය යුතු. වත් නොදැන්මෙන් අතවැස්සෝ වරද කෙරෙති.
දෝෂ ප්‍රත්‍යක්ෂ වැ දුටු විට “පුරාණදේ ය” යි නො සිතා නො බා බැහැර කළ යුතු. අර්ථ වශයෙන් නිස්සාර වූ ව්‍යාකරණ වශයෙන් සදෝෂ වූ වන්දනා ගාථාදිය පුරාණය යන මතයෙන් උගත්තු පවා අද ද ව්‍යවහාර කරති. “තං තෙජසා භවතු තෙ ජයමඞ්ගලානි” යි ක්‍රියා කාරක සම්බන්ධ ය පවා නො සලකා සෙත් වඩති. මෙහි එබඳු තැන් කීපයක් අප අදහස් පරිදි සකස් කෙළෙමු.
භික්ෂූන් වහන්සේගේ ගුණ පරිහානිය ශීඝ්‍රයෙන් දියුණු වේ. උන්වහන්සේ මතුයෙහි අපවාද වැසි වසී. ශ්‍රමණ ශාක්‍ය පුත්‍රයන් සම්‍යක්කාරයෙන් විනීත වූ ද ශීලසම්පන්න වූ ද බුද්ධිමත් වූ ද උතුමන් විය යුතු “තුමු කවුරුදැ”යි තමන් ම නොදත් ශ්‍රමණ කණ්ඩකයන් දක්නට ලැබීම සර්වඥ ශාස්තෘන් වහන්සේගේ උතුම් ශාසනයට අගෞරවයෙක. එ බන්දන් ශාසනයෙන් බැහැර විය යුතු.
අලුත පැවිදි වන්නන් කෙරෙහි විශේෂ අපේක්ෂාවක් ඇති කළ යුතුය. මතු ශාසන භාරය වන්නේ ඔවුන් වන බැවිනි. එබන්දන් උදෙසා පඤ්චපලාස විද්‍යාලය පිහිටුවා එහි පුහුණුව ලබාදිය යුතු. සාමණේර වරයන්ගේ ධර්ම විනය ශබ්දශාස්ත්‍රාභ්‍යාසය සඳහා සාමණේර විද්‍යාලය පිහිටුවිය යුතු.
උපසම්පන්න වැ තිස සමාදන් වැ ත්‍රිපිටකාභ්‍යාස වර්ධනය සඳහා නිස්සාය විද්‍යාලය පිහිටුවිය යුතු. ඒ ඒ තන්හි අභෙද්‍ය ව්‍යවස්ථා ඇති කොට ඒ මඟින් භික්ෂූන්ගේ ප්‍රතිපත්ති ද ප්‍රඥා ද වර්ධනය කළ යුතු. ඒ ඒ නිකාය වල කාරක සභා මඟින් මෙය කළ හැක්කේ ය.
මේ ග්‍රන්ථය අප විසින් සම්පාදනය කරන ලද්දේ එච්. කේ. ඩී. චන්ද්‍රසේන මහතුන්ගේ අයැදීමෙනි. මතු මෙය මීට වඩා විශේෂයකින් පිළියෙළ කරන්නට අපේක්ෂා කරමු.
“ආකාසට්ඨා ච භුම්මට්ඨා” යනාදි ගාථාවෙහි සබ්බෙ දෙවා මහින්දිකා යනු “දෙවා නාගා මහින්දිකා” යි සකස් කැරැ ගත යුතු යි.
මාතර ශ්‍රී ධම්මවංස ස්ථවිර.
2482
1938 8-5 වැනි දින
අහංගම විජයශ්‍රීමඞ්ගලාරාමයේ දී ය.