සදහම් සුරතුර පත්‍රිකා - කඩවත ගුණානන්ද හිමි 2019.pdf

සදහම් සුරතුර යනු සම්මා සම්බුදුරජාණන් වහන්සේගේ සහ බෝධිසත්ව චරිතයේ සුවිශේෂී කරුණු, බුදුගුණ, ශාරීරික හා මානසික ලක්ෂණ මෙන්ම ශාසනික වැදගත්කම් විස්තර කරමින් සැකසුණු ධර්ම ග්‍රන්ථයකි. කඩවත ගුණානන්ද හිමියන් විසින් සම්පාදනය කරන ලද මෙම කෘතිය 2019 වර්ෂයේදී ප්‍රකාශයට පත් කර ඇත.

මෙහි ලෝක විනාශය හා කල්ප විභාගය, බෝධිසත්වයන් පාරමී පුරන කාලය තුළ සිදු වූ ආශ්චර්යයන්, සූවිසි විවරණ, බුද්ධත්වයේදී පහළ වූ ඥාන සහ ආවේණික ධර්මතා, දේහ ලක්ෂණ හා ප්‍රාතිහාර්යයන් පිළිබඳව කරුණු 32ක් යටතේ විස්තරාත්මකව හා සාරාංශගතව කරුණු ගොනු කර ඇත.

පෙරවදන

‘සදහම් සුරතුර’ නැමැති මෙම පොත අප විසින් බොහෝ කලක සිට සිදුකළ යුතු කටයුත්තක් සේ සැළකූ සිතුවිල්ලක ප්‍රතිඵලයකි. ඒ අනුව සම්මා සම්බුද්ධත්වය පිණිස බෝධිසත්වයන් වහන්සේ සසර සැරි සැරූ පාරමිතා ජීවිත තුළ ද, බුද්ධත්වයට පත් වීමෙන් උන්වහන්සේගේ ශාසනය තුළ ද විශේෂිත වූ බොහෝ කරුණු මාතෘකා ගණනාවක් ඔස්සේ මෙසේ පෙළ ගස්වන්නට විය. මෙම සඳහා මුලාශ්‍ර කොට ගත් පොත් පත් මොනවාද? යන්න ඒ ඒ තැන්හි කරුණු දැක්වීමට පෙර හැඳින්වීම කළ පරිච්ඡේදයෙහි දක්වා ඇත.

ලෞකික සැප, ලෝකෝත්තර සැප යන දෙයාකාර සැපයන්ගෙන් ලෞකික සැපය ලබන මාර්ගය සොයා පැමිණෙන ඕනෑම අයකුට තථාගතයන් වහන්සේ ඊට මාර්ගය දේශනා කොට තුන්ලෝ වාසීන්ගේ බලාපොරොත්තු වූ සැපය ළඟා කරවයි. එහෙයින් තථාගතයන් වහන්සේගේ ගුණ, තෙජ, බල සඳහන් මෙම පොතට ‘සදහම් සුරතුර’ යන නම යොදන්නට එක් හේතුවක් විය.

ඒ වගේම ලෝකෝත්තර සැපය පමණක් සොයා තථාගතයන් වහන්සේ වෙත පැමිණෙන ඕනෑම අයකුට ඊට පිහිට වෙයි. එහිදී ධර්මාවබෝධයට පත් ඔවුන් බොහෝ දෙනෙකු ‘ස්වාමීනී, භාග්‍යවත් බුදුරජාණන් වහන්ස, අද පටන් මා දිවි හිමියෙන් ඔබ වහන්සේ සරණ ගිය උපාසකයකු කොට දරණ සේක්වා! යි තම තමන් ධර්මාවබෝධයට පත් වීමෙ සතුට ප්‍රකාශ කරති. එහෙයින් ද තථාගතයන් වහන්සේගේ ගුණ, තෙජ, බල සඳහන් මෙම පොතට ‘සදහම් සුරතුර’ නම යෙදීය. මෙසේ ලෞකික, ලෝකෝත්තර සැප හෝ එයට මාර්ගය දේශනා කළ තථාගතයන් වහන්සේට ‘සුරතුර’ නම ප්‍රමාණවත් නොවුණ ද, ලෝකයන් තුළ ඇති දෙයකින් උපමා කිරීම ලෝක ස්වභාවය වන බැවින් එම නියාය අනුගමනය කරමින් දිව්‍ය ලෝකයේ සිතු පැතු සම්පත් දේ ලබා දෙන සුරතුරට බුදුන් වහන්සේ උපමා කොට ඒ නමින් මේ පොත හැඳින් වූවෙමි.

බෞද්ධයකු විසින් තෙරුවන් කෙරෙහි පහදින ආකාර දෙකකි. එනම් අමූලිකා සද්ධාව නැතිනම් ආකාරවතී සද්ධාවය. මෙහිදී අමූලිකා සද්ධාවට වඩා ආකාරවතී සද්ධාව බලවත්ය. ඒ කුමක් නිසා ද යත්, තෙරුවන් කෙරෙහි කරුණු දැන පැහැදීම වූ බැවිනි. එම නිසා බුදුරජාණන් වහන්සේගේ අචින්තනීයය, අප්‍රමෙයය බුදු ගුණ, බුදු තේජස හා බුදු බලය අතරින් ස්වල්පයක් හෝ දැන සිටීම ආකාරවතී සද්ධාවෙන් බුද්ධාලම්භන ප්‍රීතියට හේතුවේ. ඒ තුළින් චිත්ත සන්තානයන්හි බලවත් කුසල් සිත් ජනිත කර ගැනීමට ද හැකිවේ. මෙහි දක්වා ඇති බුදුගුණ ස්වල්පය වුවද ඊට මහත් උපකාරයක් වනු ඇත.

තථාගතයන් වහන්සේගේ කායික බලයත්, මානසික බලයත් වගේම එදා ලොවෙහි සිදු වූ ආශ්චර්ය අද්භූත ධර්මතා සහ බුද්ධ ශාසනයෙහි සුවිශේෂී සිදුවීම් ආදී නොයෙක් කරුණු කාරණා දැන සිටීමෙන් කෙනෙකු සිදු කරන පිංකම් වල මහත්ඵල මහානිශංස වන්නට උපකාරී වන්නේ කෙසේද? යන බව,

“තිට්ඨන්තෙ නි බ්බුතෙ චාපි සමෙ චිත්තෙ සමං ඵලං චෙතො පණිධිහෙතු හි සත්තා ගච්ඡන්ති සුග්ගතිං “යනුවෙන් ශක්‍ර දෙවියන් මාතලී ඇතුළුව තව්තිසා වැසි දෙවියන්ට කි බණෙහි ඉහත ගාථාවෙන් දැක්වේ.

මෙහි අදහස නම්, ‘බුදුන් කෙරෙහි සම අදහස් ඇතිව යමක් පිදූයේ වී නම් ජීවමාන බුදුන්ට කළා වූ පූජාවන් පිරිනිවන් පා කල කරන ලද උද්දේසික පූජාවන් සම විපාක වන්නේය. සිත් ප්‍රසන්න වූ කුශලය හේතු කොට ගෙන සත්ත්වයෝ ස්වර්ග සම්පත්තියට හා නිර්වාණයට පැමිණෙන්නාහ” යන අදහසයි. (විමාන වස්තුව - පීත විමාන කථා වස්තුව) එබැවින් මෙම පොත කියවීමෙන් තථාගතයන් වහන්සේ කෙරෙහි ආකාරවතී සද්ධාව උපදවා ගෙන කරන පිංකම් තුළින් සුගති භවයන් වගේම ලෝකෝත්තර සැප පිණිස ද හේතු වන කුසල් ජනිත වන්නේය.

ඉහතින් දැක්වූ කරුණු අනුව දායක, ප්‍රතිග්‍රාහක වන දෙපාර්ශවයටම දෙලොව යහපත පිණිස ධර්මදානයක්ව ලැබූ මෙම පොත ප්‍රතිග්‍රාහක පක්ෂය වශයෙන් එක් වතාවක් හෝ මුල සිට අග දක්වාම කියවීම ඔබ සතු යුතු කමකි. එය ඔබගේ දායකත්ව යයි. එසේ කියවීමෙන් උපදවා ගන්නා කුශලානිශංස බලය ඔබට දෙලොව යහපත, ලෝකෝත්තර සැප පිණිස පවතී. එසේ කුසල් සිත් ජනිත කරවන්නට මෙයට දායකත්වය දැරූ උදව් උපකාර කළ සැමට ද මහා ධර්ම දානමය කුශලයක් අත් වන්නේය.

මෙසේ අප සැමදෙනාට යහපත සිදුවන මේ මහා ධර්මදානමය කුශල බලය මීට දායකත්වය දැරූ උදව් උපකාර කළ සැමටත්, තමන්ගේ පරලෝසැපත් ඥාතීන් ටත්, ගුරු උතුමන්ටත්, පවුල් වල සැමටත් වගේම අප පරලෝසැපත් පියාණන් වහන්සේටත්, සුජීවත්ව සිටින මෑණියන්ටත් නිවන් පිණිසම හේතු වේවා! යි ප්‍රාර්ථනා කරමු.

තෙරුවන් සරණයි!
කඩවත ගුණානන්ද හිමි

ශ්‍රී විනයාලංකාරාරාමය,
පොකුණුවිට.
2019.07.16

ප්‍රාර්ථනාව

“තිලොක තිලකං වන්දෙ - සද්ධම්මාමතනිම්මිතං සංස්තුතං සමණෙහං - ජිතං ජන මනොරමං”

‘තුන්ලොවට තිලකයක් වැනි වූ සදහම් නැමැති අමෘතයෙන් නිර්මිත වූ ස්ව ශ්‍රාවකයන් විසින් කරන ලද බුහුමන් ඇති මිනිසුන්ගේ සිත් ඇද ගන්නා බුදුරදුන් නමදිමි’

“මහා කාරුණිකං නාථං - ඤෙය්‍ය සාගර පාරගුං වන්දෙ නිපුණ ගම්භීර - විචිත්‍රනය දෙසකං”

‘මහා කරුණා ඇති ඤෙය්‍ය සාගරයාගේ පරතෙරට පැමිණි සියුම් ගැඹුරු - විසිතුරු ක්‍රමයෙන් යුත් ධර්මදේශනා ඇති සර්වඥයන් වහන්සේ වදිමි’

“සබ්බා සව විනිම්මුත්තං - සබ්බ සාධුගුණාකරං සබ්බ ලොකගුරුං වීරං - හිතං අමත මග්ගදං”

‘මේ සද්ධම්මොපායන රචනා කළ පිනින් ලෝක වාසී හැම සත්ත්වයාම ලෝකයෙන් එතෙර වීමට සමර්ථ වේවා !”