විනයත්ථදීපනී මාතිකට්ඨකථා ව්‍යාඛ්‍යානය 2 - මහව ඤාණාලෝක හිමි 2021.pdf
- කතෘ :
- මහව ඤාණාලෝක හිමි
- ප්‍රකාශිත වර්ෂය :
- 2021
- මුද්‍රිත වර්ෂය :
- 2021
- පිටු ගණන :
- 335
- බාගත කිරීම් ගණන :
- 1,117
- වෙබ් අඩවියට එක් කළ දිනය :
- 2021-11-06
- ගොනුවේ ප්‍රමාණය :
- 14 MB
පොතේ පිටු කිහිපයක ඡායාරූප පහතින් බලන්න.
විනයත්ථදීපනී නම් මාතිකට්ඨකථා ව්‍යාඛ්‍යානය (ද්විතීය භාගය) යනු භදන්ත බුද්ධඝෝෂ මහා තෙරුන් විසින් රචිත පාතිමොක්ඛට්ඨකථාව හෙවත් කංඛාවිතරණී අටුවාව ඇසුරෙන් පූජ්‍ය මහව ඤාණාලෝක හිමියන් විසින් සම්පාදිත ප්‍රශස්ත සිංහල සන්න/ව්‍යාඛ්‍යාන ග්‍රන්ථයකි. මෙහි අත්පිටපත පූජ්‍ය ගලේවෙල ඤාණදස්සන හිමියන් විසින් ශෝධනය කරනු ලැබ ඇත.
මෙම දෙවන භාගයෙන් පාතිමොක්ඛයේ අනියත මුල් ශික්ෂාපදයේ සිට අවසාන නිස්සග්ගිය පාචිත්තිය ශික්ෂාපදය දක්වා වන විනය විනිශ්චයන් සවිස්තරව විග්‍රහ කර ඇත. විනය පිටකයේ පාරාජිකා, පාචිත්තිය, මහාවග්ග, චුල්ලවග්ග ආදී පාලි පාඨ හා විනය අටුවා-ටීකා ඇසුරින් පදගත අර්ථ මෙන්ම ප්‍රායෝගික විනය කරුණු ද මෙහි පැහැදිලි කර දී තිබේ.
ශ්‍රී ලංකා රාමඤ්ඤ මහානිකායේ මහානායක අතිපූජ්‍ය මකුලෑවේ විමල මහානාහිමියන්ගේ පූර්විකාවකින් හා ආචාර්ය සූරක්කුලමේ පේමරතන හිමියන්ගේ පසුපිට සටහනකින් සමන්විත මෙම කෘතිය 2021 වර්ෂයේදී නෙලුම්ගල ශ්‍රී කාවන්තිස්ස මහාවිහාරයේ මහාවිහාරය බෞද්ධ ප්‍රකාශන මඟින් මුද්‍රණය කර ප්‍රකාශයට පත් කරන ලද්දකි.
පූර්විකාව
දිද්දෙණිය රණගිරිලෙන ආරණ්‍ය සේනාසනානුබද්ධ ථෙරවාද බෞද්ධ අධ්‍යයන පීඨයේ පීඨාධිපති, ත්‍රිපිටක විශාරද, රාජකීය පණ්ඩිත පූජ්‍ය මහව ඤාණාලෝක ස්ථවිරපාදයන් වහන්සේ විසින් විරචිත විනයත්ථදීපනී නම් මාතිකට්ඨකථා ව්‍යාඛ්‍යානය (ප්‍රථම භාගය) කියවා අධ්‍යයනය කිරීමෙන් ඤාණාලෝක ස්ථවිරපාදයන්ගේ විනයඥානය හා පාලි භාෂාවේ විශාරදත්වය පිළිබඳව බලවත් සන්තෝෂයට පත් වීමි. නිදාන වණ්ණනාව, පාරාජිකුද්දේස වණ්ණනාව, සංඝාදිසේසුද්දේස වණ්ණනාව වශයෙන් කොටස් තුනක් ඉතා මැනවින් එම ග්‍රන්ථයේ අර්ථ විග්‍රහ කොට දක්වා ඇත. විශේෂයෙන් පිරිවෙස් පිරීම, මානත පිරීම, අබ්භානය පිළිබඳ විවරණය ආධුනිකයන්ට පවා තේරුම් ගත හැකි අයුරින් පැහැදිලි කර තිබීමෙන් විනය කර්ම පිළිබඳ උන්වහන්සේගේ ප්‍රායෝගික ඥානය මනාව ප්‍රකට වේ. ප්‍රථම භාගයේ එන සංඥාපනය විනය පිටකය පිළිබඳව පැහැදිලි අවබෝධයක් ලබාගත හැකි වන සේ මහදුත්සාහයෙන් රචනා කොට ඇත.
විනයත්ථදීපනී නම් මාතිකට්ඨකථා ව්‍යාඛ්‍යානය ද්විතීය භාගය ද දැනට මුද්‍රණයට සකස් කොට ඇති බව දැන ගැනීමට ලැබීමෙන් විනය අධ්‍යයනයට යොමු වී ඇති විද්‍යාර්ථීන්ට මහඟු ලාභයක් උදා වී ඇතැයි සිතා අතිශයින් ම සතුටු වීමි. පෙළ අර්ථකථා විෂයෙහි ද විශේෂයෙන් විනය විග්‍රහ විෂයෙහි ද උන්වහන්සේ සතු විශේෂ හැකියාව ප්‍රශංසනීය ය. අර්ථ ව්‍යාඛ්‍යානයේ දී පවා උන්වහන්සේ අනුගමනය කර ඇත්තේ පෙර ඇදුරන් ගත් මග ම ය. වචන පරිවර්තනයේ දී ද අදාළ පරිවාර ග්‍රන්ථයන් ආශ්‍රය කොට, පුරාණ ආචාර්ය ව්‍යාඛ්‍යාන මග නො ඉක්මවා මනා සංයමයකින් එම කාර්යය සිදු කොට ඇති බව පෙනේ. අර්ථ ව්‍යාඛ්‍යානයන්හි යෙදෙන නවකයන්ට පූර්වාදර්ශයක් ලෙස මෙම ග්‍රන්ථ කාර්යය මැනවින් සිදු කොට ඇති බව කිව යුතු ය. අර්ථ ව්‍යාඛ්‍යාන කාර්යයෙහි උත්සුක වන නවක උගතුනට, අපේ ඤාණාලෝක ස්ථවිරයන් වහන්සේගේ මෙම ලේඛන මාර්ගය මහත් ආලෝකයක් සපයනු ඇත යනු මාගේ බලවත් විශ්වාසය යි.
ධර්ම විනයානුගත භික්‍ෂු ජීවිතයක් ගත කරමින් විනය විශාරදත්වයෙන් විශිෂ්ට හැකියාවන් පෙන්වමින් අපේ ඤාණාලෝක ස්ථවිරයන් විසින් කරන මෙම ශාසන සංග්‍රහය බෙහෙවින් අගය කරමින් උන්වහන්සේට තවදුරටත් මෙවැනි වැදගත් මෙහෙවර ඉටු කිරීමට තෙරුවන් සරණින් ශක්තිය හා ධෛර්‍ය්‍යය ලැබේවා යි ඉත සිතින් ආශීර්වාද කරම්හ.
මහව ඤාණාලෝක හිමියන්ගේ ධර්ම-විනය ඥානය තවතවත් දියුණු වේවා !
මෙයට කාරුණික,
මකුලෑවේ විමල මහාස්ථවිර
මහානායක
මහාවිහාරවංශික ශ්‍රී ලංකා රාමඤ්ඤ මහානිකාය
2020.04.06
ඇදුරු පරපුරේ ආශීර්වාදය
විනයත්ථදීපනී නම් මාතිකට්ඨකථා ව්‍යාඛ්‍යානයේ මෙම ද්විතීය භාගයට ඇතුළත් කර ඇත්තේ අනියත මුල් සිකපදයේ සිට අවසාන නිසගි සිකපදය දක්වා ය. මෙහි අර්ථ සිංහල බසින් ඉදිරිපත් කර ඇති ආකාරය අගනේ ය. ගුරුවරයෙකුගේ උපකාරය නොමැතිව ශිෂ්‍යයෙකුට මෙම පොත පරිශීලනය කරන්නට හැකි වන සේ මෙහි කර්තෘ වන පූජ්‍ය මහව ඤාණාලෝක ස්වාමීන් වහන්සේ මෙම පොත ඉදිරිපත් කිරීමට ගෙන ඇති උත්සාහය ප්‍රශංසනීය වේ. පූජ්‍ය මහව ඤාණාලෝක ස්වාමීන් වහන්සේගේ මෙම දක්‍ෂතාවය තව තවත් දියුණු වේවා යි ආශංසනය කරමි. ඉදිරියට ද මෙවැනි කෘති ඉදිරිපත් කිරීමට මෙම ස්වාමීන් වහන්සේට ශක්තිය ලැබේවා යි පතමි.
මේ වගට,
සසුන් ලැදි,
එම්. සංඝසෝභන හිමි
නාලයන ආරණ්‍ය සේනාසනය
පන්සියගම
2020.04.15
ආශංසනය
පූජ්‍ය මහව ඤාණාලෝක ස්ථවිරයන් විසින් කංඛාවිතරණී මාතිකට්ඨකථාව සඳහා සන්නයක් සැපයීම අතිශය ප්‍රහර්ෂයට කරුණකි. මෙවැනි සවිස්තර විනය විනිශ්චයන්ගෙන් යුත් සන්නයක් සපයමින් රචනා කර ඇති මෙම මාහැඟි ග්‍රන්ථය අනෙක් සන්න ග්‍රන්ථයන්ට අද්විතීය ය. දැනට ප්‍රථම භාගය හා ද්විතීය භාගය වශයෙන් කොටස් දෙකකින් සමන්විත වන පරිදි නිසගි ශික්ෂාපද දක්වා එය පාඨකයන් අතට පත්ව ඇත. උපසම්පදේක්ෂක ශිෂ්‍ය භික්ෂූන් වහන්සේලාගේ විනය දැනුම දියුණු කරගැනීම සඳහා මෙම ග්‍රන්ථය පරිශීලනය කිරීම ඉතා වැදගත් ය. අධ්‍යාපනය ලබන හෙරණ, උපසපන් සියලු ම භික්ෂූන් වහන්සේලා විසින් අත්පොතක් ලෙස මෙම ග්‍රන්ථය පරිශීලනය කිරීම ඉතා ප්‍රයෝජනවත් වනු නොඅනුමාන ය. පාරාජිකපාළිය, පාචිත්තියපාළිය, මහාවග්ගපාළිය, චුල්ලවග්ගපාළිය, පරිවාරපාළිය යන විනය පිටකයේ ඒ ඒ කරුණු සම්බන්ධයෙන් සාරාංශය මෙහි අන්තර්ගත ය.
මෙම විනයත්ථදීපනී නම් මාතිකට්ඨකථා ව්‍යාඛ්‍යානය නමැති ග්‍රන්ථය සැකසීම සඳහා පූජ්‍ය මහව ඤාණාලෝක ස්ථවිරයන් වහන්සේ විසින් විශාල පරිශ්‍රමයක් දරමින් කටයුතු කිරීම විශේෂත්වයකි. පූජ්‍යතර නුවරඑළියේ ඤාණසීල මහාස්ථවිරයන් වහන්සේගේ ශිෂ්‍යවරයෙකු ලෙස නිසි පරිදි ධර්මාධ්‍යයනය හා ශික්ෂණය ලබා ඉන් ලබාගත් පරිණතභාවය මෙම ග්‍රන්ථය තුළින් හෙළි වේ. ගුරුවරයා යටතේ සිටින ශිෂ්‍ය පිරිස ගුණගරුක විය යුතු ය. අවංක නිහතමානී ශීලාචාර බව, යටහත් පැවැතුම් ඇති බව, ඉවසීම, දයාව, කරුණාව යන ගුණධර්ම තිබිය යුතු ය. එවැනි ගුණ දහමින් පෝෂණය වූ තෙරපාණන් වහන්සේ