ධර්මාචාර්ය විභාගය 1 මූලික ඉගැන්වීම්.pdf

මෙම ග්‍රන්ථය බෞද්ධ ධර්මාචාර්ය විභාගය හදාරන සිසුන් උදෙසා බෞද්ධ කටයුතු දෙපාර්තමේන්තුව මඟින් සම්පාදනය කරවා 2011 වර්ෂයේදී නොමිලයේ බෙදාහැරීම පිණිස ප්‍රකාශයට පත් කරන ලද්දකි. මෙහි කර්තෘත්වය දඹදෙණිය රජයේ ගුරු විද්‍යාලයේ විදුහල්පති ගුණසේන මහතන්ත්‍රිගේ මහතා සතු වේ.

පූජ්‍ය හේන්ගොඩ කල්‍යාණධම්ම හිමි, මහාචාර්ය චන්දිම විජේබණ්ඩාර, එච්. එම්. මොරටුවගම, අභය වීරකෝන් සහ සෝමරත්න කාරියවසම් යන මහත්වරුන්ගෙන් සමන්විත උපදේශක මණ්ඩලයක මඟපෙන්වීම යටතේ සම්පාදිත මෙම කෘතිය ථෙරවාදී බුදුසමයේ මූලික ඉගැන්වීම් ත්‍රිපිටක පෙළ දේශනා ඇසුරෙන් විස්තර කර දක්වයි.

මෙහි අන්තර්ගත ප්‍රධාන මාතෘකා:

• චතුරාර්ය සත්‍යය
• ත්‍රිලක්ෂණය
• ඛන්ධ, ආයතන, ධාතු විභාගය
• පටිච්චසමුප්පාදය
• කර්ම විභාගය
• කුසලාකුසල විනිශ්චය
• සත්තිස් බෝධි පාක්ෂික ධර්ම
• නිර්වාණය සහ නිර්වාණගාමී මාර්ගය
• භාවනා

පෙරවදන

ථෙරවාද බුදුසමයේ ඇතුළත් මූලික ඉගැන්වීම් මෙම ග්‍රන්ථයෙහි විස්තර වෙයි. හැකිතාක් දුරට පෙළෙහි එන දේශනා ඇසුරෙන් කරුණු විස්තර කිරීමට උත්සාහ කොට ඇත. මෙහි විස්තර වන ධර්ම කාරණා අතිශය ගැඹුරු විෂය ක්ෂේත්‍රයක් වන බැවින් හුදෙක් තමන්ට ම කියවා තේරුම් ගැනීම, වටහා ගැනීම මඳක් අසීරු වනු ඇත. එවැනි ගැටලු ඇති වූ විට ඒ පිළිබඳ ව කරුණු දන්නා අයකු සමඟ සාකච්ඡා කිරීමෙන් වඩාත් පැහැදිලි කර ගැනීමට හැකි වනු ඇත.

හුදෙක් මෙය පාඨ ග්‍රන්ථයක් වන බැවින් විචාර පූර්වක විවරණ ඉදිරිපත් කිරීමට උත්සාහ නො ගත්තෙමි. බොහෝ සෙයින් ම සාම්ප්‍රදායික විවරණයක් ගුරු තන්හි තබාගතිමි. කෙසේ වුව ද මෙහි ඇතුළත් මූලික ඉගැන්වීම් පිළිබඳ වඩාත් ගැඹුරෙන් හා විචාරාත්මක ලෙස හදාරනු කැමැත්තකු විසින් ගුරු උපදෙස් හා මූලාශ්‍රයන් පරිශීලනය කිරීම වැදගත් වෙයි.

ගුණසේන මහතන්ත්‍රිගේ